Kae ʻOua Ke Tau Toe Feʻiloaki
Ngaahi Sanipīmí, Ngaahi Fetuʻutaki mo e Kakaí, mo e Fiefia ʻo e Ongoongoleleí
Naʻe toʻo mei ha ʻinitaviu mei he Mormon Channel. Ke ke fanongo ki he initaviú kakato ʻi he lea faka-Pilitāniá, ʻalu ki he mormonchannel.org/conversations/27.
Ko e hā ha fekauʻaki ʻa e ngaahi Sanipīmí mo e ngaahi fetuʻutaki mo e kakaí? ʻOku lahi e ngaahi meʻa ʻoku nau fekauʻaki aí kapau ʻoku nau fakafofongaʻi ʻa e fiefia ʻo e ongoongoleleí.
ʻI he ngaahi taʻu siʻi kuo hilí, ʻi he taimi ne ma hoko ai mo ʻEletā M. Lāsolo Pālati ko e ongo ʻetivaisa mei he Kau Taki Māʻolungá ki he Potungāue ʻa e Siasí ki he Fetuʻutaki mo e Kakaí, naʻá ma fakatokangaʻi ʻoku faʻa fetuʻutaki ʻa e ngaahi kautaha mītiá ki he kakai ʻoku ʻikai te nau mēmipa ʻi he Siasí ke nau maʻu mei ai ha fakamatala ʻo kau ki he Siasí. Naʻá ma fakaʻamu ke fai ha liliu, ko ia ne kamata ai ke ma ʻaʻahi ki he ngaahi poate fakaʻētita ʻa e ngaahi nusipepa lalahí, ʻo fakatatau ki he tuʻutuʻuni ʻa e Kau Palesitenisī ʻUluakí, ʻo ʻoatu kiate kinautolu ʻa e pōpoaki, ʻi heʻetau hoko ko e Kau Māʻoniʻoni ʻi he Ngaahi ʻAho Kimui Ní, ʻoku ʻikai ke tau kau ki ha faʻahi fakapolitikale. ʻOku ʻikai te tau poupouʻi ha kau kanititeiti pe ngaahi faʻahi. Neongo iá, ʻoku tau loto ke tau fakamatalaʻi pē ʻe kitautolu ʻa ʻetau tuí. Naʻá ma fakahā kiate kinautolu, “ʻOku mau loto ke mou haʻu kiate kimautolu ke tau talanoa kapau ʻoku mou fie fakamatalaʻi ʻa e meʻa ʻoku mau tui ki aí.”
Naʻe talitali lelei e ngaahi talanoa ko iá pea naʻá ma ʻiloʻi naʻe tali ʻema kolé. Pea ʻoku tau aʻusia ha femahinoʻaki lelei ange he taimí ni mo e ngaahi kautaha mītiá ʻo fekauʻaki mo e Kau Māʻoniʻoni ʻi he Ngaahi ʻAho Kimui Ní. Kuo ʻi ai ha ngaahi sīpinga motuʻa kuo holoki hifo he taimí ni, pea ʻoku tau vakai ki hono fakatokangaʻi kitautolu ʻe he niʻihi kehé ʻo nau pehē ko ha kakai ʻulungāanga lelei kitautolu pea ʻoku tau feinga ke fehangahangai mo e moʻuí mei ha tuʻunga fakakaukau poto mo fāitaha. ʻOku mau toe fakatokangaʻi foki ha meʻa ʻi tuʻa ʻi he Siasí, ʻoku ʻikai ke tatau ʻa e Kāingalotu kotoa pē, ʻoku kehekehe ʻaupito hotau kakaí ʻi ha ngaahi founga lelei mo mahuʻinga.
Ko ha taimi fakaofo ʻeni ke te hoko ai ko ha mēmipa ʻo e Siasí, tuʻunga ʻi he feliliuaki ʻa e ngaahi tuʻunga fakakaukau ko ʻení, ʻa ia ʻoku totonu ke lea hake ai ʻa e kāingalotú mo tali ʻa e ngaahi fehuʻi mei honau ngaahi kaungāmeʻá mo e kaungāʻapí ʻo kau ki he ngaahi meʻa ʻoku tau tui ki aí. Kapau te tau fai pehē, ʻoku ʻikai ha meʻa ʻe mahuʻinga ange ʻi heʻetau loto fiefia mo nēkeneka ʻi he ongoongolelei ʻa Sīsū Kalaisí. ʻOku tau ʻiloʻi ʻa e ikuʻangá, ʻoku tau ʻiloʻi ko hai ʻa Sīsū Kalaisi, pea ʻoku tau maʻu ʻa e faingamālie ke tāpuakiʻi kitautolu ʻe ha Tamai ʻi Hēvani ʻofa.
ʻOku ou lau ko ha meʻa mahuʻinga ʻa e faʻa hoko ʻa hotau kau mēmipa ngāue fakafaifekau lelei tahá, ʻa e kakai koē ʻoku nau fakaʻaongaʻi ʻa e faingamālie ke nau vahevahe atu ʻa e ongoongoleleí, ko e kakai ia ʻoku nau fiefia maʻu pē. Naʻe fakaʻohovale ʻemau fakatokangaʻi ha ngaahi papitaiso ʻi Falanisē ʻi he taimi naʻá ku hoko ai ko e Talēkita Pule ʻo e Potungāue Ngāue Fakafaifekaú, Naʻa mau fiefia ai pea mau fifili ki hono ʻuhingá, pea naʻe ʻi ai ha ngaahi ʻuhinga lahi ki ai. Ka ko e taha ʻo e ngaahi tefitoʻi ʻuhingá, ko ha fefine naʻe ʻalu ki he ngāué ʻi he pongipongi Mōnité ʻo ne talanoa ai ʻo kau ki he kau Sanipīmí. ʻI he ʻosi ʻa e Sāpate kotoa pē ʻokú ne ʻalu atu—ʻi he loto fiefia lahi—ʻo talanoaʻi ki hono kaungā-ngāué ʻa ʻene ʻakoʻi ʻa e fānau īkí ʻi he Sāpaté. Naʻe ʻikai fuoloa, mo e ʻikai ke faʻa tatali hono kaungā-ngāué kiate ia ke ne talanoa ange ʻo kau ki he kau Sanipīmí. Ko e hā e meʻa naʻe hoko aí? Ko ha kulupu ʻeni ʻo ha kakai naʻa nau nofo mo e ngaahi meʻa ʻoku tau tokanga tatau ki ai ʻi hotau māmaní pea mo e kahaʻú, pea fakafokifā, naʻe haʻu ʻa e tokotaha ko ʻení, ʻa ia naʻe ʻikai ngata ʻi heʻene fiefiá, ka naʻá ne fiefia foki ʻi he fānaú—ʻa ia ʻoku nau fakafofongaʻi ʻa e kahaʻú. ʻOku mahino ʻaupito e ʻofa ʻa e fefine ko ʻení ʻi he Fakamoʻuí, pea naʻe hā atu ʻa e ʻofa ko iá meiate ia. Naʻe fie ʻilo lahi ange hono kaungā-ngāué ki ai.
Kapau ʻoku tau fiefia ʻi he meʻa ʻoku tau maʻú, kapau ʻoku tau ongoʻi ha fiefia pea tau fakahā ia, ʻoku tau fiefia ange ai. ʻOku tau fai ʻa e meʻa ʻoku finangalo ʻa e ʻEikí ke tau faí, ʻoku tau hoko ai ko ha kakai lelei ange, pea ʻi heʻetau feohí, mo e kakai ko ia ʻoku nau ofi takai ʻiate kitautolú—ʻa ʻetau fānaú mo e ngaahi kaumeʻá mo e kaungāʻapí—ʻoku nau fiefia ange. Ko e fiefiá ʻa e kií. ʻI he taimi ko ia ʻoku tau vahevahe atu ai ʻa e fiefia ʻo e ongoongoleleí, ʻoku tau fakahoko ai ʻa e meʻa ʻoku finangalo ʻa e ʻEikí ke tau fakahokó.