Ko e Meʻa ʻOku Tau Tui Ki Aí

Naʻe Toe Fakafoki Mai ʻa e Ongoongolelei ʻo Sīsū Kalaisí ʻi he Palōfita ko Siosefa Sāmitá

Naʻe liliu ʻe he kakaí ha niʻihi ʻo e ngaahi tokāteline mo e ngaahi ouau ʻo e ongoongoleleí hili hono Tutuki ʻo e Fakamoʻuí mo e mate ʻEne kau ʻAposetoló. Neongo naʻe tokolahi ha kakai lelei naʻa nau tui kia Sīsū Kalaisi pea nau feinga ke mahino kiate kinautolu mo ako ʻEne ongoongoleleí, ka naʻe ʻikai te nau maʻu hono kakato ʻo e moʻoní. Naʻe tupu ai ha ngaahi tuʻunga kehekehe ʻo e hē mei he moʻoní ʻa e kau Kalisitiane naʻe kei moʻuí. Neongo naʻa nau maʻu ha ngaahi moʻoni lahi, ka naʻe ʻikai maʻu ʻe kinautolu hono kakato ʻo e ngaahi tokāteline, ngaahi ouau, pe lakanga fakataulaʻeiki ʻo Kalaisí.

Naʻe ʻafioʻi ʻe heʻetau Tamai Hēvaní ʻe hoko ʻa e mole atu ko ʻeni ʻo e moʻoní, ko ia naʻá Ne fakatolonga mai ai ʻa e kakato ʻo e ongoongolelei ʻa Sīsū Kalaisí ʻi ha tohi folofola mei he kuonga muʻá ʻa ia ʻoku tatau mo e Tohi Tapú. Naʻe fakahinohinoʻi ʻa Siosefa Sāmita ʻi he konga kimuʻa ʻo e ngaahi taʻu 1800 ʻe ha talafekau fakalangi, ko hono hingoá ko Molonai, ke ne ʻalu ki he feituʻu kuo fufuuʻi ai ʻa e folofola toputapu ko ʻení ʻi ha ngaahi senituli lahi. Naʻe hiki ia ʻi ha ngaahi peleti koula, pea naʻe kau ʻi he lekooti ko ʻení ʻa e ngaahi tohi ʻa ha kau palōfita ʻoku nau fakamatala ki he ngaahi fengāueʻaki ʻa e ʻOtuá mo ha niʻihi ʻo e kakai naʻa nau nofoʻi ʻa e ongo ʻAmeliká ʻi he kuonga muʻá. Naʻe liliu ʻe he Palōfita ko Siosefa Sāmitá ʻa e ngaahi meʻa naʻe tohi ʻi he ngaahi peleti ko ʻení ʻi he foaki mo e mālohi ʻo e Otuá. Ko e lekooti ko iá ʻa e Tohi ʻa Molomoná: Ko ha Fakamoʻoni ʻe Taha ʻo Sīsū Kalaisi.

Naʻe lava ʻe Siosefa Sāmita ʻo ako ʻi hono liliu ʻo e Tohi ʻa Molomoná ki he ngaahi tokāteline ʻa e ʻOtuá—pea ko ʻene faiakó ʻa e Laumālié, pea ko ʻene tohi lēsoní ʻa e Tohi ʻa Molomoná. ʻI he taimi ko ia naʻe ʻi ai ai ha fehuʻi ʻa Siosefa Sāmita, naʻá ne kumi ki he ʻOtuá ʻi he lotu pea naʻe fakahā mai ʻe he ʻOtuá ʻa e talí kiate ia. Naʻe hanga ʻe he founga ko ʻení ʻo akoʻi kia Siosefa Sāmita, ʻa ia ko ha talavou naʻe ʻikai ako, ʻa e ngaahi moʻoni ʻa ia naʻe mahuʻinga ki hono ui ia ke hoko ko e Palōfita ʻo hono Toe Fakafoki Mai ʻo e Ongoongoleleí.

Fakamoʻoni ʻa e Palōfita ko Siosefa Sāmitá

1. “Kuó u mamata moʻoni ki ha maama, pea naʻá ku mamata ʻi he lotolotonga ʻo e maama ko iá ki ha Tangata ʻe toko ua, pea naʻá na folofola moʻoni mai kiate au; pea neongo naʻe fehiʻanekinaʻi mo fakatangaʻi au koeʻuhi ko ʻeku taukaveʻi kuó u mamata ki ha meʻa-hā-maí, ka naʻe moʻoni ia; … naʻá ku ʻiloʻi ia, peá u ʻiloʻi ʻoku ʻafioʻi ia ʻe he ʻOtuá, pea ʻe ʻikai te u lava ʻo fakaʻikaiʻi ia, pea ʻe ʻikai foki te u toʻa ke fai pehē.”¹

2. “Naʻá ku liliu ʻi he mālohi ʻo e ʻOtuá ʻa e Tohi ʻa Molomoná mei ha tohi fakakuongamuʻa (hieroglyphics), naʻe ʻikai toe ʻilo ʻe māmani, pea naʻá ku tuʻu toko taha ai ʻi he meʻa fakaʻofoʻofá ni, ko ha talavou taʻepoto, ke fepaki mo e poto fakamāmaní pea mo e taʻeʻilo lahi ʻo e kakai ʻo e senituli hongofulu mā valú, ʻaki ha fakahā foʻou.”²

3. “Naʻá ku fakahā ki he kau takí, ko e Tohi ʻa Molomoná ko e tohi tonu taha ia ʻi ha toe tohi he funga māmaní, mo e maka-tuʻu-loto ʻo ʻetau tui fakalotú, pea ʻe ofi ange ai ha tangata ki he ʻOtuá ʻaki haʻane tauhi hono ngaahi akonakí, ʻi ha toe tohi.”³

4. “ʻOku ou maʻu ʻa e ngaahi kī ʻo e puleʻanga fakaʻosí, ʻa ia ko e kuonga ia ʻo e kakato ʻo e ngaahi meʻa kotoa pē naʻe leaʻaki ʻe he ngutu ʻo e kau Palōfita māʻoniʻoní kotoa, talu mei he kamataʻanga ʻo e māmaní, ʻi he malumalu ʻo e mālohi faifakamaʻu ʻo e Lakanga Taulaʻeiki Faka-Melekisētekí.”⁴ (Vakai, T&F 27:12–13.)

5. “Naʻe fokotuʻu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he fakahā fakahangatonu, ʻo hangē ko e founga maheni ʻi he Siasi moʻoni ʻo e ʻOtuá, … pea tuʻunga ʻi he finangalo mo e ngaahi tāpuaki ʻa e ʻOtuá, kuó u hoko ai ko ha meʻangāue ʻi Hono toʻukupú, ke paotoloaki ʻa e ngāue ʻo Saioné.”⁵

6. “ʻOku talamai ʻe he [Tohi ʻa Molomoná]…, naʻe hā ʻa e Fakamoʻuí ʻi he konitinēnití ni, hili ʻa ʻEne toetuʻú; naʻá Ne fokotuʻu heni ʻa e Ongoongoleleí ʻi hono tuʻunga kakato mo leleí, mo hono mālohí mo e tāpuakí.”⁶

Maʻuʻanga Fakamatalá

1. Siosefa Sāmita—Hisitōlia 1:25

2. Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 70.

3. Ngaahi Akonaki: Siosefa Sāmita, 73.

4. Ngaahi Akonaki: Siosefa Sāmita, 591.

5. Ngaahi Akonaki: Siosefa Sāmita, 224.

6. Ngaahi Akonaki: Siosefa Sāmita, 73-74.

Ke maʻu ha fakamatala lahi ange, vakai ki he Ngaahi Tefitoʻi moʻoni ʻo e Ongoongoleleí (2009), 101–108, 109–116; Tuʻu Maʻu ʻi he Tuí (2004), 94–99, 17–21, 141–46; mo e Gary J. Coleman, “Jesus Christ Is at the Center of the Restoration of the Gospel,” Ensign, Nov. 1992, 43.

Neongo ʻoku tau tui ko ha palōfita ʻa e ʻOtuá ʻa Siosefa Sāmita, ka ʻoku tau lotú ki heʻetau Tamai Hevaní mo Hono ʻAlo ko Sīsū Kalaisí.

Mei toʻohemá: Fakamālō ki he Tangatá, tā fakatātaaʻi ʻe Jon McNaughton; Ko e ʻUluaki Mata-Meʻa-Hā-Mai ʻa Siosefa Sāmitá, tā fakatātaaʻi ʻe Greg Olsen, ʻoua naʻa hiki hano tatau; Ko Hono Liliu ʻe Siosefa Sāmita ʻa e Tohi ʻa Molomoná, tā fakatātaaʻi ʻe Del Parson © 1996; Palōfita ʻa e ʻEikí, tā fakatātaaʻi ʻe David Lindsley, ʻOua naʻa Hiki Hano Tatau; konga naʻe toʻo mei he Ko Hono Fakafoki Mai ʻo e Lakanga Taulaʻeiki Faka-Melekisētekí, tā fakatātaaʻi ʻe Liz Lemon Swindle, ʻoua naʻa hiki hano tatau; Ko Hono Fokotuʻu ʻo e Siasi ʻo Sīsū Kalaisí, 1830, tā fakatātaaʻi ʻe Joseph Brickey, ʻoua naʻa hiki hano tatau; Vakai Ko Hoʻomou Fānau Īkí, tā fakatātaaʻi ʻe David Lindsley © 1983