Mei he Malaʻe Ngāue Fakafaifekaú
Ko Hono Fafanga ʻa Kinautolu ʻOku Fiekaiá
ʻOku tau lava ʻ o fakahoko ʻi he ngaahi meʻa īkí ʻa e ngaahi fuʻu meʻa lalahi—ʻa e fakatuʻasino mo e fakalaumālie fakatouʻosi.
Tā fakatātaaʻi ʻe Carolynn Vibbert
Naʻá ku lolotonga ngāue fakafaifekau taimi kakato ʻi Linisi, Sao Paulo, ʻi Palāsila ʻi Tīsema ʻo e 2004. Naʻe fakakaukau ʻa e uooti mo e kolo fakalotofonuá ke nau kau ki he kātoanga fakataʻu ʻa Palāsila ko e “Natal sem Fome” ko e polokalama ko e (ʻIkai ha Fiekaia ʻi he Kilisimasí). ʻOku nau ngāue fakataha mo ha ngaahi kautaha kehe ki ai—kau ai ʻa e kau sōtiá mei he kau tau ʻa Palāsilá, kau tufa meilí mo e kau mēmipa ʻo e ngaahi kautaha lotu kehe—naʻa mau ʻalu atu ai ʻi ha ngaahi kaungāʻapi lahi ʻo tānaki mai ʻa e meʻakai ʻoku toki foaki kimui ki he kakai masiva ʻo e koló. Naʻa mau toe ngāue ʻaki ʻeni ke tufa ai ʻemau fanga kiʻi kaati fakafeʻiloakí ʻoku mau ui ko e “ngaahi kaati fakakaumeʻa.” Naʻa mau tufa ai ha kaati ʻe 2,000 nai.
Naʻe tokolahi ha kāingalotu naʻa nau fakamatala ki he fiefia naʻa nau ongoʻi ʻi he tokoni ko iá pea nau vahevahe atu ʻa e laumālie ʻo e Kilisimasí ʻi he laʻā vevela ʻo Palāsilá. Ko e meʻa fakafiefia ʻete vakai ki he kau sōtiá ʻoku nau tufa ha ngaahi kaati fakafeʻiloaki ʻa ha siasi ʻoku ʻikai ke nau kau ki ai.
Naʻa mau maʻu ha kole ʻe 127 ʻi he ʻosi ha uike ʻe taha mei ai ki he foʻi DVD faka-Kilisimasi ko e Joy to the World ʻa ia ʻoku fakaʻaliʻali ai e Kuaea ʻa e Tāpanekalé. Naʻe maʻu ha kole kehe ʻe 22 ʻi he uike hono hokó. Naʻá ma kamata akoʻi mo hoku hoá ʻa e kakai ko iá, peá ma lava ʻo hū ai ki ha ngaahi ʻapi lahi tuʻunga ʻi he polokalama ngāueʻofa ko ʻení.
ʻE ikai ngalo ʻiate au ʻa e fiefia mo e ʻofa ʻo e polokalama makehe ko iá ʻi heʻemau tokoni ki hono fakamafola ʻa e ongoongoleleí pea ʻomi ha fakafiemālie ki ha ngaahi fāmili lahi naʻe fiekaia. Naʻe fakasiʻisiʻiʻi ai ʻa e fiekaia fakatuʻasinó mo fakalaumālié fakatouʻosi.
ʻOku ou ʻiloʻi ʻoku fakafouʻi he ngaahi meʻa iiki mo faingofuá (hangē ko hono tufa ʻo e ngaahi kaati fakafeʻiloakí) hano fakahoko ʻo ha ngaahi fuʻu meʻa fakaofo (hangē ko hono fakamoʻui ʻo e laumālie ʻo e tangatá). ʻOku hoko ʻa e meʻá ni ko ha fakamoʻoni ʻoku takatakaiʻi ʻiate kitautolu ha ngaahi faingamālie lahi ʻi he taimi Kilisimasí mo e ngaahi faʻahitaʻu kehé ke fakahoko ʻa e ngāue lahi mo fakaofo ko ʻení.