Ngaahi Meʻaʻofa ʻOku ʻIkai te Ke Lava ʻo Kofukofuʻi

Fai ʻe Elyse Alexandria Holmes

ʻOku tau faʻa tokanga pē ʻi he Kilisimasí ki hono foaki ʻo e ngaahi meʻaʻofá kiate kinautolu ʻoku tau ʻofa aí. Kae manatu, ko e niʻihi ʻo e ngaahi meʻaʻofa mahuʻinga tahá ko e ngaahi meʻaʻofa ko ia ʻoku ʻikai te ke lava ʻo kofukofuʻí. Ko ha niʻihi ʻeni ʻo e ngaahi meʻaʻofa fakangalongataʻa te mou lava ʻo foaki ki hoʻomou mātuʻá.

Ngāue tokoní

Ko e taha ʻo e ngaahi meʻaʻofa mahuʻinga taha te mou lava ʻo foakí ko e ngāue tokoní. ʻE saiʻia ai hoʻomou mātuʻá.

Fakamaʻa ʻo e falé.
Loto ke ke toʻotama.
Fokotuʻutuʻu mo fakamaau ʻa e tēpile kaí.
Teuteuʻi ʻa e kai efiafi ʻa homou fāmilí.
Fufulu ʻa e ʻū peletí pē tafi ʻa e falikí.
Tokoni ki hao tokoua/tuofefine ʻi heʻene ngāue fakaakó.
Tata ʻa e sinou ʻi he hala ki ʻapí pe huo ʻa e ngoué ʻo fakatatau pē ki he anga ʻo e ʻeá ʻi he feituʻu ʻoku mou nofo aí.

Taimi moʻó e Fāmilí

Neongo ʻoku femoʻuekina homou taimí, vaheʻi ha taimi ki homou fāmilí. ʻE tokoni hoʻo ʻi aí ki hono poupouʻi hoʻo ongomātuʻá, pea te na fakamālō atu koeʻuhi ko hoʻo ngaahi tokoní.

Kau ki he efiafi fakafāmili ʻi ʻapí (kae ʻoua ʻe tuku ke toki fakamanatu atu ia kiate koe).
Vaʻinga mo ho ngaahi tokoua mo e tuofāfiné.
ʻOua te ke tōmui ki he ngaahi houa kai efiafí.
Talanoa pea fanongo ki he kau mēmipa ʻo e fāmilí.
Kau ki he lotu fakafāmilí mo e lau folofolá.
Fakamoleki ha taimi mo ho fāmilí kae ʻikai ko ho ngaahi kaumeʻá pē, pe fakaafeʻi mai ho ngaahi kaumeʻá ki he ngaahi ʻekitivitī fakafāmilí (kapau ʻe fakangofua ʻe he mātuʻá).

Tukupā

Fakahā ki hoʻo mātuʻá ʻokú ke tukupā ke fai ha meʻa mahuʻinga. Ko e founga lelei taha ke ke fakahā ʻaki hoʻo tukupaá, ko hoʻo kamata he taimí ni pea hokohoko atu ai pē.

Teuteu ke ke ʻalu ʻo ngāue fakafaifekau (ʻa e kau talavoú). Kamata he taimí ni ke tānaki haʻo paʻanga ngāue fakafaifekaú, kapau ʻoku faingamālie.
Ako fakaʻaho ʻa e folofolá
Fakahū ha konga ʻo hoʻo paʻanga ʻoku maʻu maí.
ʻAlu ki he akó pea ʻoua ʻe lāunga pea fai hoʻo ngaahi ngāue fakaako mei ʻapí ʻi he taimi totonu.
Kau ki he seminelí. ʻA ʻiate koe pē, kapau ʻokú ke ʻalu ki he semineli pongipongí.
Teuteu ki he mali temipale. Hiki ha lisi ʻo e ngaahi ʻulungāanga mahuʻinga ke ke sio ki ai ʻi ha mali ʻi he kahaʻú, peá ke fakatupulaki ʻa e ngaahi ʻulungāanga ko iá ʻiate koe foki.

Tōʻonga fakakaukaú

ʻE hounga ki hoʻo mātuʻá hoʻo ngaahi tōʻonga fakakaukau lelei kiate kinaua pea ki he kau mēmipa kehe ʻo e fāmilí.

Maʻu ha tōʻonga fakakaukau ʻoku leleí
ʻOua te ke sio ki he ngaahi fehālaaki ʻa hoʻo mātuʻá pe ngaahi tokouá pe tuofāfiné.
Anga ʻaki ʻa e fakamāloó, ʻo aʻu pē ki he fanga kiʻi meʻa īkí.
Fai ha kiʻi tohi fakamālō ki hoʻo mātuʻá koeʻuhi ko e ngaahi meʻa kuó na fai atu maʻaú.
Fakaleleiʻi ʻa e ngaahi palopalema mo hoʻo mātuʻá pe ngaahi tokouá pe tuofāfiné, ʻo ʻikai ʻi he ʻita pe fakakikihi.
Tānaki—moʻoni—ho ngaahi tāpuakí. Hiki ha lisi ʻo e ngaahi meʻa kuó ke lava ʻo fai koeʻuhi ko e poupou ʻa hoʻo ongomātuʻá, pea fakahā hoʻo lisí kiate kinaua.