Fesoasoani i le Autalavou Ia Avea ma Tagata Aoao ma Faiaoga Malolosi
O le mataupu aoaoina fou a le autalavou o le, Sau, Mulimuli Mai Ia Te A’u: Punaoa e Aoao ai mo le Autalavou, o loo faamamafaina ai ni auala se fa e mafai e matua, faiaoga ma taitai ona fesoasoani lelei ai i le autalavou ia liua i le talalelei.
I se tala faaletusi paia e uiga i soifuaga talavou o Iesu Keriso, ua tatou iloa ai o le Faaola ina ua 12 tausaga sa maua atu “i le malumalu, o nofo i totonu o le au aoao o loo faalogologo ia te i latou, ma tuufesili ia te i latou.
“Ua matua ofo uma lava e na faalogo ia te ia i lona poto ma ana upu e tali” (Faaliliuga Iosefa Samita, Luka 2:46–47 [i le Luka 2:46, vaefaamatalaga c]).
Mai lona laitiiti sa auai malosi ai le Faaola i le aoaoina mai ma le aoao atu o le talalelei. I le malumalu sa aoao atu e le Faaola mataupu faavae o le talalelei ia i latou o e sa manatulia e faapea na sili mamao atu le atamamai ma le aoaoina nai lo o Ia. Ae sa Ia malamalama o le aoaoina ma le aoao atu o le talalelei o se vaega o le “galuega a Lona Tama” (Luka 2:49) ma e totonugalemu i Lana misiona paia i luga o le fogaeleele.
E le fesiligia, o Iesu Keriso o se tagata tulaga ese i le aoaoina ma aoao atu o le talalelei, e ui lava i lona talavou; ae sa tuputupu ae o Ia i Lona gafatia ona malamalama ma aoao atu aoaoga faavae. Ua ta’u mai e mau ia i tatou sa “alualu pea [o Ia] mai lea alofa tunoa i lea alofa tunoa, seia oo ina maua e ia le atoatoaga” (MF&F 93:13). A o faatulaga pea lava pea e le autalavou o aso nei o latou olaga ma mea ua latou iloa e moni, e mafai foi e i latou ona liua moni i le Faaola ma Lana talalelei ma tuputupu ae i le poto i “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30).
I se taiala o tusi ma mea e faaaoga fou mo mataupu aoaoina a le autalavou, ua saunoa ai le Au Peresitene Sili, “Ua valaauina outou e le Alii e fesoasoani i le autalavou ia liua i le talalelei.”1 A o tatou suesue ma faataitai i le galuega a le Faaola, o le a mafai ona tatou lagolago atu ma le mataalia i a tatou talavou i la latou faigamalaga e aoao, ola, ma aoao atu le talalelei a Iesu Keriso. E pei foi o le Faaola, e mafai ona tatou saunia i tatou lava faaleagaga, tali atu i manaoga a o tatou talavou, uunaia i latou ia iloa upumoni o le talalelei, ma lu’i i latou ia liua ao latou faia ma le faatuatua ia mea.
Saunia Faaleagaga.
A o le’i amataina Lana galuega i le lalolagi, sa saunia faaleagaga e le Faaola o Ia lava e ala i le maelega e suesue, tatalo, ma anapogi. Sa “taitai atu o ia e le Agaga i le vao e mafuta ai ma le Atua” ma “anapogi mo le fasefulu ao ma le fasefulu po” (Faaliliuga Iosefa Samita, Mataio 4:1–2 [i le Mataio 4:1, vaefaamatalaga e]). I le faaiuga o Lana anapogi, sa fetaiai ai le Faaola ma se soloaiga o faaosoosoga mai le fili. O ana suesuega i tusitusiga paia sa faatino muamua sa fesoasoani ia Iesu e tali atu ai i faaosoosoga taitasi i fuaiupu mai tusitusiga paia (tagai i le Mataio 4:3–10). O tapenaga faaleagaga sa mafai ai e Ia ona le gata ina faafetauia ma le manuia ia faaosoosoga i Lona soifuaga atoa, ae ia aoao atu ai foi ma le mamana le talalelei i Lana galuega atoa.
O le aoaoina o le autalavou e manaomia ai ni tapenaga se tele atu nai lo o le tatope o le vaai i se tusi lesona ae o le a oo i le taimi e amata ai ona aoao atu. Ua poloai mai le Alii, “Aua le saili e talai atu la’u upu, ae ia muamua saili ia maua la’u upu” (MF&F 11:21). Tatou te saunia faaleagaga e ala i le suesueina ma le agaga tatalo o tusitusiga paia ma saunoaga a perofeta soifua e iloa ai aoaoga faavae moni. A o tatou tapena i lenei faiga, e faamautu mai e le Agaga Paia le moni o le aoaoga faavae ma uunaia i tatou ia manatua aafiaga o le ola ai i aoaoga faavae ia e mafai ona tatou faasoa atu.
A o aoao atu i tamaitai talavou i le taua o faaaliga faaletagata lava ia, sa uunaia Estefani Melero mai le Siteki a Lima Peru Surco e faasoa atu lona aafiaga i le sailia o lana molimau i le 14 o ona tausaga. Sa molimau atu o ia i tamaitai talavou a o tatalo faatauanau o ia ia iloa le moni o le talalelei, sa pei e musumusu atu se leo i lona loto i upu e le’i galo lava ia te ia: “Estefani, ua e iloa e moni. Ua e iloaina lava.”
A o tatou suesue ma ola i aoaoga faavae tatou te aoao atu, e sili atu nai le na ona avea o i tatou o ni faiaoga—e avea i tatou ma molimau o le upumoni.
Fesili e Mafaufau Loloto i Ai: O a nisi mau o loo faaalia ai auala na saunia ai e le Faaola o Ia lava e aoao atu? O faapefea ona faaosofia e au taumafaiga ia saunia e aoao atu le mataalia o lau savali?
Taula’i atu i Manaoga
I Ana fegalegaleaiga ma se taulealea mauoa, sa faaali atu e le Faaola sa Ia malamalama i manaoga o i latou sa Ia aoaoina. Sa amata le faamatalaga a le taulealea i se fesili: “Se a le mea ou te faia ou te maua ai le ola e faavavau?” Ina ua uma ona aoao atu e le Faaola le taua o le usiusitai i poloaiga, sa tali le taulealea, “Ua ou tausia ia [poloaiga] uma talu lava ina ou itiiti.” O le iloaina sa le’i i ai lava i le loto o le taulealea le “mea e tasi,” sa luiina ai e Iesu le alii ia faatau atu ana mea uma sa i ai, avatu i e matitiva, ma mulimuli atu ia te Ia. (Tagai i le Luka 18:18-23.) A tatou tatalo mo faaaliga ma nofouta i manaoga, faamoemoega, ma faanaunauga a le autalavou, o le a tatou—e pei ona sa faia e le Faaola—iloa le ala e aoao atu ai ma luiina ai i latou ia ola i le talalelei i ni auala patino ma anoa.
Na saunoa Peresitene Boyd K. Packer, Peresitene o le Korama a Aposetolo e Toasefululua, e faapea o o tatou “tagata talavou ua tausia i le itu a le fili.”2 I le avea ai ma matua ma faiaoga, e ao ona tatou malamalama i faigata o loo feagai ma o tatou talavou. Fai mai Kevin Toutai, o se faiaoga o le Aoga Sa i le Siteki a Columbine Colorado, “O luitau o loo feagai ma le autalavou e le mafai ona aoaoina mai se tusi lesona. O faaaliga patino na tatou te maua a o o atu faiaoga ma mafai ona saunia o tatou tagata talavou e tau ma Satani i aso taitasi. Ua ou vaai e le mafai ona e tu atu i le Aso Sa ma se tusi lesona ma fai se lesona.”
O le fesoasoani i le autalavou ia aoao ma ola i le talalelei e aofia ai taumafaiga tuufaatasi a matua, taitai, faufautua, ma faiaoga. A o tatou sailia musumusuga mai le Agaga Paia, e mafai ona tatou aoao atu ma le mataalia aoaoga faavae o le a saunia ai le autalavou mo faaosoosoga ma luitau latou te feagai.
Fesili e Mafaufau Loloto I Ai: O le a le eseesega o le lalolagi i le taimi nei ma taimi sa e talavou ai? O a ni luitau o e vaai o feagai ma le autalavou? O le fea o aoaoga faavae o le talalelei, afai e malamalama i ai, o le a fesoasoani ia i latou e taulima manuia ai nei luitau?
Valaaulia le Autalavou ia Iloa Upumoni o le Talalelei
Sa aoao e le Faaola ia Ona soo i auala sa uunaia ai i latou ia iloa le upumoni ma maua ni molimau patino. A o aoao atu i Sa Nifae, sa fetalai o Ia:
“Ua ou iloa ua outou vaivai, ua le mafai ona outou malamalama i a’u upu uma ia na poloaiina ai au e le Tama e tautala atu ia te outou i le taimi nei.
“O lea, ia outou o atu i o outou fale, ma mafaufau i mea ia na ou fai atu ai, ma ole atu i le Tama, i lo’u igoa, ina ia outou malamalama ma saunia o outou mafaufau mo a taeao” (3 Nifae 17:2–3).
O aoaoga faa-Keriso e tele atu mea e aofia ai nai lo na o le tuuina atu o faamatalaga. E aofia ai le taialaina o le autalavou ia malamalama i aoaoga faavae mo i latou lava. E ui ina faaosoosoina i tatou e lauga atu ia i latou e uiga i le talalelei, o le a sili atu lo tatou mataalia pe a tatou fesoasoani ia i latou ia maua e i latou lava ia tali, e mafai ai ona latou maua a latou lava molimau, ma aoao i latou i auala e maua ai tali pe a i ai ni isi o a latou fesili. E pei ona faamamafaina e mataupu aoaoina a le autalavou, Sau, Mulimuli Mai Ia te A’u: Punaoa e Aoao ai mo le Autalavou, e mafai foi ona tatou valaaulia i latou e faasoa mai o latou aafiaga o le ola ai i le talalelei i o latou tupulaga o mea ua latou iloa e moni.
Sa faamatala lata mai nei e Elder Kim B. Clark, Fitugafulu Eria ma o le peresitene o le BYU–Idaho, se tala e uiga i se korama o tiakono sa latou talanoa ma lo latou faufautua e uiga i le tatalo. Sa faafuasei ona sii le lima o le peresitene o le korama a tiakono ma fai mai, “E fia fai atu lau fesili i le korama. E toafia outou e mananao e tautino e tatalo i le taeao ma le po o aso uma o lenei vaiaso?” Sa sii uma i luga lima o tagata o le korama vagana ai se alii talavou se toatasi, o lē sa le talitonu e mafai ona ia faia le lu’i. Sa saofai le faufautua ma vaavaai atu i tagata o le korama o aoao atu ma molimau atu i lo latou uso e uiga i le tatalo, ma fesoasoani ia te ia ia maua le talitonu e talia ai le lu’i.
Fesili e Mafaufau Loloto I Ai: O a ni auala ua e matauina ai faiaoga o faamalosiau atu i tagata o le vasega ia fai ni sao iloga i le aoaoina [o le talalelei]? E mafai faapefea ona e fesoasoani i le autalavou o loo outou galulue faatasi ia atiae ni faiga masani o le suesue i le talalelei? E ese mai talanoaga, o a nisi o auala e faaaofia ai le autalavou i le aoaoina o le talalelei?
Uunaia le Liua
O le liua o se faagasologa i le olaga atoa e aofia uma ai le aoaoina ma le ola i le talalelei i aso uma. E sili atu nai lo na o le iloaina o le talalelei, o le liua e “manaomia ai lo tatou faia ma ia avea ai.”3 Ina ua uma ona aoaoina Ona soo e uiga i le lotoalofa o le Samaria agalelei, sa luiina i latou e le Faaola, “Ina alu ia, ma ia faapea ona fai” (Luka 10:37). Sa ia uunaia i latou ia avea ma ni tagata e sili atu nai lo na o ni tagata e faalogo i le upu ma ia galulue ma le faatuatua i Ana aoaoga.
E ao ona tatou uunaia le autalavou ia ola maelega i le talalelei aua o le liuaina e le masani ona tupu i se taimi se tasi e aoao atu ai. O le liuaina e sili atu le taimi e tupu ai pe a malamalama le autalavou i aoaoga faavae moni ma faatulaga ni mamanu o le suesue i le talalelei ma le ola amiotonu, e pei ona tatou uunaia i latou e fai i le Sau, Mulimuli Mai Ia te A’u.
Fai mai Krista Warnick, o se peresitene o Tamaitai Talavou i le Siteki o Arapahoe Colorado, “O loo feagai le autalavou i aso nei ma se osofaiga o luitau ia ou te le’i faalogo i ai seia oo ina ua ou matua atu i le olaga. Sa ou atinaeina la’u molimau na tele lava ina ua ou aluese ma ou nofo na o a’u ma sa mafai ona ou galue ma faatino nisi o mea sa ou aoaoina i vasega a Tamaitai Talavou. O le tuuina atu i le autalavou o lu’i ma avanoa e faaaoga ai lo latou faatuatua o le a fesoasoani ia i latou ia atinae ia mea autu o a latou molimau a o talavou lava.”
O le luitau o le liua e le gata ina tatou aoao e uiga i le talalelei ae faapea foi ona tatou suia ona o mea ua tatou aoaoina. E tatau ona tatou fesoasoani i o tatou tagata talavou ia malamalama o lo latou “suiga tele” (Alema 5:14) o le loto e le faapea e mafai ona tupu i le taimi lava lena, ae o le a oo malie mai a o latou atinaeina e le aunoa ni faiga masani o le suesue, tatalo e le aunoa, ma le tausia o poloaiga. A o latou faia nei mea, o le a latou matauina o o latou manaoga, uiga, ma amioga ua suia e atagia ai le finagalo o le Tama Faalelagi.
Fesili e Mafaufau Loloto I Ai: O le a le tiute na fai e au taumafaiga o le aoao ma ola i le talalelei i lou lava liuaina? Na faapefea ona faamalosia oe e matua ma faiaoga o le Ekalesia ma taitai?
Lagolagoina o o Tatou Tagata Talavou
O le Sau, Mulimuli Mai Ia te A’u ua fai ma sui o na o se vaega o le taumafaiga e lagolago le autalavou. E faaopoopo atu i le matafaioi faitoatasi a le talavou lava ia atili liua atoatoa, “ua i ai i matua le tiutetauave autu mo le fesoasoani atu i a latou fanau ia iloa le Tama Faalelagi ma Lona Alo o Iesu Keriso.”4 O i tatou o loo galulue faatasi ma le autalavou e mafai ona lagolago atu i matua ma mulimuli i le faataitaiga a le Faaola pe a tatou saunia faaleagaga, taulai atu i manaoga o le autalavou, valaaulia i latou ia iloa upumoni o le talalelei, ma tuu atu ia i latou avanoa e galulue ai ma le faatuatua ma ia liua. A o tatou taumafai e faataitai ia Iesu Keriso, e avea i tatou ma ni tagata aoao ma ni faiaoga lelei atu, ma tatou fesoasoani i taitai o le lumanai o o tatou lotoifale ma la tatou Ekalesia ia avea i latou lava ma ni tagata aoao ma ni faiaoga mamana.
O sauniuniga faaleagaga—suesue, tatalo, ma le anapogi—e fesoasoani uma i le faiaoga ma le tagata aoao ia lagona uunaiga a le Agaga.
Keriso i Emau, saunia e Walter Rane © IRI
E fefaamalosiaua’i e le autalavou le tasi ma le isi pe a latou fefaasoaa’i o latou aafiaga o le ola ai i le talalelei.
Ata na tusia e Craig Dimond
O matua e nafa tonu lava ma le fesoasoani i a latou fanau ia iloa upumoni o le talalelei, ma ua i ai i tamaitai ma alii talavou taitoatasi se tiutetauave patino ia liua atoatoa. O taitai ma faiaoga o le autalavou e lagolagoina nei taumafaiga.
Ata na tusia e Richard Romney