A E Laveaiina se Teine, Ua E Laveaiina Augatupulaga
O o outou olaga amiomama o le a faamanuiaina ai o outou augatama, o outou aiga i le taimi nei, ma tagata o aiga o le a oo mai.
O se faamamaluga mo au le lauga atu i tamaitai talavou faamaoni o le Ekalesia. Ua matou vaaia lo outou agaigai i luma i le ala o i latou o e faamamaluina a latou feagaiga, ma ua matou iloa o outou olaga amiomama o le a faamanuiaina ai o outou augatama, o outou aiga i le taimi nei, ma tagata o aiga o le a oo mai, e pei ona saunoa Peresitene Gordon B. Hinckley, “A e laveaiina se teine, ua e laveaiina ia augatupulaga.”1
Na amata lou ala i feagaiga i le taimi na papatisoina ai oe ma e maua le meaalofa o le Agaga Paia. E faaauau i vaiaso taitasi i sauniga faamanatuga, o se nofoaga paia e te faafouina ai lau feagaiga o le papatisoga. O le taimi lenei mo oe e te sauniuni ai e osia feagaiga i le malumalu. O “sauniga paia ma feagaiga e maua i malumalu paia, e mafai ai e [i tatou] ona toe foi atu i le afioaga o le Atua ma mo [o tatou] aiga e tuufaatasia ai e faavavau.”2
Tutu i nofoaga paia mo o outou augatama. “O tagata uma e o mai i lenei lalolagi o le taunuuga lea o augatupulaga o matua. E i ai lo tatou faanaunauga masani e fesootai i o tatou augatama.”3 A o e faatinoina le talafaasolopito o aiga ma galuega i le malumalu, ua e lalagaina se sootaga i lou olaga ma olaga o ou augatama e ala i le faia o sauniga faaola mo i latou.
Ia e tu i nofoaga paia mo oe lava ma lou aiga patino. O au faataitaiga amiotonu o le a avea ma punavai o le olioli tele, tusa lava po o a ou tulaga faaleaiga. O au filifiliga amiotonu o le e agavaa ai e osia ma tausia feagaiga paia, o le a fusia faatasi ai lou aiga e faavavau.
Ia tu i nofoaga paia mo lou aiga i le lumanai. Tautino atu e faamauina i lau tane e ala i le perisitua paia i le malumalu pe a amataina le iunite o lou aiga. O le a faamanuiaina lau fanau i le upumoni pe a e atiina ae au faataitaiga mama ma le molimau e le maluelue i o latou olaga, ma faaali atu ia i latou le auala i luga o le ala o le feagaiga.
Na ou vaaia nei mataupu faavae faavavau o faaalia i le Tauvaga Faavaomalo o Faatufugaga mo le Autalavou. Sa fatuina faafuainumera e Megan Warner se galuega o le pueina o ata, e faaaoga ai se faiga faaona po nei i le faataoto a Keriso i taupou e toasefulu.4 Sa ma feiloai ma Megan, ma sa ia faamatala mai le faatusa o taupou e toasefulu, lea na faamatalaina o se tamaitai talavou o le amiomama ma le faatuatua ua saunia e osia ma tausia feagaiga o le malumalu. E faapei o taupou popoto uma, e faia lana lava tapenaga a o ia faaopoopoina le suauu i lana lamepa, e tasi le mataua i le taimi, e ala i le ola amiotonu e le aunoa. Sa ou matauina le fili manaia i lona lauulu. Sa faamatala mai e Megan o le fili o le faatusa o le lalagaina o le ola mama o lenei tamaitai talavou i tupulaga e le mafaitaulia. O le fuailauulu e tasi e faatusa i le lalagaina o lona alofa ma le faaaloalo mo ona augatama, o le lona lua o le lalagaina lea o lana uunaiga amiotonu i lona aiga o i ai nei, ma le laulu lona fa, o le lalagaina o lona olaga ua saunia i olaga o tupulaga a sau.
Sa ou feiloai i se isi tamaitai talavou o lana tapenaga vave faaleagaga ua lalagaina ai se olaga o le amiotonu i le tele o tupulaga.
I se aoauli matagofie ia Setema, sa ma i ai ma lo’u toalua i le malumalu e faatalitali le avanoa e fai ai sauniga o le malumalu. Sa ulufale atu i le potu ia Chris, o se ma uo. Sa manaia le vaai atu i lenei alii talavou, o le sa faatoa taliu mai lana misiona mai Rusia.
Toeitiiti amata le sauniga, ae saofai mai i ou autafa se tamaitai talavou lalelei. Sa susulu, matafiafia, ma sa tumu i le malamalama. Sa ou fia masani ia te ia, o lea sa vave ai ona ou faailoa atu lo’u igoa. Sa ia musumusu maia lona igoa, o Kate, ma sa ou manatuaina ai lona faaiu o se aiga sa nonofo i Michigan i le mea sa nonofo ai lo matou aiga i se taimi. O Kate o lo la afafine ua matua, ua faatoa lima vaiaso talu ona foi mai lana misiona mai Siamani.
I le taimi o le sauniga sa oo mai pea lava pea le mafaufau, “Faafeiloai Kate ia Chris.” Sa ou tuuesea lea uunaiga ma ou faapea. “Afea, i fea, faapefea?” A o ma sauni e foi, sa sau Chris e faatofa mai ma sa ou pueina loa le avanoa. Sa ou toso maia Kate ma musumusu atu i ai, “O oulua o ni talavou amiomama e tatau ona iloa e le tasi le isi.” Sa ou tuua le malumalu ua faamalieina aua sa ou faatinoina la’u uunaiga.
Ina ua ma foi, sa ma talanoa ma lo’u toalua i mea na ma manatuaina i luitau na feagai ma le aiga o Kate. Ua sili atu lo’u iloa o Kate, ma sa ia fesoasoani ia ou malamalama i mafuaaga o lona matafiafia sa ou vaai i ai i le malumalu i lena aso.
Sa taumafai pea lava pea Kate e tumau i le ala o ana feagaiga e ala i le sailia o nofoaga paia. Sa ola ae o ia i se aiga e fai afiafi faaleaiga, tatalo faatasi, ma suesue tusitusiga paia ma avea ai lona aiga ma nofoaga paia. A o laitiiti o ia, sa ia aoao e uiga i le malumalu, ma o le pese, “Ou Te Fia Vaai i se Malumalu” o se pese sili lea mo afiafi faaleaiga.5 A o teineitiiti, sa ia matauina ona matua o faia se faataitaiga o le sailia o se nofoaga paia a o la malaga i le malumalu i se afiafi o le faaiuga o le vaiaso, nai lo le o i se tifaga pe o e aai i se faleaiga.
Sa matua alofa tele o ia i lona tama, ma sa faaaoga e [lona tama] lana pule o le perisitua e fesoasoani ai ia [Kate] e faia ana uluai feagaiga o le papatisoga. Ona faaee atu lea o lima i luga o lona ulu ma mauaina le Agaga Paia. Fai mai Kate, “Sa ou fiafia lava e maua le Agaga Paia, ma sa ou iloaina o le a fesoasoani ou te tumau ai i luga o le ala i le ola e faavavau.”
Sa faaauau pea le olaga o Kate i se ala manuia ma le fiafia. Ina ua 14 ona tausaga, sa amata lana aoga maualuga ma sa fiafia i le seminare, o se isi nofoaga paia e aoao ai e uiga i le talalelei. I se tasi aso, sa amata ona talanoa lona faiaoga e uiga i tofotofoga ma sa ia faamautinoa atu tatou te oo uma lava i ai. Sa ia faapea ifo ia te ia lava, “Ou te le manao i ni tofotofoga; ou te le fia faalogo i ai.”
Sa na o ni nai vaiaso mulimuli ane ae ala a’e lona tama i le Aso Sa o le Eseta ua matua ma’i tigaina lava. Fai mai Kate: “O lo’u tama o se tagata ola maloloina; o se tagata tamo’e marafoni. Sa popole tele lo’u tina i le tigaina ma o lea na ave ai o ia i le falemai. E lei atoa se 36 itula ae pe atoa le tele o lona tino. Sa mafai ona emoemo ona mata, ae sa le aoga lona tino atoa. Ou te manatua le vaai atu ia te ia ma mafaufau, ‘Auoi, ua tupu. Ua sa’o lava lo’u faiaoga seminare. Ua oo mai so’u tofotofoga.’” E lei umi ni aso, ae maliu le tama o Kate.
Na faaauau le tala a Kate: “Sa ese le faigata. E te le manao e leiloa atu le toa o lou olaga. Sa ou iloaina e mafai ona avea o se mea e fesoasoani ai ia ou tuputupu ae pe avea foi o se maagao. Ou te lei manao e avea o ia ma mea e faaleagaina ai lo’u olaga aua faatoa 14 o’u tausaga. Sa ou taumafai ou te latalata i le Alii i le mea sili e mafai ai. Sa faatele ona ou faitauina au tusitusiga paia. Sa faamautinoa mai e le Alema mataupu e 40 ia te au, e moni le toetutu ma o le Togiola a Keriso e mafai ai ona ma toe mafuta ma lo’u tama. Sa faatele ona ou tatalo. Sa ou tusitusi i la’u api talaaga i le tele sa ou mafaia. Sa ou faaolaolaina la’u molimau i lo’u tusia lea i lalo. Sa ou alu i le lotu ma i Tamaitai Talavou i vaiaso uma. Sa vagaia a’u lava e ni uo lelei. Sa ou mafuta vavalalata ma o’u aiga alolofa aemaise i lo’u tina, o le taula lea i lo’u aiga. Sa ou sailia faamanuiaga faaleperisitua mai lo’u tamamatua ma isi e umia le perisitua.”
O nei filifiliga faifai pea, e faapei o na taupou popoto, na faaopoopo ai le suauu i le lamepa a Kate. Sa faaosofia o ia e lona manao e toe mafuta ma lona tama. Sa iloa e Kate na iloa lelei e lona tama ana filifiliga, ma sa le manao o ia e faaita lona tama. Sa manao o ia i se sootaga e faavavau ma ia, ma sa malamalama o ia o lona tumau ai i luga o le ala o feagaiga o le a lalagaina ai faatasi lona olaga ma lona tama.
Peitai, e lei uma ai tofotofoga. Ina ua 21 tausaga o Kate ma ua auina atu ona pepa o le misiona, sa maua lona tina i le kanesa. Sa tatau ia Kate ona faia se faaiuga taua i lona olaga. Pe o le a nofo i le fale e tausi lona tina pe alu i lana misiona? Sa tuuina atu i lona tina se faamanuiaga faaleperisitua ma folafola atu ai o le a ola o ia mai le ma’i. I le faamautinoa ai e lenei faamanuiaga, na alu ai Kate ma le faatuatua ma faaauau ai ana fuafuaga e faamisiona.
Fai mai Kate: “Sa ou laa tautoai i le pogisa, ae a o ou i ai i la’u misiona, sa oo mai le malamalama ma sa ou mauaina ai se tala fiafia ua moni lava le faamanuiaga a lo’u tina. Sa ou matua fiafia lava ona ou te lei toloina le auauna atu i le Alii. A oo mai mea faigata, ou te manatu e faigofie ona taofia le agai i luma, ma faalē i ai se manao e agai i luma, ae a e faamuamua le Alii, e mafai e mafatiaga ona taitai atu i faamanuiaga matagofie. E mafai ona e vaai i Lona aao ma molimauina vavega.” Ua iloa e Kate le moni o upu a Peresitene Thomas S. Monson: “O o tatou avanoa aupito taua o le a maua i taimi o faigata aupito ogaoga.”6
Ua ia Kate lenei ituaiga o faatuatua aua sa malamalama o ia i le ata o le faaolataga. Sa ia iloa sa tatou ola muamua, o le lalolagi o se taimi lea o tofotofoga, ma o le a tatou toe ola foi. Sa i ai lona faatuatua o le a faamanuiaina lona tina, ae mai le mea na tupu i lona tama, sa ia iloa a na fai e maliu lona tina, o le a le afaina. Fai mai a ia: “Sa lē na ona ou lavātia le maliu o lo’u tama, ae na avea o se vaega o lo’u faasinomaga mo le lelei, ma a na faapea foi e ave lo’u tina, semanu o le mea lava e tasi. E lalagaina ai se molimau sili atu i lo’u olaga.”7
Sa sailia e Kate se nofoaga paia i le po na ou feiloai ai ia te ia i le malumalu. O le manao e lalagaina ia maopo lelei ia sootaga o le faavavau lea e maua mai i sauniga o le malumalu, ae sa ia mulimuli i le mamanu na faatuina e ona matua o le ō pea lava e le aunoa i le malumalu.
E leai se mea tele na tupu i le po sa ou faafeiloai atu ai Kate ia Chris, ae i le sailia o se isi nofoaga paia i le Aso Sa na sosoo ai, sa vaai ai Kate ia Chris i le fiaselau o talavou nofofua matutua i se faigalotu a le inisitituti. O iina na iloa atili ai e le tasi le isi. I nai vaiaso mulimuli ane, sa valaaulia ai e Chris ia [Kate] la te matamata i le konafesi aoao. Sa faaauau pea le sailiga o nofoaga e valaaulia ai le Agaga i le gasologa o la la’ua faamasaniga ma sa iu ai ina faamauina i la’ua i le malumalu, o le nofoaga paia lea sa la faatoa feiloai ai. Ua taufai faataunuuina nei e i la’ua le tiutetauave paia faamātua, ma lalagaina ai a la’ua molimau o le ata o le faaolataga i olaga o se fanau tama laiti e toatolu, e faaali atu ai ia te i latou le auala e agai atu i le ala o feagaiga.
“A e laveaiina se teine, ua e laveaiina augatupulaga.” O le faaiuga a Kate o se 14 tausaga le matua e tumau i luga o le ala, ua faaopoopo ai pea e le aunoa le suauu i lana lamepa, ma o le tu ai i nofoaga paia ua ma o le a laveaiina ai augatupulaga. O le sailia o ona augatama ma le auauna atu i le malumalu ua lalagaina ai faatasi lona loto ma i latou. O le faatinoina o talafaasolopito o aiga ma galuega o le malumalu, o le a faapena foi ona lalagaina ai faatasi o outou loto ma avatu ai i o outou augatama le avanoa mo le ola e faavavau.
O le ola ai i le talalelei i lou aiga o le a faaopoopo ai foi le suauu i lau lamepa ma lalagaina ai le malosi faaleagaga i lou aiga i le taimi nei ma faamanuiaina ai lou aiga i le lumanai i ni auala e le mafaitaulia. E le gata i lena, e pei ona saunoa Elder Robert D. Hales, “Afai e le lelei le faataitaiga na tatou maua mai i o tatou matua, o lo tatou tiutetauave le faia o se suiga … ma aoao atu agaifanua sa’o mo augatupulaga e mulimuli mai.”8
Fai nei a outou faaiuga e faia mea uma tou te mafaia e faatutumu ai a outou lamepa, ia mafai ona lalagaina lau molimau malosi ma faataitaiga i olaga o le tele o augatupulaga ua mavae, i le taimi nei, ma le lumanai. Ou te molimau atu o lou olaga amiomama o le a le gata ina laveaiina ai augatupulaga, ae o le a faasaoina ai foi lou ola e faavavau, aua ona pau lea o le ala e toe foi atu ai i lo tatou Tama i le Lagi ma maua ai le olioli moni i le taimi nei ma le faavavau atoa. I le suafa o Iesu Keriso, amene.