Elder Arnulfo Valenzuela

O Le Fitugafulu

Sa soifua ae Elder Arnulfo Valenzuela i aai Mamona i Chihuahua, Mekisiko, ma sa faauu mai le aoga a le Ekalesia, le Academia Juárez. Sa ia mauaina i lona tamaitiiti ni avanoa taua sa gafataulimaina ina ia aoaoina e alii ma tamaitai faamaoni o e sa tuuto atu i le talalelei ma le auauna atu i le Alii.

O lesona sa aoaoina i lena nofoaga lauiloa o le Ekalesia i Amerika Latina o le a aoga tele ia te ia ao ia amatalia ona tiute o se uso o le Korama Muamua a Fitugafulu.

“Ua matuai ou lagonaina lava le faamanuiaina i lenei valaauga e auauna atu i le Alii i se tulaga tumau,” sa ia saunoa ai.

Sa soifua mai ia Me 1959 ia Gilberto ma Rosa Valenzuela, ma sa tosina ai lava Arnulfo ao talavou i auaunaga faale-Ekalesia. I le 19 o tausaga na ia taliaina ai se valaauga i le Misiona a Mexico Veracruz. I lena itulagi mataina o Mekisiko sa ia iloaina ai le faamalieina o le galuega o le talalelei i aso taitasi ma le olioli o le valaauliaina o isi ia Keriso.

E lei leva ona maea lana misiona, ae ia asiasi atu i se aiga na ia papatisoina lea na mulimuli ane masii atu i le Aai o Mekisiko. O le tuaoi o le aiga lea, o Pillar Porras, o se tamaitai faamaoni na liliu mai i le Ekalesia. Sa oo ina faauo ia Arnulfo ma Pilar ma e lei pine ae amata ona tafafao faamasani. Sa la faaipoipo i le Malumalu o Mesa Arizona i le aso 6 Aperila, 1982, i le taimi lea sa leai ai ni malumalu i lo la atunuu moni.

O loo la tausia se fanau e toatolu, ma faaauau pea ona auauna atu i le Ekalesia ao la vaavaai atu i le avea o Mekisiko ma se malo o malumalu. “Sa lei mafai ona matou mafaufauina o le a i ai ni malumalu se 12 i Mekisiko, faatasi ai ma le isi tasi o loo fausiaina,” sa ia saunoa ai.

I lona taimi sa auauna ai o se epikopo, se fesoasoani i se au peresitene o se siteki ma se misiona, ma se Fitugafulu Eria, sa molimauina ai lava e Elder Valenzuela le tuuto ofoofogia o tagata le mafaitaulia o Mekisiko o loo naunau e tuu atu mea uma latou te maua i le galuega a le Alii.

I le avea ai ma se tasi na faauu mai i le Mexico City’s University of Accounting and Administration Studies, sa faigaluega ai Elder Valenzuela i tofiga faalepulega mo kamupani faavaomalo.