O le Konafesi Aoao Lona 183 ua Aofia ai le Lagolagoina o le Au Peresitene Aoao Fou o Tamaitai Talavou

“Ua ootia o tatou loto,” sa saunoa ai Peresitene Thomas S. Monson i le sauniga faaiu o le Konafesi Aoao Faaletausaga Lona 183 i le aso 7 Aperila, 2013, “ma ua faamalolosia a tatou molimau i lenei galuega paia a o tatou lagonaina le Agaga o le Alii. Tau ina ia tatou manatua pea mea na tatou faalogo ai i nei aso e lua ua mavae.”

E Mafai Ona E Fesoasoani

Sa uunaia uma e Peresitene Thomas S. Monson ma Elder Russell M. Nelson o le Korama a Aposetolo e Toasefululua ia tagata o le ekalesia ia saofaga atu i le Tupe mo Faifeautalai Lautele. E mai le aso 4 Aperila, 2013, ua oo atu i le 65,634 faifeautalai faamisiona o loo auauna atu, ma le silia i le 20,000 isi ua maua valaauga.

I le sauniga amata o le konafesi aoao, sa saunoa ai Peresitene Monson e faapea, “Ina ia fesoasoani e faatumauina lenei ‘au o faifeautalai, ma ona o le toatele o o tatou faifeautalai e o mai i tulaga lē mautu lelei, o lea matou te valaaulia ai outou, pe a mafai ai, ia saofagā ma le limafoai i le Tupe Lautele mo Faifeautalai a le Ekalesia.”

E mafai ona foai atu tagata o le ekalesia e faaaoga ai le pepa foai o le sefuluai ma tusi le aofaiga latou te finagalo e foai atu i lalo o le Tupe mo Faifeautalai Lautele. E mafai foi ona foai atu tagata o le ekalesia e ala initoneti i le ldsphilanthropies.org.

E silia ma le 100,000 tagata na auai i sauniga e lima o le konafesi aoao i le Maota Autu mo Konafesi i le Aai o Sate Leki, Iuta, ISA, i le aso 6 ma le aso 7 Aperila. E faitau miliona isi i le lalolagi atoa sa maimoaina pe faalogologo foi e ala i TV, leitio, ma faasalalauga i le Initoneti. I va o faasalalauga tuusao ma vitio i luga o le initoneti, otio, ma tusiga o le konafesi i le LDS.org, sa mafai ai e tagata o le ekalesia ona maua le konafesi i gagana e 95.

Sa tatalaina e Peresitene Monson le konafesi faaletausaga i le faasilasilaina mai lea o fuafuaga e fausia ni malumalu i Cedar City, Iuta, ISA, ma Rio de Janeiro, Pasila—ua maua ai le aofaiga o malumalu ua faasilasila mai pe o loo fausiaina i le 29. O le taimi nei, e 141 malumalu o loo faaaogaina.

Sa faia ni suiga i le taitaiga o le Ekalesia i le taimi o le sauniga o le aoauli o le Aso Toonai. Sa faamalolo uma sui o le au peresitene aoao o Tamaitai Talavou, ma Elder Walter F. González sa faamalolo mai o se uso o le Au Peresitene o Fitugafulu. Sa faamaloloina ai foi Fitugafulu Eria e lima sefulutasi.

Sa lagolagoina ia Elder Ulisses Soares o le Korama Muamua a Fitugafulu e avea ma uso o le Au Peresitene o Fitugafulu.

Sa lagolagoina e avea ma au peresitene aoao fou o Tamaitai Talavou ia Bonnie Lee Green Oscarson, peresitene; Carol Foley McConkie, fesoasoani muamua; ma Neill Foote Marriott, fesoasoani lua.

Sa lagolagoina ai foi uso fou o le Korama Muamua a Fitugafulu: Elder Edward Dube o Zimbabwe; Elder S. Gifford Nielsen o Sugar Land, Texas, ISA; ma Elder Arnulfo Valenzuela o Queretaro, Mekisiko. Sa lagolagoina ai foi uso fou e toalima o le Korama Lua a Fitugafulu:

O Elaine S. Dalton, o le sa avea ma peresitene aoao o Tamaitai Talavou, na auauna atu i le au peresitene aoao o Tamaitai Talavou, o se fesoasoani pe ma se peresitene mo tausaga e 11 a o lei faamaloloina ia Aperila.

Tagai i le lisi atoa o le lagolagoina ma le faamaloloina mai valaauga i le itulau e 26.

Sue i talaaga o soifuaga o taitai fou ua valaauina e amata atu i le itulau e 139.