Neill F. Marriott

Fesoasoani Lua i le Au Peresitene Aoao o Tamaitai Talavou

E ui sa lei auai o ia i le Ekalesia, ae sa aoao lava Neill Foote Marriott ao teine talavou e faapea o loo i ai se Atua ma e alofa o Ia ia te ia.

“O lou tama o se mamanu o lo tatou Tama Faalelagi,” sa saunoa ai le fesoasoani lua fou o le au peresitene aoao o Tamaitai Talavou. “O lona alofa ma le taliaina o isi sa le faatuaoia. Sa o se fesiitaiga faigofie o le alofa ma le faatuatuaina sa ou maua mo lou tama faalelalolagi e faatuatuaina ma alofa ai i lou Tama Faalelagi.”

Sa soifua mai ia George ma Antonia Foote ia Oketopa 1947 i Alexandria, Louisiana, ISA, ma sa na o ia lava le tuafafine i tuagane laiti e toaono. Ina ua faauu mai le Iunivesite o Southern Methodist i Dallas, Texas, ma se faailoga i aoaoga faaPeretania ma aoga maualuga, sa ia masii atu ai i Cambridge, Massachusetts, lea sa faigaluega ai o se failautusi i le Iunivesite o Harvard. O iina sa ia feiloai ai ia David Cannon Marriott, lea sa fai atu ia te ia, “E i ai ni au uo ou te manao e te feiloai i ai.” Sa vave ona ia aumaia faifeautalai e aoao o ia ma ana uo sa latou potu faatasi.

Ao ia faalogo atu i faifeautalai, sa ia fai atu, “ua faatumuina e lesona ia fasi mea sa misi mai lou malamalama o le talalelei.” Ina ua mavae lona papatisoga ia Me 1970, sa la faauo pea ma David; ina ua mavae se tausaga na amata loa ona la faamasani ma faaipoipo ai ia Iuni 1971 i le Malumalu o Sate Leki.

I le galulue faatasi ai ma lona toalua, sa nofo ai Sister Marriott i le fale faatasi ma le la fanau e toasefulutasi ao tuliloaina e lona toalua se matata faalegaluega i mea tau pisinisi. Sa la galulue i le tele o valaauga a le Ekalesia. Sa ia auauna atu faatasi ma ia ao pulefaamalumalu lona toalua i le Misiona a São Paulo Interlagos mai le 2002 i le 2005, ma sa ia auauna atu o se fai sauniga i le Malumalu o Sate Leki, o se peresitene o le Aualofa i le uarota ma le siteki, o se peresitene o Tamaitai Talavou i le uarota, o se faiaoga o Aoaoga Faavae o le Talalelei, ma se tagata tomai faapitoa mo le teuina o meaai.

I lona tofiga fou, ua faamoemoe ai Sister Marriott e faasoa atu le molimau lava lea e tasi na ia mauaina ao tamaitai talavou. E manao o ia ia iloa e tamaitai talavou “e alofa lo latou Tama Faalelagi ia i latou i se alofa aupito sili ona loloto ma faamamaluina.”