Maliu Elder Eldred G. Smith i le 106 Tausaga
O Elder Eldred G. Smith, o le sa auauna atu o se Peteriaka o le Ekalesia mai le 1947 i le 1979, na maliu i le aso 4 o Aperila, 2013, i lona aiga. Ua 106 ona tausaga.
E talitonuina o le tamalii aupito matua lea i Iuta, ua umi atu ai le soifua o Elder Smith nai lo se isi lava tagata na avea muamua ma se Pulega Aoao.
Sa asiasi atu Peresitene Thomas S. Monson ia Elder Smith i lona aso fanau, 9 o Ianuari, 2013. “O Elder Smith o sa’u uo lelei lava,” sa saunoa ai Peresitene Monson. “Sa tele ni maila na ma faimalaga faatasi ai. Ou te alofa ma faaaloalo i lenei tamalii.”
Sa valaauina Eldred G. Smith o se Peteriaka i le Ekalesia i le aso 10 Aperila, 1947, e Peresitene Siaosi Alapati Samita le sa avea ma Peresitene o le Ekalesia i lena taimi ma o ia le tagata mulimuli na umia lea tofiga. Sa faamaloloina o ia ma le mamalu i le 1979. O le tofiga lea sa amatalia mai le 1833 lea na valaauina ai Iosefa Samita le Matua, le tuaa o le Perofeta o Iosefa Samita. O Elder Smith o le tupulaga lona fa (great-great-grandson) o Ailama, le uso o le Perofeta.
I le taimi o lana auaunaga o se Peteriaka o le Ekalesia, sa malaga ai Elder Smith i le tele o eria o le lalolagi ma tuuina atu le tele o faamanuiaga faapeteriaka i nofoaga sa leai ai se peteriaka. I le 1966 sa ia faimalaga ai faatasi ma Elder Monson i Ausetalia ma Samoa e tuuina atu faamanuiaga faapeteriaka i tagata o le ekalesia iina. O se taimi muamua lea sa asia ai e se peteriaka pulefaamalumalu ia Samoa. O aso nei ua i ai lava i le tele o siteki se peteriaka e alala i totonu o le siteki.
Sa saunoa uma ia Peresitene Monson ma Elder M. Russell Ballard o le Korama a Aposetolo e Toasefululua i le falelauasiga o Elder Smith. Sa faitauina e Peresitene Monson se tusi o faamaisega i le aiga mai le Au Peresitene Sili, ona ia faaopoopo atu lea, “Mo se taimi le tumau, ua ma valavala ai ma se uo lelei.”
O Elder Ballard, o ia foi o se tasi o le tupulaga lona fa (great-great-grandson) a Ailama Samita, na saunoa i saofaga a Elder Smith i le faatumauina o le ola o le talafaasolopito o lo latou aiga. “Matou te patipatia o ia o se Peteriaka i le Ekalesia ma se peteriaka o lo matou aiga lautele,” sa ia saunoa ai. Sa ia faaopoopo mai e faapea na ia iloaina sa lagonaina e Elder Smith o le mea aupito sili na ia ausiaina o lona aiga.
Sa faaipoipo atu Eldred Smith ia Jeanne Audrey Ness i le 1932; e toalima le la fanau. Ina ua mavae le maliu o Jeanne ia Iuni 1977, sa ia faaipoipo atu ia Hortense Child; o le taimi lena sa avea ai Hortense ma se fesoasoani i le au peresitene aoao o Tamaitai Talavou. Sa maliu o ia i le 2012.
O loo soifua nei ia atalii e toalua ma afafine e toalua o Elder Smith (o le isi afafine ua maliu), e 22 fanau a fanau (e toalua isi ua maliliu), 63 fanau a fanau a fanau, ma le 22 o fanau a fanau a fanau a fanau.
Sa i ai se sao o Gerry Avant i lenei tusiga.
O Peresitene Thomas S. Monson, taumatau, o loo asiasi atu ia Elder Eldred G. Smith, le sa auauna atu o se Peteriaka i le Ekalesia mai le 1947 i le 1979, i lona aso fanau lona 106, i le aso 9 Ianuari, 2013. Sa maliu Elder Smith i le aso 4 Aperila i lona aiga.
Ata na pue e Gerry Avant, Church News