Bonnie L. Oscarson

Peresitene Aoao o Tamaitai Talavou

Ao auauna atu ai o se faatina i le Malumalu o Stockholm Sweden mai le 2009 i le 2012, sa vaaia ai e Bonnie Lee Green Oscarson le ositaulaga o le Au Paia o Aso e Gata Ai mai Suetena, Nouei, ma Lativia ina ia tapuai i le maota o le Alii.

Peitai, na te lei iloaina i lena taimi, o lesona sa ia aoaoina mai nei tagata “lotomaualalalo tele, ma matuai tuuto ma faamaoni” o le a fesoasoani e faatonutonu lana taulaiga o le peresitene aoao o Tamaitai Talavou o le Ekalesia.

“Talu ai ua toatele tamaitai talavou ua filifili nei e auauna atu faamisiona ma auai i le malumalu i se tausaga talavou, ou te faamoemoe ai o lo’u aafiaga i le galue ai i le malumalu o le a fesoasoani ia te au ia malamalama i le auala e fesoasoani ai ia i latou ia saunia,” sa ia saunoa ai.

Sa soifua mai Bonnie Lee Green ia Oketopa 1950 i le Aai o Sate Leki ia Theo James ma Jean S. Green. Ina ua filifili ona matua la te mananao i le la fanau ina ia lagonaina aafiaga o le Ekalesia i fafo mai o Iuta, o lea na masii atu ai Bonnie e iva tausaga ma lona aiga i Oklahoma, ISA. Sa faaalu foi se taimi o le aiga i Colorado ma Tennessee ao lei masii atu i Misuri, lea sa feiloai ai Bonnie ma Paul Kent Oscarson i Fa Uesi, Misuri, i le lotoa o le malumalu—o se nofoaga taua ona sa i ai uma o la aiga na nonofo i le eria o Fa Uesi.

Ina ua maea le aoga i le Iunivesite o Polika Iaga, sa faaipoipo loa le ulugalii i le aso 9 Tesema, 1969, i le Malumalu o Sate Leki; e toafitu tamaiti na mulimuli ane maua i le aiga.

Sa na o le 25 tausaga le matua o Sister Oscarson ae valaauina lona toalua—o le sa faamisiona i le Misiona a Suetena mai le 1965 i le 1968—e pulefaamalumalu i le Misiona a Sweden Göteborg.

Ina ua toe foi atu le Au Oscarson i le Iunaite Setete, sa latou nonofo i Misuri, New Jersey, Massachusetts, ma Texas, lea sa faigaluega ai Uso Oscarson o se sui peresitene o le faleoloa tele faaleitulagi. E pei foi o ona matua, sa maua e Sister Oscarson le olioli tele i le ola ai i nofoaga e toalaiti tagata o le Ekalesia e i ai.

E faatolu ona avea Sister Oscarson ma peresitene o Tamaitai Talavou, o se faiaoga seminare i le vaveao mo le iva tausaga, ma se faiaoga o Aoaoga Faavae o le Talalelei.