O o Outou Nofoaga Paia

Saunia e Ann M. Dibb

Fesoasoani Lua i le Au Peresitene Aoao o Tamaitai Talavou

E tusa po o [o outou nofoaga paia] e faaletino po o ni taimi faapitoa e le faagaloina, e tutusa lava le paia ma i ai le mana malosi maoae.

O le autu o le Mutuale i le 2013 o loo maua i le vaega e 87 o le Mataupu Faavae ma Feagaiga. O loo maua lenei faatonuga i vaega eseese e tolu; e manino lava le taua o le apoapoaiga. O loo faamatala mai ai le auala e mafai ai ona tatou maua le puipuiga, malosi, ma le filemu i taimi o le le mautonu. O le faatonuga musuia o le, ia “tutu i nofoaga paia, ma aua le masii ese.”¹

A o o’u mafaufau loloto i lenei autu, sa leai se mea na mafai ona ou faia ae mafaufau pe “o a ‘nofoaga paia’ o loo faatatau i ai le Tama Faalelagi?” Na fautua mai Peresitene Ezra Taft Benson, “O nofoaga paia e aofia ai o tatou malumalu, o tatou faletatalo, o tatou fale, ma siteki o Siona … ‘mo se puipuiga, ma mo se sulufaiga.’”² E faaopoopo atu i ai, ou te talitonu e mafai taitoatasi e i tatou ona maua nisi nofoaga e tele atu. E mafai ona tatou mafaufau muamua i le upu nofoaga o se siosiomaga faaletino po o se nofoaga faafaafanua. Peitai, o se nofoaga e mafai foi ona avea “o se tulaga uiga ese, tofiga, po o se tulaga o le mafaufau e iloa lelei le ese mai i se mea talitutusa faapena.”³ O le uiga o lenei mea o nofoaga paia e mafai foi ona aofia ai taimi e tutupu ai ni mea e le mafaagaloina—taimi e molimau mai ai le Agaga Paia ia i tatou, taimi tatou te lagona ai le alofa o le Tama Faalelagi, po o taimi pe a tatou maua se tali i a tatou tatalo. Ae maise, ou te talitonu o soo se taimi e te maua ai le lototele e tu atu ai mo le mea sa’o, ae maise lava i tulaga ia pe a leai se isi e manao e faia lena mea, e te fatuina ai se nofoaga paia.

I le soifuaga puupuu ae matagofie o Iosefa Samita, sa “[tu] moni o ia i nofoaga paia” ma sa le masii ese o ia. A o talavou lava, sa popole o ia i le vevesi o mea taulotu i lona nuu ma sa manao ai e iloa po o le fea o lotu uma e sa’o. O le itu togavaoa e lata i lona fale na avea ma se nofoaga paia a o ia tootuli ai i lalo o laau ma tuuina atu lana uluai tatalo leotele. Sa tali mai lana tatalo, ma o le taimi nei e ta’ua e le Au Paia o Aso e Gata Ai lenei togavao o le Vao Paia.

E tutu tamaitai talavou i le lalolagi atoa i nofoaga paia o le natura, i tolauapiga a Tamaitai Talavou. Na faasoa mai ia te a’u e se tasi o taitai o Tamaitai Talavou le tala i se aafiaga o se tasi o tamaitai talavou. O le tamaitai sa le toaga i le lotu, sa tau le talitonu o ia i le maua o se aafiaga faaleagaga i le togavao. O le aso muamua, sa ia lipoti atu ai i le taitai, “Ua ou maua se taimi sili ona manaia, ae pe mafai ona aua nei o tatou talanoa e uiga i le Agaga? Ua ou sau iinei e tolauapi, fiafia i mea o le natura, mafuta ma au uo, ma fai ni mea malie!” Ae peitai, i le faaiuga o se lotu molimau sa tagi lenei lava tamaitai ma tautino mai, “Ua ou le fia alu i le fale. E faapefea ona ou maua le lagona e pei ona ou lagonaina nei, lenei Agaga, i totonu ia te a’u i taimi uma?” Ua ia maua se nofoaga paia.

O le isi nofoaga paia i le soifuaga o Iosefa Samita o lona lava potumoe. Atonu e faigata ona talitonuina lenei mea, aua e pei o le toatele o outou, sa potumoe faatasi ma nai ona tei. Ua avea ma se nofoaga paia ina ua ia tatalo ma le faatuatua tele ma le lotomaualalo, ma le manaomia. Na ia faamatala mai, “Ina ua mavae ona ou malolo atu i lo’u moega i le po, na ou tatalo ma aioi atu ai i le Atua Malosi Aoao mo se faamagaloga o a’u agasala uma ma sese.”⁴ Na le faigofie le tolu tausaga na te’a atu talu ona maua e Iosefa le faaaliga i le Vao Paia. Na onosaia e Iosefa e sefulufitu tausaga le matua ia tauemuga, taufaifaiga, ma taufaamata’u e le uma. Ae o le po lena i le potumoe o Iosefa, sa faaali ane ai le agelu o Moronae o le tali i ana aioiga. Na maua e Iosefa le malamalama, ma le faamafanafanaga. I lena po, sa avea lona potumoe ma se nofoaga paia.

A o o’u matamata i se vitio o Savali faaMamona mo le Autalavou na ou molimauina ai se isi potumoe na avea ma se nofoaga paia. O loo faaalia i le vitio ia Ingrid Delgado, o se tamaitai talavou mai El Salvador, o loo faasoa mai ona lagona e uiga i le malumalu. Fai mai o ia, “Ua manaia le iloaina ua i ai se nofoaga e mafai ona matou o ese atu i ai mai mea o le lalolagi ma maua sauniga paia ma fesoasoani ia i latou o e e le mafai ona mauaina i lenei olaga.” A o tautala o ia, e faaali mai i le vitio ia Ingrid o loo faitau ana tusitusiga paia, e siomia i Ata faaMamona, upusii, mau, o se tusi o le Alualu i Luma o le Tagata Lava Ia, ata o lona aiga ma le malumalu, ma ioe, ma ana manu utuvavae e sili ona fiafia i ai.⁵ Atonu na te le o iloaina, ae ua ia fatuina sona nofoaga paia e aluese atu i ai mai mea o le lalolagi. Faamata ua fia ni taimi ua faitauina ai e Ingrid ana tusitusiga paia, lagonaina le Agaga, ma maua tali i ana tatalo i totonu o lona nofoaga paia.

Peitai o le isi nofoaga paia e le’i mafaufauina i le soifuaga o Iosefa Samita o le Falepuipui i Liperate. Na saunoa Elder Jeffrey R. Holland, “Na leai se isi taimi na sili atu ona faigata i le soifuaga o Iosefa nai lo o lenei faafalepuipuiga faalealofa, lē faatulafonoina, ma le le tauamiotonuina.” Na faaauau ona faamalamalama mai e Elder Holland e faapea, o le Falepuipui i Liperate ua faatatau atu i ai o se “falepuipui-malumalu” ona o aafiaga paia na maua e le Perofeta o Iosefa Samita iina.⁶

O nisi o outou tamaitai talavou atonu o feagai ma o outou lava Falepuipui i Liperate, se nofoaga o loo e feagai ai ma le faalumaina, se nofoaga o loo e lagona ai le leai o se alofa agalelei, se nofoaga o loo ulagia, faamata’uina, ia pe faamanualia faaletino ai oe. Ia te outou tamaitai talavou, ou te tuuina atu upu a Elder Holland: “E mafai ona e maua aafiaga paia, faa-talifaaaliga, maoae faatasi ma le Alii i aafiaga e sili ona le lelei o lou olaga … , a o onosaia faiga le amiotonu e sili ona tiga, pe a feagai ma mea faigata ma le tetee lea e foliga mai e le mafai ona faatoilaloina nai lo o soo se mea ua e oo i ai.”⁷ I se isi faaupuga, e pei foi o le Perofeta o Iosefa Samita, e mafai ona e fatuina ma tu ai i nofoaga paia, e oo lava i taimi e sili ona faigata e te oo i ai.

Sa faasoa mai e se tamaitai talavou matua, o Kirsten, sana aafiaga tiga. O le aoga Maualuga sa avea ma ona Falepuipui o Liperate. Ae ui i lea, o le potu faaili na maua ai se malutaga. Fai mai a ia: “A ou laa atu i totonu o lenei potu, na pei lava na ou laa atu i totonu o se nofoaga saogalemu. Na leai ni faamatalaga faalumaluma pe faalealofa, leai ni upu masoa. Ae, matou te faalogoina ai upu faamalosiau ma le alofa. Sa matou faataitaia le agalelei. Sa o se nofoaga fiafia. Sa tumu le potu faaili i le Agaga a o matou faataitaia ma faatinoina musika. Na faapena le potu ona o faatosinaga a le taitai faaili. O ia o se tamalii Kerisiano lelei. O le toe tepa ai i tua, o le aoga maualuga sa o se nofoaga faamama. Na faigata, ae sa ou aoaoina ai auala lelei e tali atu ai i faigata. O le a faavavau pea ona ou faafetai mo lo’u sulufaiga, lo’u nofoaga paia, le potu faaili.”⁸

I le afiafi nei, pe na e manatunatu i ou nofoaga paia? Na ou talosaga atu i le faitau selau o tamaitai talavou e faasoa mai ia te a’u e uiga i o latou nofoaga paia. E tusa pe faaletino po o ni taimi faapitoa e le faagaloina, e tutusa lava le paia ma i ai le mana malosi maoae. O a latou tali faagaeetia nei e iva:

Muamua: “Sa ou i ai i le falemai, ma siiina lo’u tuagane o se pepe fou.”
Lua: “O taimi taitasi ou te faitauina ai lo’u faamanuiaga faapeteriaka, ou te lagona e pei e iloa ma alofaina a’u e lo’u Tama Faalelagi.”
Tolu: “O le aso na atoa ai lou 12, na teuteu ai e tamaitai talavou o le uarota le faitotoa o lou potu i ni pepa fatu.⁹ Sa ou lagonaina le alofa, taliaina, ma le fiafia!”
Fa: “A o faitau a’u tusitusiga paia i se tasi aso, sa ‘matilatila le taua’ o se fuaitau. Sa ou mauaina se tali i a’u tatalo.”
Lima: “Sa ou savali atu i totonu o se patī sa inupia ai tagata ma auai i isi gaoioiga le talafeagai. Na ta’u mai e le Agaga ia ou toe liliu ma toe foi atu i le fale. Sa ou faia, ma ioe sa i ai ni ‘taunuuga faaleagafesootai.’ Ae peitai, o le taimi lena na ou maua ai le to’a sa ou manaomia e iloa ai e mafai ona ou ola i le talalelei.”
Ono: “I le taimi o le faamanatuga, sa ou mafaufau i le Togiola. Sa ou iloa ai e tatau ona ou faamagalo atu i se tasi sa ou ita i ai. O lo’u filifili e faamagalo atu sa o se faatinoga lelei o le a aumai ai le Togiola i lo’u olaga i aso uma.”
Fitu: “Ina ua maea le Amataga Fou sa ma auai atu i ai ma lo’u tina, sa sogi mai o ia i lo’u alafau, ma fai mai e alofa ia te a’u. O le taimi muamua lea ou te manatuaina ua ia faia ai se mea faapea.”
Valu: “Faatasi ai ma se faamautinoaga mai lou epikopo, sa ou iloa ai o folafolaga sa ou maua i tusitusiga paia e moni: ‘E ui lava ina pei o ofu mumu a outou agasala, e sisina ia e pei o le kiona.’¹⁰ Sa ou lagona le i ai o se faamoemoe ma iloa ai e mafai ona ou amatalia le faagasologa umi o le salamo.”
Ma le mulimuli: “I se tasi afiafi, sa ou maua ai le lototele e faasoa atu o’u lagona e uiga i le talalelei ma le Tusi a Mamona i la’u uo lelei lava. Mulimuli ane, sa o se faamanuiaga le auai atu i lona papatisoga. O lenei la ua ma auai faatasi atu i le lotu.”

Se’i ou faasoaina atu ia te outou se tasi o a’u nofoaga paia. Sa ou lagonaina i se tasi taimi le lofituina, fefe, ma le matuai tuuatoatasi. Na ou faia se tatalo le leoa, “Le Tama Faalelagi, ou te le iloa pe faapefea ona fai lenei mea. Faamolemole, faamolemole, fesoasoani mai ia te a’u!” E le’i leva, ae faafuasei ona tulai ae se tagata ma tuu mai lona lima i lou tauau, ma tuuina mai ni upu faamaoni, ma faamalosiauga. I lena taimi, sa ou lagonaina le toafilemu. Na ou lagonaina le taliaina. Na suia mea uma. Na oo mai i lo’u mafaufau upu a Peresitene Spencer W. Kimball: “E silafia i tatou e le Atua, ma na te puipuia i tatou. Ae e masani lava ona ala mai i se isi tagata lona taulimaina o o tatou manaoga.”¹¹ Mo a’u, o lena taimi, o lena nofoaga na faapaiaina.

Tamaitai talavou pele e, e anoanoai isi nofoaga paia maimau pe ana mafai ona tatou faasoaina atu i le tasi ma le isi. A outou foi atu i aiga i lenei afiafi, ou te uunaia outou e tusi i lalo ia outou api o talaaga na nofoaga tou te iloa ma manatua ai. E manino mai ia te a’u o le faitau afe o outou o loo tutu i nofoaga paia. O nei nofoaga ua outou maua ai se malupuipuiga, malosiaga, ma le filemu i taimi le mautonu. O a outou molimau o le a faasolo malolosi ona o loo outou tutu atu mo le upumoni ma le amiotonu i auala faamamaluina.

O outou, le autalavou tautupu o le Ekalesia, o a’u toa manumanu. Ou te alofa ia te outou. Ou te lagona le alofa ofoofogia o le Tama Faalelagi mo outou, ou te tuuina atu la’u molimau e moni le talalelei a Iesu Keriso. O loo faatalitali ma sauni o Ia e lagolago outou a o outou “tutu ai i nofoaga paia ma aua le masii ese.” Ou te alofa ma lagolagoina Peresitene Thomas S. Monson, o lo tatou perofeta moni ma le musuia. Ou te faia ai nei mea i le suafa o Iesu Keriso, amene.