Elder Timothy J. Dyches

O Le Fitugafulu

O se tasi o matafaioi e fiafia lava i ai ia Elder Timothy John Dyches i le olaga o le “avea ma se molimau” ma le molimau atu i isi, ma fesoasoani ia i latou ia o mai ia Keriso. Pe o ia auauna atu o se faifeautalai, fegalegaleai i totonu o lona lava aiga, po o le galue i lana matata faalegaluega, na te taliaina lava ma le fiafia lena matafaioi ma le tiutetauave ma taumafai e fesoasoani i isi ia faia lena lava mea e tasi.

Sa soifua mai ia Ianuari 1951 i Murray, Iuta, ISA, ia Milo Fredrick ma Mary Katherine Dyches, ma o le lona lua o le fanau e toafitu. Ao avea o ia ma se tiakono talavou, sa masii atu lona aiga i Elko, Nevada, lea sa ia faaaluina ai lona taimi pe a tuua le aoga e faigaluega ai i le faletalavai a lona tama. Ao la galulue soosootauau, sa aoao ai o ia e lona tama i le taua o le galue malosi—o se mea na aoga tele ia te ia o se faifeautalai talavou i le Misiona a Siamani i Saute mai le 1970 i le 1972.

“Sa avea o se misiona faigata, ae o se misiona maoae foi mo au,” sa ia saunoa ai. “Sa ou aoaoina le taua o le galue malosi ma le usiusitai ma le le fiugofie.”

O lena manatu faalegaluega sa faaauau pea ina ua maea lana misiona, i lana aoga, galuega, ma tofiga faale-Ekalesia. Sa feiloai atu Elder Dyches i lona faletua mo le lumanai, o Jill Dudley, ao aoga ai i le Iunivesite o Polika Iaga. Sa la faaipoipo i le aso 26 Aperila, 1974, i le Malumalu o Manti Iuta. E toatolu le la fanau.

Sa maua le faailoga o le tagata malaga a Elder Dyches mai le Iunivesite o Polika Iaga i suesuega faaleiunivesite ma faaauau ai i le mauaina o se faailoga faafomai mai le Washington University Medical School. Sa faaalu lana matata faalegaluega o se fomai tipitipi o taliga, isu, ma le fa’a’i i sana lava ia pisinisi tumaoti i Reno, Nevada.

I le taimi o lona valaauga i le Korama Lua a Fitugafulu, sa auauna atu Elder Dyches i le faalapotopotoga o Alii Talavou o se faufautua i le korama a tiakono. Sa auauna atu o ia i le tele o isi valaauga, e aofia ai le Fitugafulu Eria, peresitene o le Misiona a Oregon Portland, peresitene o le siteki, fesoasoani i se au peresitene o le siteki, fautua maualuga, tagata fai sauniga o le malumalu, peresitene o le Aoga Sa, ma se failautusi a le uarota.