Elder Adrián Ochoa

O Le Fitugafulu

Ao auauna ai o se Fitugafulu Eria i Mekisiko, sa faaalu ai e Elder Adrián Ochoa ni nai aso i le aai o Chihuahua e fefautuaai ai ma le peresitene o le siteki ma isi, ona alu loa lea i se vaalele e fuafua mo lona aiga. Ae ina ua saofai i lona nofoa, na ia mauaina se uunaiga faaleagaga malosi tele e faapea e lei uma lana galuega i Chihuahua.

Sa faia e le aufaigaluega o le vaalele sauniuniga mulimuli mo le malaga ese atu. “Ae,” sa saunoa ai Elder Ochoa, “Sa ou iloaina e tatau ona ou toe alu ese ma lena vaalele.” O lea sa ia tuua ai. O se faasologa o faatalanoaga sosoo na maua ai ni faamatalaga taua ia na foia ai se faafitauli faigata ma faatagaina ai le alualu i luma faaleagaga o se aiga.

Ae sa lei maea ai iina le galuega a Elder Ochoa i Chihuahua. Sa taitai atu foi o ia e le Agaga i se aiga faatauvaa o sona tausoga na te lei toe vaai ai lava mo le tele o tausaga. Sa ia maua ai lona tausoga ua tuulafoaiina—o se tagata le toaga o le ekalesia—ma lona aiga toalaiti o tauivi ma ni luitau faigata o mea tautupe. “Sa ou iloaina o le Ekalesia ma Keriso o lo latou vaifofo lena. Sa ou augani atu i lou tausoga e toe foi mai i le lotu,” sa ia saunoa ai.

Sa toe foi mai le tausoga ma toe toaga, ma sa toefuatai se mafutaga faaleaiga taua. Sa mafai ona laveaiina e le Alii ni soifua se tele i Chihuahua ona sa faalogo se tagata se toatasi i uunaiga a le Agaga.

Ua agavaa uma tagata i ia uunaiga faalegaga e suia ai olaga, sa molimau ai Elder Ochoa, lea sa auauna atu i le tele o valaauga o le Ekalesia ao galue ai i matata tau faasalalauga. Sa pulefaamalumalu o ia i le Misiona a Honduras San Pedro Sula mai le 2004 i le 2007 ma, mai le 2009 seia oo ina ua valaauina i le Korama Lua a Fitugafulu, sa auauna atu ai o se fesoasoani lua i le au peresitene aoao o Alii Talavou.

Sa soifua mai ia Mati 1954 i San Francisco, Kalefonia, ISA, ia Eduardo ma Consuelo Ochoa, ma sa ola ae o ia i Kalefonia ma Mekisiko. Ao avea ma se alii talavou, na valaauina o ia i se misiona faapitoa o le va i fafo i Mekisiko. Sa faamauina o ia ma lona faletua o Nancy Villareal i le Malumalu o Mexico City. O i laua o matua o fanau e toalima.