O Loo Manaomia e le Ekalesia le Tomai ma le Poto Masani o Ulugalii Matutua

Faatasi ai ma le faateleina o le aofaiga o faifeautalai talavou ona o le tuuina i lalo o tausaga o faifeautalai, ua matuai manaomia ai foi ulugalii matutua i misiona i le lalolagi atoa. Faatasi ai ma le faatutuina o misiona fou e 58 talu ai nei, ua manaomia ai nisi ulugalii matutua se toatele e tuuina atu le poto masani faaletaitaiga ma isi lagolago ia e taua i se misiona faamanuiaina.

I le konafesi o Aperila 2013, sa saunoa ai Peresitene Thomas S. Monson e uiga i le saoasaoa o le faateleina o le aofaiga o faifeautalai ma faailoa mai lona alofa mo i latou e naunau e auauna atu i le Alii i le galuega faamisiona (tagai itulau 4, 66). Sa uunaia patino lava e Elder Russell M. Nelson o le Korama a Aposetolo e Toasefululua ia ulugalii matutua ina ia auauna atu. “Outou ulugalii matutua, ia outou fuafua mo le aso e mafai ai ona outou o i a outou misiona. O le a matou talisapaia sili la outou auaunaga,” sa ia saunoa ai (tagai itulau 45).

I le taimi amata o le konafesi aoao o Oketopa 2012, sa saunoa ai Peresitene Monson: “O le a tatou manaomiaina pea lava pea nisi ulugalii matutua se toatele. A mafai i o outou tulaga o i ai, afai ua tatau ona e litaea, ma mafai i lou soifua maloloina, ou te fautuaina outou ia faaavanoaina outou lava mo le galuega faafaifeautalai faamisiona. O le a taufai maua e le tane ma le ava le olioli tele ao la auauna atu faatasi i fanau a lo tatou Tama” (“Susū Mai Ia ma Maliu Mai i le Konafesi,” Ensign po o le Liahona, Nov. 2012, 5).

Mo le tele o tausaga, o loo uunaia ai pea e taitai o le Ekalesia ia ulugalii matutua ia auauna atu. Sa saunoa mai Elder M. Russell Ballard o le Korama a Aposetolo e Toasefululua: “Ua manaomia e misiona i soo se mea nisi ulugalii se toatele. O lo latou tomai ma le poto masani e avea ai i latou ma nisi o faifeautalai aupito silisili ua tatou maua. O o latou tomai faapitoa … ua latou mafai ai ona aoaoina ma le mataalia taitai i le lotoifale, faamalosia ma toefaatoaaga mai ia tagata o le ekalesia, ma aumai tagata le lolotu ia Keriso” (“Missionary Couples—Trading Something Good for Something Better,” Ensign, June 1988, 9, 11).

O ulugalii agavaa e mananao e auauna atu o ni faifeautalai ua uunaia ia faailoa atu i o latou epikopo po o peresitene o paranesi o latou manaoga e auauna atu. O le umi o auaunaga e mafai ona fetuunai i le va o le 6 ma le 23 masina.

O i latou e i ai ni fesili e uiga i misiona mo tagata matutua e mafai ona valaau atu i le 1-800-453-3860, laina faaopoopo 2-6741 (po o le 1-801-240-6741), po o le imeliSeniorMissionaryServices@ldschurch.org e maua ai se tali i ni fesili patino.

O le tomai ma le poto masani o ulugalii matutua e mafai ai ona latou aoaoina taitai i le lotoifale ma faamalosia tagata o le ekalesia faapea ai foi ma le aumaia o tagata le lolotu ia Keriso.