O Le Avea o le Konafesi ma Vaega o o Tatou Olaga

Mafaufau e faaaoga nisi o nei gaoioiga ma fesili e fai ma vaega amata mo talanoaga faaleaiga po o mafaufauga loloto faaletagata lava ia.

O numera o le itulau o loo lisiina atu i lalo e faailoa atu ai le itulau muamua o le lauga.

Mo Tamaiti

Sa saunoa mai Peresitene Thomas S. Monson e uiga i le taua o le usiusitai ma le auala e aumai ai i taimi uma e le le usiusitai ia taunuuga (itulau 89). Mafaufau i se taimi na e usitaia ai tulafono faaleaiga. Ae faapefea se taimi na e usitaia ai tulafono a le Atua? O a ni ou lagona i taimi e te usiusitai ai?
Sa faamatala e Elder M. Russell Ballard o le Korama a Aposetolo e Toasefululua le tala i se teineitiiti na totoina se tamato mai se fatu laitiiti (itulau 18). Faitau pe toe faamatala lenei tala o se aiga ma talanoa e uiga i le mea o aoao mai e uiga i le ala e mafai ai ona avea oe e faapei o le Tama Faalelagi. E mafai ona e setiina se sini e fai se mea se tasi e tuputupu ae ai e latalata atili i le Tama Faalelagi.
Sa saunoa Elder Enrique R. Falabella o le Fitugafulu e uiga i mea o le a malolosi ai ia aiga (itulau 102). Sa ia aoao mai e faapea o nisi o upu e sili ona taua e faaaoga i lou aiga o le “Ou te alofa ia te oe,” “Faafetai tele lava,” ma le “Faamagalo mai au.” Sa fautua mai Sister Rosemary M. Wixom, o le peresitene aoao o le Peraimeri, ia fai atu e faapea, “Ou te fiafia i mea uma e uiga ia te oe” (itulau 81). Tagai i le mea e tupu pe a e faaaogaina nei upu i lou aiga. Pe faafiafiaina ai i latou? O a ni ou lagona?

Mo Le Autalavou

Sa aoao mai e Peresitene Thomas S. Monson ni mataupu faavae se fa mo le sauniaina e fai galuega faafaifeautalai—e le na o se faifeautalai faamisiona ae faapena foi i le avea ai o se tagata o le Ekalesia (itulau 66). E mafai ona e suesue i lana lauga i le mafaufau i le fesili lenei: O le a se mea e mafai ona ou faia ina ia avea ai o se faifeautalai sili atu i le taimi nei?
Sa aoao mai Elder Jeffrey R. Holland o le Korama a Aposetolo e Toasefululua e faapea e le afaina le i ai o ni masalosaloga ma ni fesili, ae sa ia aoao mai foi: “Ia taofi mau i mea ua uma ona outou iloa ma tutu malolosi seia oo mai se isi malamalama. … Ia faamaoni i le faatuatua lena ua ia te oe” (itulau 93). Mafaufau e tusi i lau api talaaga ou talitonuga, molimau, ma nisi o aafiaga faaleagaga ua e mauaina. Ia tusi foi i lalo ni fesili o ia te oe ma taofi ina ia mafai ai ona e saili mo ni tali ao e faitauina ia tusitusiga paia ma lenei lomiga.
E toatele failauga na talanoa e uiga i le usiusitai ma ona faamanuiaga. Mo se faataitaiga, sa aoao mai Peresitene Monson, “O le iloa o le upumoni ma tali i a tatou fesili silisili e oo mai ia i tatou pe a tatou usiusitai i poloaiga a le Atua” (itulau 89). Mafaufau e sailiili lenei lomiga e faamamafa pe tusi i lalo ia faamanuiaga e tele o le usiusitai. O le faailoaina o nei faamanuiaga e mafai ai ona musuia oe e faaauau pea ona ola amiotonu.
O nisi failauga sa aoao mai e faapea e mafai ona e auauna atu i soo se taimi, ae le na o taimi e fai ai ni galuega auauna atu. “Auauna atu i aso uma,” sa aoao mai ai Brother David L. Beck, o le peresitene aoao o Alii Talavou. “O loo siomia outou e avanoa.” E mafai ona e faitau i le lauga a Brother Beck i nisi o faataitaiga a autalavou o loo auauna atu i isi (itulau 55).

Mo Tagata Matutua

E toatele failauga na molimau mai ia Iesu Keriso. O le a se mea e mafai ona e aoaoina e uiga i Lona uiga paia, misiona, ma le galuega mai lauga i itulau 22, 70, 96, 99, ma le 109?
O le autu o le mataupu aoaoina a le autalavou ia Me o loo faatatau i perofeta ma faaaliga. Afai o loo e faiaoga i le autalavou i le lotu pe i ai foi sau fanau talavou, e mafai ona e talanoaina ma i latou le mataupu aoaoina ma lenei fesili: Aisea e taua ai le faalogo ma mulimuli i perofeta soifua? Mafaufau e suesue lenei lomiga e faailoa ni valoaga ma lapataiga ia, pe afai e usitaia, o le a fesoasoani e faamanuiaina ai i tatou i taimi faigata.
O nisi failauga na taulai atu i le faamalolosia o aiga. Mo se faataitaiga, sa aoao mai Elder Richard G. Scott o le Korama a Aposetolo e Toasefululua, “A avea [le Faaola] ma taulaiga tutotonu o lou aiga, o le a i ai le filemu ma le toafimalie” (itulau 29). Saili mo ni auala e avea ai le Faaola ma taulaiga tutotonu o lou aiga ao e suesue i le lauga a Elder Scott faapea ai foi ma lauga o loo i itulau 6, 81, 83, ma le 102.