Elder Randy D. Funk

O Le Fitugafulu

O loo soifua pea Elder Randy Dennis Funk o le Korama Lua a Fitugafulu i lona olaga i lenei mataupu faavae autu: “Faalagolago i le Alii ma Lona lelei.”

I le tausaga lona tolu o lana aoga faaloia, sa maitaga ai lona faletua i le la tama lona lua ma sa avea o ia i le taimi lena ma se faatonu lagolago o le iloiloga o tulafono ina ua oo atu le valaau e auauna o se peresitene o le korama a toeaina. “O lea taimi faigata na ou taliaina ai le valaauga ma tatalo i le Tama Faalelagi ia faaatoatoa mai,” sa ia saunoa ai. “Sa ou manaomia se fesoasoani e faataunuu ai lou valaauga, faamaea ai ma le manuia lau aoga, sue ai se galuega, ma tausi ai lou aiga talavou. O faamanuiaga na ma mauaina sa matuai sili atu nai lo mea sa tatau ona ma mauaina. O le aafiaga sa ou maua ai se faatuatua maoae i le lelei o le Alii ma Ana faamanuiaga i luga o i latou e tauivi ma le naunautai e auauna atu ia te Ia.”

Sa soifua mai ia Aokuso 1952 ia C. Dennis ma Rebecca Funk, sa ia ola ae i Manti, Iuta; Madison, Wisconsin; ma Smithfield, Iuta, ISA. Sa ia matauina lona tama ao auauna atu ma le faamaoni i le Ekalesia ma sa aoaoina i le taua o le faataunuuina o tiute faaleperisitua.

Ina ua maea ona auauna atu i se misiona i Initonisia, sa ia faaipoipo atu ai ia Andrea Clyde i le aso 29 Me, 1976, i le Malumalu o Logan Iuta. O i laua o matua o fanau e toaono. Sa maua e Elder Funk se faailoga i mea tau talafaasolopito mai le Iunivesite o le Setete o Iuta ma se faailoga faaloia mai le Iunivesite o Iuta. Sa avea o ia ma se paaga i se ofisa loia tele i Denver, Colorado, ao lumanai ai lana auaunaga tumau i le Ekalesia, lea na amatalia i lona valaauga o se peresitene o le Misiona a India Bangalore i le 2010.

“Ina ua matou o atu i Initia, sa i ai lo matou faatuatua i le fetalaiga a le Faaola: ‘O lenei foi, Ou te fai atu ia te outou, soo se tasi tou te auina atu ai lou igoa, e ala i le leo o outou uso, o le Toasefululua, ua fautuaina mai i le ala tatau ma tuuina atu i ai e outou le pule, o le a i ai le mana e tatala ai le faitotoa o lo’u malo i soo se atunuu i soo se mea tou te auina atu i ai i latou’ (MF&F 112:21).” Sa auauna atu Elder Funk o se peresitene o le korama a toeaina, peresitene o Alii Talavou, epikopo, peresitene o le siteki, ma Fitugafulu Eria.