Carol F. McConkie

Tauturu Matamua i roto i te peresideniraa rahi no te Feia Apî Tamahine

Mai to’na apîraa mai â, ua vai noa i roto ia Carol Foley McConkie te « hinaaro rahi no te hiero ». Na taua tutonuraa ra i arataʻi i ta’na mau ohipa i roto i to’na oraraa taatoa.

Ua fanauhia te tuahine McConkie i te avaʻe eperera 1952 i Spokane, Washington, te mau Hau Amui no Marite, ia Williams e o Joanne W. Foley, e e tamarii noa â oia a patoto mai ai te mau misionare i niʻa i te uputa fare o to’na na metua i Wilmington, Delaware, e ua faaite maira i te evanelia i to’na utuafare. Ua farii oioi to’na na metua i te mau haapiiraa noa’tu te patoʻiraa e te titauraa ia taui i to ratou huru oraraa.

E tamariirii noa â oia a ratere ai oia na muri iho i to’na utuafare na niʻa i te pereoo auahi na roto i te fenua taatoa no te haere e taati ia ratou i roto i te hiero no Manti i Utaha.

Te parau ra oia e, « ua riro mau ïa ei ohipa au roa. Te haamanaʻo nei au ua ahuhia matou i te ahu uouo e te auraa o te reira ohipa no to’u utuafare. Ua riro ïa ei ohipa nehenehe mau, e noa’tu e, e mea apî roa â vau, te haamanaʻo nei au i te mau manaʻo tei tupu i roto ia’u, te ahu uouo, e te nehenehe o taua mahana ra. Na taua ohipa ra i horoʻa mai i to’u hinaaro matamua ia tapeʻa tamau noa i te hiero i roto i to’u oraraa ».

Ua riro mai te hiero ei tapaʻo no te tiʻaturiraa i roto i te mau taime tamataraa e i te taime a haamau ai oia i to’na iho utuafare.

Ua farerei oia i ta’na tane, Oscar Walter McConkie III, i te fare haapiiraa tuatoru i Arizona. Ua roaa i te tuahine McConkie te parau tuʻite « bachelor » no te haapiiraa reo peretane. Ua faaipoipohia raua i te 22 no titema 1973, i roto i te hiero no Mesa Arizona e e hitu ta raua tamarii.

I te taime a piihia ai oia ei tauturu matamua i roto i te peresideniraa rahi no te Feia Apî Tamahine, te tavini ra te tuahine McConkie i roto i te tomite rahi o te Feia Apî Tamahine. Ua tavini oia i te rahiraa taime i roto i te mau piiraa no te haapii, e ei peresideni no te Feia Apî Tamahine no te paroisa, e ei tauturu i roto i te peresideniraa Sotaiete Tauturu e te Paraimere. Ua tavini oia i pihaʻi iho i ta’na tane a peresideni ai ta’na tane i te misioni no California San Jose mai te matahiti 2005 e tae atu i te matahiti 2008.