Mauhaa apî i niʻa i te Itenati no te faaherehere e no te faaite i te mau hohoʻa e te mau aamu utuafare.
Te feia e haere atu i niʻa i te tahua ItenatiFamilySearch.org e ite ïa ratou i te tahi mau tauiraa rahi i te avaʻe eperera 2013. Taa ê atu te parau no te maʻimiraa, e itehia i niʻa i teie tahua te mau mea e rave rahi na roto i te mau hohoʻa apî, e te maramarama e te nehenehe, e te tahi atu mau raveʻa apî. E riro noa â teie tahua Itenati ei tahua ohiparaa na te feia păpă tupuna e te feia maʻimi, tera râ, na teie mau raveʻa apî e huti mai e rave rahi atu â mau huru taata i niʻa i teie tahua Itenati.
E tauturu teie mau raveʻa apî i te ohipa aamu utuafare i ô atu i te maʻimiraa noa, e e titau atoa hoʻi i te feia papaʻi aamu utuafare e haamata noa ra, te feia apî e te feia paari. I teie nei, e nehene i te taata e hamani amui i to ratou păpăraa tupuna i niʻa i te Itenati, e faaherehere e e horoʻa i te mau hohoʻa e te mau aamu—ma te tamoni ore.
Na te mau hohoʻa e te mau aamu utuafare e faaora faahou i te mau tupuna. E nehenehe i teie mau taata e vai ra i muri mai i te mau taiʻo mahana e haapii mai ia tatou i te mau haapiiraa mai te faufaa o te ohipa itoito, nahea ia arai i te mau titauraa o te oraraa, e nahea te mau maʻitiraa i te arataʻi i to tatou oraraa.
Na te faaohieraa i te faatuatiraa e te faaherehereraa i te mau aamu utuafare e tauturu ia tatou ia nati ia tatou i niʻa i to tatou faufaa tupuna e ia faatupu i te hoê faufaa aiʻa no ananahi.
Te mau raveʻa apî i niʻa i te tahua FamilySearch.org
FamilySearch Family Tree. No te taime matamua i niʻa i te tahua FamilySearch.org, e nehenehe i te taata e haamata i te hamani amui i to ratou păpăraa tupuna i niʻa i te Itenati, na roto i te haamataraa i te papaʻi i te mau haamaramaramaraa no niʻa ia ratou iho e haere atu ai i niʻa i te mau uʻi i tahito ra.
Te mau mea faufaa no ni‘a i te Family Tree :
-
A imi i niʻa i te tahua Itenati FamilySearch.org i raro aʻe i te parau tapaʻo « Family Tree [tumu raau utuafare] ».
-
Ua hau i te 900 mirioni iʻoa i tapaʻohia i niʻa i te tumu raau, e mau iʻoa tei horoʻahia mai e te taata.
-
E mea tamoni ore.
-
E tiʻa i te taata ia amui no te hamani, no te faanaho e no te horoʻa i to ratou aamu utuafare na niʻa i te Itenati.
-
E nehenehe ta te taata e ite mai i te mau mea ta te tahi atu mau taata i ite no niʻa i to ratou aamu utuafare.
-
E mea ohie roa na te taata ia tuu i te mau hohoʻa, te mau aamu e te mau hono Itenati no te reira.
-
E nehenehe ta te taata e faaherehere i to ratou tumu raau utuafare, ta ratou i faaite, no te mau uʻi no anaanahi.
-
Na roto i teie raveʻa ohie “tapeʻa e a huti” e nehenehe ta te taata e faanuu i niʻa e i raro i to ratou tumu raau utaufare ma te ohie.
-
E nehenehe i te taata e taiʻo e rave rahi miria parau tuatapaparaa i niʻa i te tahua Itenati FamilySearch.org no te faaî i te mau tuhaa e moʻe ra o to ratou tumu raau utuafare.
Hohoʻa. E nehenehe ta te taata e faaherehere i te mau hohoʻa auhia e ratou no to ratou mau tupuna, ma te tapiri atu i te reira i pihaʻi iho i te mau parau faataaraa i roto i te FamilySearch Family Tree, e ma te faaite i te reira na roto i te mau raveʻa haaparareraa sotiare. Ua hau i te 200 000 hohoʻa tei horoʻahia, faahereherehia e tei faaitehia.
Te mau aamu. E nehenehe ta te taata e papaʻi i te mau aamu auhia e ratou no niʻa i te hoê tupuna i roto i te FamilySearch Family Tree. Na roto i teie raveʻa e tiʻa i te mau utuafare ia haaputuputu, ia faaite e ia faaherehere a muri noa’tu i te aamu o to ratou utuafare.
Păpăraa hohoʻa Tahiri. I te matahiti 2012 ua tamata FamilySearch i te hoê raveʻa e tiʻa ai i te taata ia ite ia ratou iho e i to ratou tupuna i roto i te hoê păpăraa hohoʻa Tahiri. Ua haamaitaihia’tu te reira raveʻa i teie nei, e e roaa te reira i niʻa i te tahua Itenati FamilySearch.org.
Family Tree Wizard. Te feia a tahi nei ratou a hamani ai i to ratou tumu raau utuafare, e ite ratou e, e mea maitai roa teie mauhaa. Mai te au i te hoê aparauraa, e ui teie mauhaa i te mau uiraa no niʻa i to outou mau tupuna ora e tei pohe, e i reira e hamani ai i te mau tuʻatiraa i roto i te tumu raau utuafare ia tiʻa ia outou ia haamata.
Tauturu na roto i te aparauraa. Te rahi noa’tura te anaanatae o te taata na te ao taatoa nei i te ohipa tuatapaparaa. Ua faatupu FamilySearch i te hoê autahiraa i niʻa i te Itenati o te horoʻa nei i te mau raveʻa tauturu e i te tautururaa taata hoê i te maʻimiraa, ma te tamoni ore na roto i te niuniu e te aparauraa na niʻa i te Itenati e 24 hora i te mahana—i roto hoê ahuru reo i teie nei.
Reo. E roaa teie mau raveʻa apî atoa e te tautururaa, i roto hoê 10 reo. E roaa te mau hohoʻa videos haamaramaramaraa e te tahi atu mau raveʻa tauturu na niʻa i te Itenati no te mau raveʻa atoa. A pata noa i te pitopito Tauturu no te ani i te mau faataaraa hau atu.
© IRI
© IRI