Ua pohe o Elder Eldred G. Smith i te 106raa o te matahiti
Ua tavini o Elder Eldred G. Smith, ei patereareha no te Ekalesia mai te matahiti 1947 e tae atu i te matahiti 1979, ua pohe i te 4 no eperera 2013, i to’na fare. 106 matahiti to’na.
Ua tiʻaturihia e, oia te taata paari roa aʻe i Utaha, inaha, ua roa aʻe te oraraa o Elder Smith i te tahi atu Hui Mana Faatere Rahi.
Ua haere atu te peresideni o te Ekalesia Thomas S. Monson e farerei ia Elder Smith i te oroʻa mahana fanauraa hopea, 9 no tenuare 2013. « E hoa maitai roa o Eldred Smith noʻu », te parau ïa a te peresideni Monson. « Ua ratere amui maua e rave rahi maire te atea. Te here nei au e te faatura nei au i teie taata ».
Ua piihia o Eldred G. Smith ei Parereareha no te Ekalesia i te 10 no eperera 1947, na te peresideni George Albert Smith, peresideni no te Ekalesia i taua taime ra, e o oia te taata hopea tei mau i taua tiʻaraa ra. Ua faatuhaahia oia i te matahiti 1979. Ua haamata teie tiʻaraa i te matahiti 1833 na roto i te piiraahia o Joseph Smith Sr., metua tane no Iosepha Semita. E hina rere o Elder Smith na Hyrum te taeaʻe o te Peropheta.
I roto i ta’na taviniraa ei Patereareha no te Ekalesia, ua ratere o Elder Smith i roto i te mau fenua e rave rahi na te ao nei, e ua horoʻa e rave rahi haamaitairaa patereareha i roto i te mau fenua aita e patereareha i reira. I te matahiti 1966 ua ratere oia na muri iho ia Elder Monson i Auteraria e i Hamoa no te horoʻa i te mau haamaitairaa patereareha i te mau melo i reira. Te taime matamua teie a tae ai te hoê patereareha faatere i Hamoa. I teie mahana, te rahiraa o te tĭtĭ e patereareha to ratou i roto i te tĭtĭ iho.
Ua paraparau te peresideni Monson e o Elder M. Russell Ballard no te Pŭpŭ no te Tino Ahuru Ma Piti Aposetolo i te hunaraa o Elder Smith. Ua taiʻo te peresideni Monson i mua i te utuafare i te hoê rata faatauaroha no roto mai i te Peresideniraa Matamua, e ua parau e, « Ua moʻe hoê hoa maitai roa to’u no te hoê noa tau.”
E hina rere atoa o Elder Ballard no Hyrum Smith, e ua paraparau oia no niʻa i te mau rohiraa a Elder Smith no te faaoraora i te aamu o to ratou utuafare. “Te faahanahana nei tatou ia’na ei patereareha no te Ekalesia e ei patereareha no to matou utuafare,” ta’na ïa parau. Ua parau atoa oia e, ua ite oia e, ua ite o Elder Smith e ta’na ohipa rahi aʻe o to’na ïa utuafare.
Ua faaipoipo o Eldred Smith ia Jeanne Audrey Ness i te matahiti 1932 ; E pae ta raua tamarii. I muri aʻe i te poheraa o Jeanne Audrey i te avaʻe tiunu 1977, ua faaipoipo oia ia Hortense Child ; te tavini ra ïa o Hortense Child i te reira taime ei tauturu i roto i te peresideniraa rahi o te Feia Apî Tamahine. Ua pohe oia i te avaʻe me 2012.
Ua monohia o Elder Smith na na tamaiti e piti e hoê tamahine (ua pohe te tahi tamahine), e 22 mootua (e piti tei pohe), e 63 hina, e e 22 hina rere.
Ua tauturu o Gerry Avant i teie papaʻiraa.
Peresideni Thomas S. Monson, i te pae atau, te farerei nei ia Elder Eldred G. Smith, tei tavini ei Patereareha no te Ekalesia mai te matahiti 1947 e tae atu i te matahiti 1979, i te 106raa to’na mahana oroʻa fanauraa, 9 no tenuare 2013. Ua pohe o Elder Smith i te 4 no eperera i to’na fare.
Hohoʻa na Gerry Avant, Church News