Neill F. Marriott

Tauturu piti i roto i te peresideniraa rahi no te Feia apî tamahine

Na mua aʻe a tomo mai ai oia i roto i te Ekalesia, ua haapii o Neill Foote Marriott i to’na apîraa e, te vai ra te hoê Atua e ua here Oia ia’na.

« Ua riro to’u metua tane ei hohoʻa no to’u Metua i te Ao ra », te parau ïa a te tauturu piti apî i roto i te peresideniraa rahi o te Feia Apî Tamahine. « Aita e otiʻa to to’na here e to’na farii ia vetahi. Ua riro to’u tiʻaturi e to’u here i to’u metua tane i te tahuti nei ei hohoʻa no to’u here e to’u tiʻaturi i to’u Metua i te Ao ra ».

Ua fanauhia oia i te avaʻe atopa 1947 ia George e o Antonia Foote i Alexandria, Louisiana, te mau Hau Amui no Marite, oia anaʻe te tuahine o na taeaʻe e ono. I muri aʻe i te roaaraa ta’na parau tuʻite i te fare haapiiraa tuatoru no Dallas, Texas, e hoê parau tuʻite no te arataʻiraa parau peretane, e no te haapiiraa, ua haere atu oia i Cambridge, Massachusetts, i reira oia i te raveraa i te ohipa ei papaʻi parau i roto i te fare haapiiraa tuatoru no Harvard. I reira to’na mâtauraa ia David Cannon Marriott, tei parau ia’na e, « Te hinaaro nei au ia farerei oe i to’u mau hoa ». Ua arataʻi mai oia i te mau misionare no te haapii ia’na e i to’na mau hoa piha taoto.

A faaroo ai oia i te mau misionare, ua parau oia e, « ua riro teie mau haapiiraa ei faatuʻatiraa i te mau tuhaa e toe ra i roto i to’u iteraa i te evanelia ». I muri aʻe i to’na bapetizoraa i te avaʻe me 1970, ua vai hoa noa raua o David ; hoê matahiti i muri mai, ua haamata raua i te arapae e ua faaipoipohia i te avaʻe tiunu 1971 i roto i te hiero no Roto Miti.

Ma te rave amui i te ohipa e ta’na tane, ua faaea te tuahine Marriott i te fare i pihaʻi iho i ta raua nau tamarii hoê 11 a titau ai te tane i te hoê toroʻa i roto i te ohipa putu faufaa. Ua tavini raua i roto e rave rahi piiraa. Ua tavini oia i pihaʻi iho i ta’na tane i te taime a faatere ai oia i te misioni no São Paulo Interlagos mai te matahiti 2002 e tae atu i te matahiti 2005, e ua tavini oia ei rave ohipa i roto i te hiero no Roto Miti, ei peresideni Sotaiete Tauturu no te tĭtĭ e no te paroisa, ei peresideni no te Feia Apî Tamahine paroisa, ei haapii evanelia, e ei taata aravihi no te haaputuraa maa.

I roto i to’na piiraa apî, te tiʻaturi nei te tuahine Marriott e faaite atoa i teie iteraa papû ta’na i farii a riro ai oia ei feia apî tamahine. Ua hinaaro oia ia ite te mau tamahine e, « ua herehia ratou na to ratou Metua i te Ao ra i te hoê here rahi e te hanahana ».