Te haerea o te Fatu

Na Elder Stanley G. Ellis

No te Hitu ahuru

Teie te haerea o te Fatu, ia haapa‘o tatou i te mau haapiiraa a to tatou feia faatere, ia maramarama i te mau parau tumu tano e ia faatere ia tatou iho.

Hitu ahuru

E Hitu ahuru ta’u toro‘a. Ua piihia te mau Hitu ahuru no te riro ei mau ve‘a—no te faaite i te parau a te Fatu mai te fariihia no roto mai i te mau aposetolo e te mau peropheta e no roto mai i te Varua e no te riro ei ite taa ê no te i‘oa o te Mesia na roto i te pororaa i te evanelia i te ao atoa nei, na roto i te paturaa i te Ekalesia e na roto i te faanahoraa i to te reira mau ohipa (hi‘o PH&PF 107:25, 34).

Tamarii faaapu

Ua paari au i roto i te hoê fare faaapu piri ia Burley, i Idaho—e « tamarii faaapu e e tamarii Idaho papû » ! E no reira, ua haapii au :

1. Ia rave i te ohipa—aita ana‘e te rima e tanu, aita atoa ïa e ooti.

2. Ia rave maramarama i te ohipa—e pîpî oe i te pape ma te aupuru i te repo, rahi atu â ïa ta oe e ooti.

3. Te faufaa no te taime ti‘a—Ia ore oe e tanu i te taime tano, e puhi mai te mata‘i to‘eto‘e e ua mau‘a ïa te maa.

4. Ia rave i tei titauhia e aore râ i te mea ti‘a ia rave noa’tu te mau mea arearea, te mau mea au roa’tu e te mau taime au a‘e—e ti‘a ia faatehia te û o te ufa puaatoro i te taime titauhia e ana, eiaha râ ia au i to oe hinaaro.

5. Parau ohie—ia ohipa oe e te nănă e te mau matini, aita e taime no te « taamino noa » e aore râ no te feruri e, eaha ra te parau tano a‘e mai te mau parau poritita. (E no reira, a tavini ai au i roto i te Ekalesia, pinepine au i te ani e, « Nahea, e paraparau afaro’tu vau e aore râ e faanavenave noa ? » Mai te hoê ra ture, ua ma‘iti te Feia Mo‘a i te « afaro ! » E paparau afaro atu ïa vau i teie mahana).

6. E i te pae hopea, ei tamarii faaapu no Idaho, ua haapii au i te haapa‘o noa i te mau mea rii tumu.

Aita e mea tumu rahi a‘e no tatou e no to tatou haapiiraa tumu, i te mau parau i roto i te hiro‘a faaroo matamua : « Te ti‘aturi nei matou i te Atua, te Metua Mure Ore, e i Ta’na Tamaiti ia Iesu Mesia, e i te Varua Maitai ho‘i » (Te mau Hiro‘a Faaroo 1:1).

Hau atu ra, o Oia to tatou Metua i te Ao ra, e ua ite Oia ia tatou, e ua here Oia ia tatou e ua hinaaro Oia ia ho‘i tatou Ia’na ra. O Iesu to tatou Faaora e te Ora, e na roto i te Taraehara Oia i haapapû e, e upooti‘a tatou i te pohe no te ora faahou mai e e nehenehe ia tatou ia faateiteihia e ia farii i te ora mure ore. O te Varua Maitai to tatou faaa‘o, to tatou heheu parau, to tatou orometua haapii, to tatou rave‘a haapapû e to tatou arata‘i.

A feruri na i te reira, te mau taea‘e e te mau tuahine—e ere tatou i te otare i te pae varua ! Aita tatou i haamo‘ehia.

Eaha te faufaa ia fana‘o i te mau metua—ia ore ia riro mai ei otare ? Ua nehenehe ta tatou e haapii i piha‘i iho ia raua, e apî mai mai roto mai i te mau iteraa no raua, e faaatea’tu i te mau herepata ta raua e faaara mai, e e maramarama maitai a‘e no te hi‘oraa atea ta raua e horo‘a mai. Aita e ti‘a ia tatou ia vai mo‘e, ia arepurepu te mana‘o, ia vare haere e aore râ ia riro mai ei taata aravihi ore. E parau mau ihoa te reira ia feruri ana‘e tatou i to tatou Metua i te Ao ra, tei haapii e tei faaite ia tatou eiaha noa te hoê haerea, o te haerea mau râ.

Tei te Atua ra te haerea

Oia mau, tei te Atua ra te haerea no te oraraa,¹ no te here,² no te tauturu,³ no te pure,⁴ no te paraparau,⁵ te raveraa te tahi i te tahi,⁶ no te faatere,⁷ no te faaipoipo,⁸ no te haapa‘o i te tamarii,⁹ no te haapii,¹⁰ no te ite mai i te parau mau,¹¹ no te faaite i te evanelia,¹² no te ma‘iti ma te paari i te mea e amu,¹³ e te vai atu ra.

Apitihia e te mau papa‘iraa mo‘a, te tahi o te mau puna rahi no te ite mai i te haerea o te Fatu, o te mau buka ra Mau Maite i te Faaroo, No te Puai o te Feia Apî, e te mau haapiiraa a te mau aposetolo ora e te mau peropheta ora.

1. Ei hi‘oraa, ua haapii mai te Fatu ia tatou i roto i te mau papa‘iraa mo‘a :

   « E ere hoi to’u ra mana‘o i to outou ra mana‘o ; e ere hoi to outou ra haerea i to’u ra haerea, te na reira maira Iehova.

   « Mai te rai nei hoi e teitei rahi to’na i to te fenua ; oia’toa to’u ra haerea, e teitei ïa i to outou haerea, e to’u ra mau mana‘o i to outou ra mau mana‘o » (Isaia 55:8–9).

2. Teie te hoê o te mau peu iino o teie mau mahana hopea nei, oia ho‘i, « te haere nei te taata tata‘itahi i to’na ihora haerea » (PH&PF 1:16). I roto i te Maseli, te vai nei te faaararaa, « eiaha… e ti‘aturi i to oe ihora haapa‘o » e « eiaha oe ia paari i to oe iho mana‘o raa » (hi‘o Maseli 3:5–7).

3. Te haapiihia nei tatou e, ia rave tatou i te mau mea ia au i te haerea o te Fatu, ua ruuruuhia ïa Oia no te haamaitai ia tatou e e ti‘araa to tatou no te titau i Ta’na mau fafauraa ; e e ere noa’tu To’na haerea, aita ta tatou e fafauraa (hi‘o PH&PF 82:10).

4. Ua faataa mai te Fatu i To’na haerea e to tatou atoa na roto i Ta’na haapiipiiraa i te peropheta Samuela, tei tonohia ia itehia mai te hoê arii apî : « Ua na ô mai râ Iehova ia Samuela, Eiaha e hi‘o i to’na mata, e to’na huru i te teitei, no te mea, aore oia i ti‘a hia e au ; E ore hoi ta Iehova hi‘o raa e au i ta te taata ; e hi‘o hoi te taata i te huru i rapae au a‘e, area o Iehova, e hi‘o ïa i te aau » (1 Samuela 16:7).

5. I roto atoa i to tatou hiaai mâtau maitai ia tauturu i tei vĕvĕ e tei rava‘i ore, te amui nei te Fatu i ta tatou fâ, tera râ ua faaara atoa mai Oia, « Tera râ ia ravehia te reira na roto i ta’u iho ravea » (PH&PF 104:16). Aita ana‘e, e riro paha ta tatou mau tautooraa ia tauturu ei haamauiuiraa ia ratou. Ua haapii mai te Fatu ia tatou i te titauraa ia faaitoito i te faarava‘iraa ia’na iho. Noa’tu â ua nehenehe ta tatou ia tauturu atu, aita roa e ti‘a ia horo‘a’tu tatou e aore râ ia faafana‘o’tu i te mea ua nehenehe ta ratou e rave no ratou iho. I te mau vahi atoa ua tamatahia te reira, ua apo mai to teie nei ao i te mau ino no te parau no te ohipa ore. Papû roa, ua ite maitai a‘e te Atua.

E feruri ana‘e i te tahi atu mau hi‘oraa. Tei te Fatu te haerea no te rave i te ohipa misionare. Ua tapa‘opa‘ohia te reira i roto i te mau papa‘iraa mo‘a e i roto atoa i te buka Ia Poro Haere i Ta‘u nei Evanelia, e te ravehia nei mai tei arata‘ihia e te Varua.

Te vai nei ta te Fatu, To’na haerea, e mea au a‘e paha ia parau e, te haerea mau no te here. Te parau nei to te ao nei e, te mea faufaa a‘e, ia here na taata e piti ia raua. Te haapii nei to tatou Metua i te Ao ra e, e mea faufaa ihoa te reira, te haapii atoa ra râ Oia ia tatou e : te vai nei te hoê haerea tei haamanahia e te taime atoa no te faaite i taua here ra.

Te faatereraa ia tatou iho

Ua haapiihia Iosepha Semita mai to’na apîraa i te mau haerea o te Fatu. I te aniraahia oia e, nahea oia i te arata‘i i te Ekalesia, ua faataa mai oia e, ua haapii atu oia i te mau parau tumu ti‘a e na te mau melo iho e faatere ia ratou iho.¹⁴ Te mau taea‘e e te mau tuahine, te haapii noa nei te mau aposetolo ora e te mau peropheta ora i te mau parau tumu ti‘a. Teie râ te uiraa, « Te faaohipa nei anei tatou i teie mau parau tumu no te faatere ia tatou ? »

Te hoê mea tei haapii-noa-hia tatou, o te u‘araa ïa i te vahi i reira tatou i tanuhia. I te tahi râ mau taime, te mana‘o nei tatou ia faanuu atu i te hoê vahi apî, ma te mana‘o atoa e, e rahi atu â te mau hoa o ta tatou mau tamarii, i reira e tere maitai ai te mau faanahoraa a te feia apî.

E te mau taea‘e e te mau tuahine, te mana‘o rahi nei anei tatou e, te mea faufaa rahi roa e faatupu atu i te faaoraraa o ta tatou mau tamarii, o te mau taata ïa e ora nei i to tatou vahi ? Pinepine te mau aposetolo e te mau peropheta i te haapii e, te mea e tupu nei i roto i te fare, e mea faufaa a‘e ïa i te mea e farereihia ra na rapae au mai. O te huru tatou e aupuru i ta tatou mau tamarii te mea faufaa a‘e i te vahi i reira ratou e aupuru ai ia ratou.

Papû roa, te vai atu ra te tahi mau ohipa e tura‘i i ta tatou faaotiraa no te vahi oraraa, e aua‘e, e arata‘i mai te Fatu ia tatou ia imi tatou i Ta’na haapapûraa.

Te tahi atoa uiraa, o teie ïa, « I hea tatou e hinaarohia ai ? » 16 matahiti to’u taviniraa i roto i te peresideniraa no te tĭtĭ no Houston Texas North. E rave rahi tei haere mai no te noho i taua area ra i roto i tera mau matahiti. E pinepine roa matou i te taniuniuhia no te parau mai e, e taata tera e haere mai nei ma te ani tei hea te paroisa maitai roa a‘e. Hoê noa taime i roto i te roaraa o na matahiti 16 to’u taniuniuraahia no te ani mai, « Tei hea paroisa e titau nei i te hoê utuafare maitai ? I hea matou e nehenehe ai e tauturu atu ? »

I te mau matahiti matamua o te Ekalesia, ua pii te peresideni Brigham Young, e te tahi atoa, i te tahi mau melo no te haere i te hoê vahi e faati‘a atu ai i te Ekalesia. E te mea maere, te vai faahou nei te tahi mau melo faaroo o te Ekalesia i te mau vahi rau o te faanuu atu i te hoê vahi, e noa’tu te vahi, ia ani noa mai te peropheta ia ratou ia haere. Te tia‘i mau nei anei tatou ia parau mai te peresideni Monson ia tatou tata‘itahi, hau i te 14 mirioni tiahapa taata, tei hea vahi ua hinaarohia to tatou utuafare ? Teie te haerea o te Fatu, ia haapa‘o tatou i te mau haapiiraa a to tatou feia faatere, ia maramarama i te mau parau tumu tano e ia faatere ia tatou iho.

Te mea faufaa taa ê

Ia au i te mea atoa e tupu nei i roto i te Ekalesia i teie mahana, e no te haapeepeeraa te Fatu i Ta’na ohipa i te mau pae atoa, e mea faufaa faahou ïa ia rave tatou ia au i To’na haerea !

I roto ihoa râ i te ohipa no te faaoraraa, te haapii nei tatou e, « I te maitai o ta’na Tamaiti ra, ua faaineine te Atua i te hoê [haerea] maitai a‘e » (Etera 12:11). O te haapiiraa tumu a te Mesia « te [haerea] mau ; aita’tu e [haerea], e aore hoi e i‘oa i horo‘ahia mai i raro a‘e i te ra‘i, e ti‘a’i i te taata ia faaorahia i te basileia o te Atua ra » (2 Nephi 31:21).

Puohuraa

A ite noa ai tatou i te rahiraa taata i roto i te ao nei i teie mahana, te ora ra i roto i te aehuehu, e ino roa’tu, te otare noa ra na te mau e‘a ti‘a ore ma te mamae faufaa ore atoa ra i te mau faautu‘araa o te mau ma‘itiraa hape, ua hinaaro roa vau i te parau mai ia Alama ra te huru :

« Ahiri au e melahi e, e e roaa mai hoi ia’u te hinaaro o to’u nei aau, e ti‘a’i ia’u ia haere, e ia parau ma te pu o te Atua ra, e ma te reo e rurutaina’i te fenua nei, i te piiraa’tu i te tatarahapa i te taata atoa ra ;

« Oia ïa, e faaite hua’tu vau… te rave‘a ora i te taata atoa ra, ia tatarahapa ratou e ia haere mai i to tatou Atua [e i To’na mau haerea], ia ore roa te oto i ni‘a i te fenua atoa nei » (Alama 29:1–2).

Faahou â, te faaite papû nei au e, tei te Fatu ra te haerea ! Ua ite to tatou Metua i te Ao ra ia tatou, ua here Oia ia tatou e ua hinaaro ho‘i ia tauturu mai. Ua ite roa ino Oia nahea i te tauturu mai. E ere tatou i te otare pae varua !

O to tatou Faaora, o Iesu Mesia, te « e‘a, te parau mau e te ora (Ioane 14:6 ; hi‘o atoa Alama 38:9). To’na haerea, ua niuhia i ni‘a i te parau mau mure ore e na te reira e arata‘i ia tatou i te « mana‘o hau i roto i teie nei ao, e te ora mure ore i roto i te ao a muri atu ra » (PH&PF 59:23). O teie to’u iteraa papû na roto i te i‘oa o Iesu Mesia, amene.

Te mau nota

1. Hi‘o 2 Nephi 5:27 ; Mosia 4:27 ; Alama 7:23–25.

2. Hi‘o Exodo 20:14 ; Deuteronomi 6:5 ; Ioane 13:34–35 ; Roma 1:24–32 ; 1 Tesalonia 4:3 ; Alama 39:3–5.

3. Hi‘o Mosia 4:21–27 ; Te Parau Haapiiraa e te Mau Parau Fafau 104:15–18.

4. Hi‘o Mataio 6:5–13 ; 2 Nephi 32:8–9 ; 3 Nephi 18:21 ; Te Parau Haapiiraa e te Mau Parau Fafau 10:5.

5. Hi‘o Maseli 15:1 ; Kolosa 4:6 ; Iakobo 5:12 ; 3 Nephi 11:29–30.

6. Hi‘o Te Parau Haapiiraa e te Mau Parau Fafau 64:10–11 ; 121:41–46.

7. Hi‘o Mataio 25:14–30 ; Ioane 10:1–14 ; Te Parau Haapiiraa e te Mau Parau Fafau 50:26 ; 107:99–100 ; 121:34–40.

8. Hi‘o Genese 2:24 ; Jacob 2:27 ; Te Parau Haapiiraa e te Mau Parau Fafau 42:22 ; 132:19.

9. Hi‘o Mosia 4:14–15 ; Te Parau Haapiiraa e te Mau Parau Fafau 68:25–28.

10. Hi‘o Te Parau Haapiiraa e te Mau Parau Fafau 43:8–9 ; 88:77–79, 118.

11. Hi‘o Moroni 7:15–19 ; 10:3–5 ; Te Parau Haapiiraa e te Mau Parau Fafau 9:7–9.

12. Hi‘o Te Parau Haapiiraa e te Mau Parau Fafau 33:8–10 ; 100:3–8.

13. Hi‘o Te Parau Haapiiraa e te Mau Parau Fafau 89.

14. Hi‘o Te Mau Haapiiraa a te Mau Peresideni o te Ekalesia : Iosepha Semita (2007), 321.