Pagdala sa Primary ngadto sa Panimalay

Ang Langitnong Amahan Maminaw ug Motubag sa Akong mga Pag-ampo.

Inyong magamit kini nga leksyon ug kalihokan aron makat-on og dugang kabahin sa tema sa Primary karong bulana.

Aduna ba kamoy problema nga inyong gikabalak-an pag-ayo? Si Alma ug iyang kaubang mga misyonaryo adunay gikabalak-an. Naningkamot sila sa pagtudlo sa mga katawhan nga Zoramite mahitungod ni Jesukristo, apan ang mga Zoramites dili motuo nila. Ang mga Zoramites mituo nga sila mas maayo kay sa ubang mga tawo. Kon nag-ampo sila sa simbahan, mosaka sila sa taas nga baruganan nga gitawag og Rameumptom ug mosulti sa eksakto sama nga pag-ampo matag higayon.

Nakahukom si Alma nga mag-ampo alang sa panabang. Iyang gisultihan ang Langitnong Amahan unsa siya ka subo nga ang mga Zoramites mga mapahitas-on ug dili matuohon. Mihangyo siya sa Langitnong Amahan sa paghupay kaniya ug sa iyang mga kauban ug paghatag nila og kalig-on sa ilang lisud nga misyonaryo nga buhat.

Gitubag sa Langitnong Amahan ang pag-ampo ni Alma. Iyang gihupay si Alma ug ang iyang mga kauban ug mitabang nila nga magmalig-on. (Tan-awa sa Alma 31.)

Ang Langitnong Amahan maminaw kanunay sa atong mga pag-ampo, ug Siya motubag kanato sa lain-laing mga paagi. Ang Iyang tubag dili moabut diha-diha dayon o sa paagi nga atong gilauman, apan Siya kanunay nga motubag kanato tungod kay Siya nahigugma kanato.

Mag-istorya Ta

Unsa ang ubang mga istorya sa kasulatan nga inyong nahibaloan diin ang mga tawo nag-ampo ug nakadawat og tubag? Kamo makabasa sa usa niini nga mga istorya isip pamilya ug hisguti ang pipila ka mga paagi nga ang Langitnong Amahan motubag sa atong mga pag-ampo.

Sa unsang paagi nga ang Langitnong Amahan mitubag sa inyong mga pag-ampo, ug giunsa ninyo pagkahibalo sa Iyang tubag? Unsang mga problema ninyo karon nga mahimo ninyong iampo?

Kanta ug Kasulatan

• “A Child’s Prayer,” Children’s Songbook, 12–13.

• Doktrina ug mga Pakigsaad 112:10

Mga pag-ampo diha sa mga Kasulatan

Sa ubos mao ang pipila ka mga ehemplo sa mga tawo gikan sa mga kasulatan nga nag-ampo alang sa tabang sa nagkalain-laing mga problema ug nakadawat og mga tubag. Pangitaa ang mga kahon nga magpares gikan sa matag kolum. Gamita ang mga pakisayran sa kasulatan sa kilid sa matag litrato aron sa pagtabang kaninyo.

Kinsa ang Nag-ampo	Nganong Nag-ampo Siya	Unsay Nahitabo
Rayna Ester (Esther 4–7)	Nahadlok sila nga mausab ang ilang pinulongan aron dili na sila makasabut sa usag usa.	Ang Langitnong Amahan misulti kaniya unsaon sa paghimo og mga himan ug paghimo og barko.
Nephi (1 Nephi 17:7–17; 18:1–4)	Siya kinahanglan nga masayud unsa nga simbahan ang iyang apilan.	Ang hari mitugot kaniya nga mabuhi, ug midani kaniya sa pagluwas sa iyang mga katawhan.
Joseph Smith Joseph Smith—Kasaysayan 1:10–19	Kinahanglan siyang modani sa hari sa pagpanalipod sa iyang katawhan gikan sa kalaglagan, apan siya mahimong patyon sa pag-adto nga wala imbitara.	Ang Ginoo nalooy kanila ug wala usba ang ilang pinulongan.
Ang igsoong lalaki ni Jared ug ang iyang pamilya (Ether 1:33–37)	Kinahanglan siyang mobuhat og barko aron madala ang iyang pamilya ngadto sa bag-ong yuta, apan dili siya makamao unsaon pagbuhat og barko ug walay mga himan nga gikinahanglan niya.	Ang Langitnong Amahan ug si Jesukristo nagpakita ug miingon kaniya nga dili moapil sa bisan hain sa mga simbahan.