Ako Usa ka Kristiyano

Kathy Fjelstul Craig, Arizona, USA

Ako usa ka magtutudlo sa ikaduha nga ang-ang sa usa ka komunidad diin inila ang mga Santos sa Ulahing mga Adlaw. Mao nga usa ka adlaw nasurprisa ko sa dihang usa ka higala misulti kanako kabahin sa gisulti sa laing magtutudlo mahitungod kanako. Ang magtutudlo miingon, “Nasayud ba mo nga si Mrs. Craig dili Kristiyano?”

Nagguol ko kabahin niini. Ang akong bana sulod sa 28 ka tuig bag-ohay lang namatay, ug mas naduol ko sa Manluluwas ug sa akong Langitnong Amahan kaysa sa bisan unsang panahon sa akong kinabuhi. Ako nasayud nga kinahanglan kong magpamatuod niining magtutudlo, apan dili ko sigurado kon unsaon pagbuhat niini. Dili ko gusto nga masilo siya, apan gusto usab nako nga ipahibalo kaniya nga ang mga Santos sa Ulahing mga Adlaw mga Kristiyano.

Pagkabuntag ang Espiritu Santo mihunghong kanako unsa ang akong isulti. Samtang naghigda ko sa katre, naghunahuna ko sa tanang painting nga naa sa akong panimalay kabahin sa kinabuhi ni Jesukristo. Matag painting may espesyal nga luna sa akong kasingkasing ug konektado sa espesyal nga panahon sa akong kinabuhi. Ang paghunahuna niadtong mga painting nagdala og malumong pagbati kabahin sa akong paghigugma sa Manluluwas.

Usa ka painting nagpakita sa Manluluwas nga nagpakalma sa unuson nga dagat. Kini nagpahinumdom kanako nga Siya makabuntog sa tanan ug ako, pinaagi Niya, makabuntog usab sa tanang mga butang, lakip na ang kasubo sa pagkamatay sa akong bana.

Samtang nagpadayon ko sa pagpamalandong sa mga painting, nasanapan ko sa pagbati sa pasalamat alang sa mga panalangin nga akong nadawat tungod kay namiyembro ko sa Simbahan sa Manluluwas.

Nianang buntag sa eskwelahan miadto ko sa kwarto sa akong kauban sa trabaho ug misulti kaniya nga gusto nakong masayud siya nga ako usa ka Kristiyano. Ako nangutana kaniya, “Pila ka buok painting sa Manluluwas sa inyong panimalay?” Siya miingon kanako nga imbis mga painting, siya adunay duha ka krus sa iyang panimalay.

Giingnan nako siya mahitungod sa mga painting sa Manluluwas sa akong panimalay ug unsa ang kahulugan sa mga talan-awon diha sa mga painting ngari kanako. Dayon nagpamatuod ko kabahin ni Jesukristo ug sa Iyang Pag-ula.

Gisultihan usab nako siya nga pinaagi lang sa akong kahibalo ni Jesukristo nga ako nakalahutay sa miaging tuig. Giingnan nako siya kon sa unsang paagi ang Iyang malumong mga kalooy nakatabang sa akong mga anak ug nako sa pagbuntog sa lisud nga mga panahon tungod sa pagkawala sa usa ka amahan ug bana.

Gigakos nako siya sa dihang mibiya ko, ug siya sinserong nangayo og pasaylo. Wala na ko magduhaduha nga siya nasayud nga ako, miyembro sa Ang Simbahan ni Jesukristo sa mga Santos sa Ulahing mga Adlaw, usa ka Kristiyano.