Pagkakaplag og Kadangpan diha sa Ebanghelyo
Ang mga miyembro sa Kenya naila samtang sila nagsunod sa ebanghelyo ug nagmugna og dangpanan gikan sa kalibutanong mga butang.
Uban sa populasyon nga sobra sa tulo ka milyon, ang Nairobi, Kenya, mao ang labing daghan og lumulupyo nga siyudad sa East Africa. Busy kini nga dapit nga puno sa mga sakyanan, trak, ug mutatus—mga van nga moserbisyo isip pribado nga bus—naghaguros diha sa kadalanan. Kini siyudad nga may mga riles, turismo, ug pabrika ug nahimutangan sa ikaduhang pinakakaraan nga stock exchange sa kontinente.
Apan sa habagatan, dili kaabut og lima ka milya (7 km) gikan sa sentro sa kapital nga siyudad sa Kenya, adunay malinawon nga kaumahan. Sa Nairobi National Park ang yuta giprotektahan ug makita nga wala mausab sulod sa gatusan na ka mga tuig. Duol sa siyudad, adunay mga giraffes, water buffalo, wildebeests, zebras, hippos, hartebeests, eland ug rhinos nga naglakaw-lakaw ug nanagsibsib. Ang mga leon natulog ubos sa mga punoan sa acacia. Ang parke nahimong dangpanan niining mga hayop gikan sa pangdaut sa mga tawo.
Sa tibuok Kenya adunay mas gagmay nga mga sanktwaryo nga lain og matang. Ang mga miyembro sa Simbahan nakamugna og kadangpan gikan sa pagpamugos sa kalibutan. Pinaagi sa pagsunod sa ebanghelyo, sila nakahimo og balaang mga dapit nga angay barugan (tan-awa sa D&P 45:32; 87:8).
Pag-angkon og Kalig-on pinaagi sa mga Mithi
Si Opra Ouma miingon nga ang paghinumdom sa mga mithi sa Young Women naghatag kaniya og kalig-on sa pagsunod sa ebanghelyo. “Bisan kon dili nako kauban ang mga LDS young single adult, kon anaa ko sa kalibutan, magamit nako ang mga mithi sa Young Women ug luwas ra gihapon,” miingon siya.
Si Opra unang nakakat-on niini nga mga mithi sa wala pa siya mabunyagi. Sa dihang siya 17 anyos na, usa ka adlaw nakit-an ni Opra ang mga misyonaryo diha sa kadalanan ug natingala kon si kinsa sila. Iyang gitun-an ang ebanghelyo sulod sa usa ka tuig ug nabunyagan human siya nag-18 anyos. Ang komunidad sa mga Santos sa Ulahing mga Adlaw naglig-on kaniya sa espiritwal nga paagi.
“Kon naa ko sa simbahan uban ang mga young single adult, mobati ko nga luwas ra, apan kon naa ko sa gawas, dili ko mobati nga luwas tungod kay kasagaran ako ra ang Santos sa Ulahing mga Adlaw diha sa grupo,” siya miingon. “Usahay lisud kini kay ang mga sumbanan sa kalibutan ug ang mga sumbanan sa Simbahan managlahi gayud.”
Paggunit sa Gunitanan
Ang pagtuon sa kasulatan nakatabang ni Stephen Odhiambo Mayembe nga makakaplag og mga tubag nga dili nato makaplagan kon kita-kita lang. “Pinaagi sa pagtuon sa mga kasulatan, atong makaplagan ang mga tubag sa mga problema nga atong nasinati matag adlaw,” siya miingon. “Ug usab pinaagi sa pagtuon sa mga kasulatan, naghatag kini kanato og kaisug sa paglahutay hangtud sa katapusan tungod kay ang mga kasulatan anaa kanunay sa pagtudlo ug paggiya kanato kon unsay buhaton.”
Ang pagtuon sa Basahon ni Mormon nakatabang ni Stephen nga makaangkon og pagpamatuod sa Simbahan. Atol sa iyang pagbisita sa iyang tiya nga miyembro, ang iyang tiya midapit kaniya sa pagsimba. Sa dihang nagbasa na siya sa Basahon ni Mormon, siya nag-ampo aron masayud kon kini ba tinuod ug nakadawat og tubag.
Siya miingon nga ang pagbasa sa mga kasulatan kanunay nakatabang niya nga makatuman sa mga sumbanan sa Simbahan bisan kon kadtong nagpalibut nagsaway sa iyang mga gituohan. “Pinaagi sa pagkahimong miyembro sa Simbahan, ang akong hugot nga pagtuo nalig-on, ug pinaagi niana ako makasulti nga ako dili matarug [tan-awa sa Jacob 7:5],” siya miingon.
Naghulat sa Ginoo
Nakaplagan ni Sharon Poche nga ang pagdesisyon nga malahi sa uban makapasayon sa pagsunod sa ebanghelyo. Siya mapasaligon sa pagsunod sa mga sugo, ug ang iyang mga higala mitahud niana nga pagpili. Siya mipili nga maglikay sa mga sitwasyon nga makapalisud nga magpakabuhi nga matarung.
“Kon kamo modesisyon nga maanaa niana nga sitwasyon, kanang lisud kaayo nga sitwasyon, mas lisud kini kay mahimo kang madala sa tintasyon,” siya miingon kabahin sa linya sa maayo ug dautan.
Nakaplagan ni Sharon ang Simbahan niadtong 14 anyos pa siya sa dihang ang iyang mama mihukom nga magpabunyag. Nanlimbasug siya sa pagbasa sa Basahon ni Mormon tungod kay si Sharon, miyembro sa Nandi nga tribo, makasulti lang og Kalenjin nga maoy iyang lumad nga pinulongan. Bisan pa sa kalisud, siya misugod sa pagtuon sa Basahon ni Mormon sa Iningles. “Mibati ko nga kini maayo nga butang, ug init ang akong pagbati, busa nagpadayon ko. Nag-ampo ko hangtud nga akong nasayran nga kini tinuod,” siya miingon.
Gusto ni Sharon nga magpabunyag, apan dili motugot ang iyang amahan. Busa sulod sa upat ka tuig, si Sharon misimba, miapil sa seminary ug sa mga kalihokan sa mga batan-on samtang iyang gipaabut ang kahigayonan nga mamiyembro sa Simbahan.
Sa dihang si Sharon nag-18 anyos na, siya nabunyagan ug nakumpirmahan. Siya mieskwela sa kolehiyo ug nagtuon og psychology. Iyang giminyoan si Joseph Poche niadtong Pebrero 2013. Sa wala madugay, sila mibiyahe ngadto sa Templo sa Johannesburg South Africa aron mabugkos. Siya miingon nga ang pagtuon sa ebanghelyo nakatabang niya sa pag-focus sa importanting mga butang sa kalibutan nga daling makapalinga.
“Nasayud ko kon unsa ang kinabuhi ug nganong ania kita dinhi sa yuta,” siya miingon. “Kana nga kahibalo nakatabang kanako sa pag-focus sa mga butang nga labing importante.”
Naglambo nga Kalig-on
Sulod sa Nairobi National Park mao ang santuwaryo alang sa itom nga rhinos. Kini nga pasilidad mopatubo ug mobalhin niining nihit na [endangered] nga mga hayop ngadto sa ubang mga parke aron modaghan pag-usab, nga hapit na mahurot tungod sa pagpangayam. Kini naila nga usa sa pinakamalampuson ug pinakaimportante nga santuwaryo sa Kenya.
Sa samang paagi, ang ebanghelyo naghatag og santuwaryo diin ang mga miyembro sa Simbahan makadangop, makadawat og kalig-on, makaangkon og kaisug sa pagpakatap sa ebanghelyo, ug maka-establisar og lig-ong depensa sa pagtuo.
Opra Ouma
Stephen Odhiambo Mayembe
Joseph ug Sharon Poche
Sa ubos: Mga rhinos nagsibsib sa Nairobi National Park.