UPAT KA mga Pulong nga Mogiya Kaninyo
Gikan sa usa ka debosyonal nga pakigpulong sa Unibersidad sa Brigham Young nga gihatag niadtong Enero 16, 1973.
Ang Dios mogiya kaninyo sa inyong determinasyon sa pagserbisyo Kaniya ug pagsunod sa Iyang mga sugo samtang kamo maminaw, samtang kamo magkat-on, samtang kamo magtrabaho, ug samtang kamo mohigugma.
Mihimo ako og pipila ka mga resolusyon nga gusto nakong ipagkigbahin kaninyo, nanghinaut nga kamo usab moapil sa sama nga mga pagpili. Una, ako maminaw. Ikaduha, ako magkat-on. Ikatulo, ako motrabaho. Ug ikaupat, ako mohigugma. Kining upat ka mga pulong makadeterminar sa atong kapalaran.
Maminaw
Ako manghinaut nga kamo maminaw sa inyong inahan ug amahan, nga ang matag usa magluhod matag buntag ug matag gabii, mag-ampo alang ninyo, naghangyo sa atong Langitnong Amahan sa pagbantay ug paggiya kaninyo sa inyong mga pagpili, nga kamo magmatngon sa inyong kinaiya. Ako nagtuo nga kon kita moila sa atong mga ginikanan ug sa kamatuoran nga sila nabalaka alang kaninyo ug kanako, niana gitahud nato sila, ug ang mga pulong nga milanog gikan sa Bukid sa Sinai adunay personal nga kahulugan: “Tahuron mo ang imong amahan ug ang imong inahan” (Exodo 20:12).
Mosalig ko nga maminaw kita sa mga pulong sa mga propeta. Manghinaut usab ako nga maminaw kita sa mga hung-hong sa Balaan nga Espiritu. Mosaad ko kaninyo nga kon kita tinud-anay nga maminaw sa Balaang Espiritu, kon adunay usa ka tinguha sa pagkamatarung sa atong kasingkasing, ug ang atong kinaiya nagpakita niana nga tinguha, kita magiyahan niana nga Balaang Espiritu.
Ako naglaum nga ako maminaw gayud sa mga paghunghong sa Balaang Espiritu, nga panahon sa matag adlaw sa tuig kamo ug ako adunay oportunidad sa pagtubag sa mga pag-aghat ug impluwensya sa atong Langitnong Amahan. Busa, ako mosaad nga maminaw.
Magkat-on
Ang ikaduha, ako magkat-on. Dili igo nga maminaw lang kon kita wala magkat-on. Ako mohimo og panumpa nga ako magkat-on og daghan gikan sa mga kasulatan ug, hinaut, nga kamo usab aduna niana nga pribelihiyo. Dili ba talagsaon kon mosulod sa atong mga kasingkasing kana nga tambag gikan sa Ginoo, “Pangitaa ninyo gikan sa labing maayo nga mga basahon ang mga pulong sa kaalam; pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo” (D&P 88: 118). Magkat-on kita gikan sa sumbanan nga mga kasulatan, apan magkat-on usab kita gikan sa kinabuhi sa mga lider sa Simbahan ug sa mga kinabuhi niadtong kinsa suod nato.
Sama pananglit, ako nagtuo nga ako makat-on og pasensya pinaagi sa pagtuon sa kinabuhi sa atong Ginoo ug Manluluwas. Mahunahuna ba ninyo ang kasubo nga Iyang gibati, nahibalo nga Siya aduna sa mga yawe sa kinabuhing dayon, nasayud nga Siya adunay paagi alang kaninyo ug kanako nga makasulod sa celestial nga gingharian sa Dios, sa dihang Iyang gisangyaw ang Iyang ebanghelyo ngadto sa mga tawo tunga-tunga sa panahon ug nakakita nila nga misalikway Kaniya ug misalikway sa Iyang mensahe? Apan Siya mipakita og pasensya. Iyang gidawat ang Iyang mga responsibilidad sa kinabuhi, gani ngadto sa krus, sa Tanaman sa Getsemani sa wala pa kini. Manghinaut ako nga makat-on og pasensya gikan sa Ginoo.
Ako moawhag nga kamo moapil nako sa usa ka panumpa, ako magkat-on.
Motrabaho
Dayon, ikatulo, nga ako motrabaho. Dili igo nga mangandoy, dili igo nga magdamgo, dili igo nga mosaad. Kita kinahanglang mobuhat. Ang Ginoo miingon, “Siya nga mogalab sa iyang sanggot uban sa iyang kusog … sama ra nga nagtigum og panalangin nga siya dili mahanaw” (D&P 4:4; emphasis gidugang). Ug si Nephi mipahayag, “Ako moadto ug mobuhat sa mga butang nga ang Ginoo nagsugo” (1 Nephi 3:7). Si Santiago ang nagtingob niini nga leksyon: “Hinoon tumana ninyo ang pulong, ug dili kay magpaminaw ra kamo niini, nga sa ingon ginalimbongan kamo sa inyong kaugalingon” (Santiago 1:22).
Usa ka panahon sa ting-init daghang tuig na ang milabay, sama pananglit, ako walay gibuhat nianang katapusan sa semana. Apan ang Espiritu miaghat kanako sa pagtuman sa usa ka responsibilidad. Misakay ko og eroplano padulong sa California. Sa akong paglingkod, ang lingkuranan tupad nako bakante. Hinoon, sa wala madugay duna nay naglingkod nga usa ka matahum nga batan-ong babaye. Akong namatikdan nga nagbasa siya og libro. Sa kasagaran nga maoy buhaton, mipasiplat ko sa ulohan. Libro kadto sa usa ka sakop sa Korum sa Napulog Duha Ka mga Apostoles. Miingon ko niya, “O, usa gyud ka Mormon.”
Mitubag siya, “Ah, dili. Nganong nangutana ka?”
Mitubag ko: “Kining, nagbasa ka og libro nga gisulat sa usa ka inila kaayo nga miyembro sa Ang Simbahan ni Jesukristo sa mga Santos sa Ulahing mga Adlaw.”
Miingon siya, “Mao ba? Usa ka higala mihatag niini kanako, apan wala kaayo koy nahibaloan niini. Hinoon, nakapakuryuso kini nako.”
Dayon ako naghunahuna. Kinahanglan ba kong magmaisugon ug mosulti og dugang pa bahin sa Simbahan? Ug ang mga pulong ni Pedro: “Kinahanaglang andam kamo kanunay” (1 Pedro 3:15). Ug ako mihukom nga kini mao ang higayon nga ako mohatag sa akong pagpamatuod. Kadto akong pribilehiyo sa pagtubag sa iyang mga pangutana kabahin sa Simbahan—intelihenteng mga pangutana gikan sa usa ka kasingkasing nga nangita sa kamatuoran. Nangutana ako kon mahimo bang mobisita ang mga misyonaryo kaniya. Nangutana ako kon ganahan ba siyang motambong sa among branch sa mga single adult sa San Francisco. Positibo ang iyang mga tubag. Sa nakapauli na ko, akong gisulatan ang presidente sa stake ug gipasa ngadto niya kini nga impormasyon. Inyo bang mahunahuna ang akong kalipay sa dihang ako nakadawat og tawag gikan sa presidente sa stake, diin siya miingon nga siya nahimong pinakabag-o nga miyembro sa Simbahan. Nalipay ako pag-ayo.
Ako nakaamgo nga ako adunay responsibilidad nga motrabaho.
Mohigugma
Ug dayon ang katapusang panumpa: ako mohigugma. Nakahinumdom ba kamo sa tubag nga gihatag sa Manluluwas ngadto sa abogado kinsa nangutana, “Magtutudlo, unsa man ang dakong sugo sa kasugoan?”
Ug mitubag Siya, “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan. “Mao kana ang dako ug unang sugo. Ug ang ikaduha sulosama ra, nga mao kini, Higugmaa ang imong silingan sama sa imong kaugalingon” (Mateo 22:36–39).
Ang taga-England nga tagsulat og dula nga si William Shakespeare misulat, “Sila wala mahigugma nga dili mopakita sa ilang gugma.”1 Sa unsang paagi kaha nga kamo ug ako makapakita sa atong gugma sa Dios ug gugma alang sa atong isigkatawo? Pinaagi sa pagsunod sa mga sugo sa Dios ug sa tambag sa Iyang mga sulugoon. Kita dunay pribilehiyo sa pagsunod sa balaod sa ikapulo, sa pagsunod sa balaod sa moralidad, sa pagsunod sa matag aspeto sa atong mga kinabuhi sa pulong sa atong Langitnong Amahan.
Ang atong Langitnong Amahan makapasalamat sa atong gugma alang Kaniya pinaagi sa atong pagserbisyo Kaniya ug sa atong pagserbisyo sa atong isigkatawo.
Ang Pagpili Inyoha
Upat ka mga panumpa: ako maminaw, ako magkat-on, ako motrabaho, ako mohigugma. Samtang tumanon nato kini nga mga panumpa, kita makabaton sa giya sa atong Langitnong Amahan ug makasinati og tinuod nga kalipay sa atong mga kinabuhi.
Ang pagpili inyoha, ug ang pagpili akoa, naghinumdom nga ang atong mga pagpili, ang atong mga desisyon modeterminar sa atong kapalaran. Ang Dios mogiya kaninyo sa inyong determinasyon sa pagserbisyo Kaniya ug pagsunod sa Iyang mga sugo samtang kamo maminaw, samtang kamo nagkat-on, samtang kamo motrabaho, ug samtang kamo mohigugma.