Trabaho Serbisyo ug Espirituhanon nga Pagpaningkamot sa Kaugalingon
Ang mga panalangin sa pagtrabaho ug pagserbisyo molapas pa sa temporal nga tabang.
Pagpahimutang sa bika [Bricklaying] sa edad nga 16
Ang pagkat-on unsaon sa pagtrabaho mahinungdanon samtang batan-on pa kamo. Ang pisikal nga pagtrabaho nga lisud kabahin sa kinabuhi. Sayo nakong nakat-unan kana nga leksyon sa dihang gitawag ko og espesyal nga Church-service mission sa pagtabang og tukod og mga meetinghouse. Nag-edad pa ko og 16 anyos ug bag-o lang nakagradwar gikan sa eskwelahan. Ako gipadala ngadto sa pundok nga magpahimutang og bika. Lisud kadto nga buluhaton, apan ganahan ko niadto.
Gigrupo-grupo kami ug gikan sa Sweden, diin ko nagpuyo, ngadto sa ubang mga nasud nga duol. Sa kada dapit makigsabut kami nga mopuyo uban sa miyembro sa lokal nga ward. Natandog ko sa pagkaandam sa buotan, lig-ong mga miyembro sa Simbahan sa pag-abli sa ilang mga panimalay ug sa paghatag unsay anaa nila. Bisan og nagkalisud sila sa kwarta, nagtinguha sila sa pagserbisyo.
Kadaghanan sa batan-ong mga lalaki nga gitawag sa mga Church-service mission mas edaran, apan sa akong sitwasyon ako nag-edad og 16. Sa wala madugay ako mialagad og proselyting nga misyon sa dihang nag-edad ko og 19. Sa dihang ang akong igsoong lalaki ug ako nakadawat og mga calling, ang akong amahan miduol kanamo ug miingon, “Bisan tuod og kini temporaryo nga makabalda sa inyong padayon nga pagtuon, ako gusto nga adunay mga anak nga makat-on og sayo nga moserbisyo sa Simbahan. Ang pag-angkon niana nga kasinatian mao ang pundasyon sa paagi sa inyong pag-atubang sa kinabuhi.” Karon, ang pagtubag sa tawag sa pagserbisyo og proselyting nga misyon usa ka prayoridad alang sa batan-ong mga lalaki.
Sa dihang nakadawat ko og tawag sa pagserbisyo niini nga misyon, nakulbaan ko og gamay, apan wala ko magduhaduha sa pagdawat niini. Gitudloan ko sa gamay pa aron moingon og oo sa dihang gihangyo sa pag-alagad sa bisan unsang kapasidad alang sa buhat sa Ginoo. Mao nga, labaw pa kay sa kakulba, mibati ko og kadasig. Usa kadto ka talagsaon nga kasinatian aron sa pagtabang og tukod sa mga meetinghouse sa Simbahan.
Pag-angkon og Pagpamatuod ug Pagpaningkamot sa Kaugalingon
Nasayud ko nga pinaagi sa pagserbisyo sa uban nga kita makaangkon og gugma ug pagpamatuod sa ebanghelyo. Sa panahon nga ako layo gikan sa akong pamilya isip usa ka batan-ong lalaki, nakakat-on ko nga kinahanglan kong moangkon og responsibilidad sa akong kinabuhi—dili lamang sa pisikal apan usab sa espirituhanong paagi. Nakat-unan usab nako kon unsaon sa pagpaminaw ug pagsunod sa mga aghat sa Espiritu.
Apan kadtong mga pagbati ug mga abilidad wala lamang moabut atol sa akong panahon isip usa ka Church-service missionary. Ang akong pagpamatuod ug ang akong tinguha sa pagserbisyo nagsugod sa wala pa kini.Isip usa ka batan-on ako maulawon, ug gani ako maglisud sa pagpakigsulti tungod sa akong ka kulang sa pagsalig. Apan sa hinay-hinay, samtang ako miapil sa pagserbisyo, ako nalig-on—sa hinay-hinay. Gihatagan ako og mga oportunidad sa pagkat-on, pagserbisyo, ug paglambo pinaagi sa mga calling ug mga buluhaton sa among branch. Ako nahimong matinguhaon nga moapil (tan-awa sa D&P 58:27). Akong nakat-unan nga sa kinabuhi, diin kamo magsugod dili mao kon asa kamo matapos; ang punto sa pagsugod mao ang sinugdanan sa kausaban sa kinabuhi.
Usa ka Saad nga Motabang Kanato
Ang yawe sa paghimo niana nga kausaban mao ang kanunay nga paghinumdom kinsa kita. Mga anak kita sa Langitnong Amahan. Ang matag usa nato natawo uban ang usa ka saad: kon kita makahimo ug magpabiling matinud-anon sa mga pakigsaad ug mobuhat sa atong pinakamaayo sa atong mga kahimtang, mga talento ug abilidad, niana kita makabalik ngadto sa atong Langitnong Amahan uban sa pasidungog. Kabahin kana sa atong mahangturon nga panglantaw, ug kinahanglan nga mahinumdom nga kita wala mag-inusara. Ang Langitnong Amahan mohatag nato sa gahum ug abilidad sa pag-atubang sa atong mga hagit.
Pinaagi sa mga kasinatian nga akong nasinati samtang nagserbisyo sayo sa kinabuhi nga ako misugod sa pag-establisar sa akong pagsalig sa Ginoo. Doktrina ug mga Pakigsaad 121:45 nag-awhag nato sa paghimo nga ang atong “pagsalig mosamot pagkalig-on diha sa atubangan sa Dios.” Kon kamo moapil sa pagserbisyo sa Ginoo, kamo mobati sa Iyang Espiritu, kamo mobati sa Iyang gugma, ug kamo makasabut nga, bisan kini nga kinabuhi usa ka pagsulay, kamo wala mag-inusara. Kon kamo magpuyo nga matarung ug kamo moserbisyo, kamo hatagan og tabang ug gahum lapas sa inyong kaugalingon.