Mensahe sa Unang Kapangulohan
Pag-ila, Paghinumdom, ug Pagpasalamat
Ang Dios nagsugo nga kita magpasalamat Kaniya sa tanang panalangin nga atong nadawat gikan Kaniya. Sayon para nato nga ibalik-balik ang atong mga pag-ampo sa pasalamat, kanunay balik-balikon ang samang mga pulong apan walay intensyon sa pagpasalamat isip gasa sa kasingkasing ngadto sa Dios. Kita kinahanglang “mohatag og mga pasalamat … pinaagi sa Espiritu” (D&P 46:32) aron kita makabati og tinuod nga pasalamat sa gihatag sa Dios kanato.
Unsaon nato paghinumdom bisan usa ka bahin sa tanang nabuhat sa Dios alang kanato? Girekord ni Apostol Juan ang gitudlo sa Manluluwas kanato kabahin sa gasa sa paghinumdom nga madawat pinaagi sa gasa sa Espiritu Santo: “Apan ang Manlalaban, ang Espiritu Santo, nga sa akong ngalan igapadala sa Amahan, siya mao ang magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo” (Juan 14:26).
Ang Espiritu Santo mopahinumdom sa gitudlo sa Dios ngari kanato. Ang pagpanalangin sa Dios mao ang Iyang usa ka paagi sa pagtudlo nato; ug busa, kon kita mopili sa paggamit sa hugot nga pagtuo, ang Espiritu Santo mopahinumdom kanato sa kamabination sa Dios.
Inyo kining masulayan diha sa pag-ampo karon. Mahimong inyong sundon ang sugo nga “Kamo mopasalamat sa Ginoo nga inyong Dios sa tanan nga mga butang” (D&P 59:7).
Si Presidente Ezra Taft Benson (1899–1994) misugyot nga ang pag-ampo oportunidad sa pagbuhat niana. Siya miingon: “Si Propeta Joseph Smith miingon kausa nga usa sa dakong sala nga sad-an ang mga Santos sa Ulahing mga Adlaw mao ang sala sa pagkadili mapasalamaton. Nagtuo ko nga kadaghanan nato wala maghunahuna niini nga dako nga sala. Kita adunay dakong kalagmitan sa atong mga pag-ampo ug pangamuyo sa Ginoo sa pagpangayo og dugang mga panalangin. Apan mibati ko nga kinahanglang mas atong ipahinungod ang atong mga pag-ampo sa pagpasalamat sa mga panalangin nga atong nadawat na. Daghan kaayo ang atong nadawat.”1
Makaangkon kamo og sama nga kasinatian sa gasa sa Espiritu Santo karon. Makasugod mo sa usa ka pribado nga pag-ampo uban sa pasalamat. Mahimong sugdan ninyo sa pag-ihap inyong mga panalangin ug dayon mohunong og kadiyot. Kon kamo mogamit sa hugot nga pagtuo, uban sa gasa sa Espiritu Santo, inyong mahinumduman ang uban pang mga panalangin. Kon kining tanan inyong pasalamatan, ang inyong pag-ampo mas taas kaysa naandan. Kamo mahinumdom, ug magmapasalamaton.
Mahimong ingon niini ang inyong buhaton samtang kamo magsulat sa inyong journal. Ang Espiritu Santo nakatabang niining paagiha sa mga tawo sukad sa sinugdan sa panahon. Kamo makahinumdom nga ang basahon ni Moises miingon, “Ug ang usa ka basahon sa handumanan gitipigan, diin nahisulat, sa pinulongan ni Adan, kay kini gihatag ngadto kutob sa gitawag sa Dios sa pagsulat pinaagi sa espiritu sa pagdasig” (Moises 6:5).
Si Presidente Spencer W. Kimball (1895–1985) mihulagway niining paagi sa dinasig nga pagsulat: “Kadtong naghimo og basahon sa handumanan mas makahinumdom sa Ginoo sa ilang inadlaw-adlaw nga kinabuhi. Ang journal usa ka paagi sa pag-ihap sa atong mga panalangin ug pagtipig og listahan niining mga panalangin para sa atong kaliwatan.”2
Samtang kamo mosugod sa pagsulat, makapangutana mo sa inyong kaugalingon, “Sa unsang paagi ang Dios mipanalangin nako ug sa akong mga minahal karon?” Kon kini kanunay ninyong buhaton ug may hugot nga pagtuo, inyong makaplagan inyong kaugalingon nga naghinumdom sa mga panalangin. Ug usahay kamo makahinumdom sa mga gasa nga wala ninyo mamatikdi nianang adlawa apan inyo dayong maamguhan ang impluwensya sa Dios sa inyong kinabuhi.
Ako nag-ampo nga kita magpadayon nga maningkamot uban sa hugot nga pagtuo sa pag-ila, paghinumdom, ug pagpasalamat sa nahimo ug ginahimo sa atong Langitnong Amahan ug Manluluwas sa pag-andam sa agianan balik ngadto Kanila.
Pagtudlo niini nga Mensahe
Sa iyang mensahe, si Presidente Eyring nagdapit kanato sa paghinumdom sa kamabination sa Langitnong Amahan diha sa atong mga pag-ampo. Hisguti niadtong inyong gitudloan kon sa unsang paagi ang pag-ampo uban sa pasalamat makatabang nato sa pag-ila sa impluwensya sa Dios sa atong kinabuhi. Ikonsiderar nga magluhod kon mag-ampo uban niadtong inyong tudloanan ug isugyot niadtong kinsa mag-ampo nga magpasalamat lang.
Makatuon usab mo sa kaimportante sa pagpasalamat pinaagi sa pagbasa niini nga mga bersikulo agi og dugang sa mga bersikulo nga gihisgutan ni Presidente Eyring: Salmo 100; Mosiah 2:19–22; Alma 26:8; 34:38; Doktrina ug mga Pakigsaad 59:21; 78:19; 136:28.