Alang sa Kalig-on sa mga Kabatan-onan
Kita “Mamulong” subay Niini nga mga Butang
Ang mga pulong nga atong gigamit nagpakita sa mga pagbati sa atong kasingkasing ug kon kinsa gayud kita.
Samtang nagserbisyo isip bishop, usa ka talagsaon nga batan-ong lalaki misulod sa akong opisina alang sa interbyu. Samtang kami nag-istoryahanay, iyang nahisgutan nga ang iyang dakong problema mao lamang ang pagpamalikas. Kanunay siyang makadungog og bulgar nga pinulongan sa iyang palibut, ug siya usab nagsugod pagpamalikas. Siya miingon nga siya naningkamot nga mohunong apan wala magmalampuson, ug gusto siya og mga tambag kon unsaon kaha niya sa paghunong sa ngil-ad nga mga pinulongan.
Nakahunahuna dayon ko sa mga sugyot nga susama sa unsay makita karon sa Alang sa Kalig-on sa Kabatan-onan: “Kon kamo naanad sa paggamit sa pinulongan nga wala mahisubay niini nga mga sumbanan—sama sa pagpamalikas, sa pagbugal-bugal, pagpanglibak, o pagsulti diha sa kasuko ngadto sa uban—kamo makausab. Pag-ampo alang sa panabang. Hangyoa ang inyong pamilya ug mga higala sa pagsuporta kaninyo.”1 Nindot unta kon kini nga tambag diha na sa Alang sa Kalig-on sa Kabatan-onan niadtong higayona.
Usa ka Kasinatian sa Akong Pagkabatan-on
Gisultian nako kini nga batan-ong sa usa ka kasinatian nga akong nasinati isip batan-on sa usa ka palibot diin ang dili angay nga mga pinulongan gigamit kanunay. Ingon nga kon ako makadungog og bisan unsa nga matang sa pagpamalikas, kadto nga mga pulong mas sayon nga mosulod sa akong hunahuna kay sa maayo nga panghunahuna nga gusto nako. Usa ka talagsaon nga lider sa priesthood misulti nako nga ang hunahuna sama sa usa ka milagrosong himan nga tipiganan ug nga kita makatangtang dayon sa dili maayong hunahuna pinaagi sa pagpuli niini sa mga butang nga dalaygon.
Usa ka higala ug ako mihukom sa pagbuhat lamang niana. Among gisag-ulo ang duha ka mga himno, “Nagkinahanglan Ko Nimo Matag Takna” (Mga Himno ug mga Awit sa mga Bata, nu. 12) ug “More Holiness Give Me” (Hymns, nu. 131), ug ang ikatrese nga artikulo sa hugot nga pagtuo. Nagkauyon kami nga kon si bisan kinsa namo mosulti og butang nga dili angay, mokanta dayon kami sa usa sa mga himno o mokutlo sa artikulo sa hugot nga pagtuo.
Dayon nakamatikod kami nga dili kami gusto nga mokanta og kusog sa mga himno sa pila ka mga dapit. Maulaw kaayo mi! Mao nga among kutloon ang ikatrese nga artikulo sa hugot nga pagtuo, nagpasabut og maayo sa bahin, “Kon adunay bisan unsa nga mahiyason, matahum, o maayo og dungog o dalaygon, kami naninguha sa pagpangita niining mga butanga.” Nagsilbi kini! Among nadiskobrehan nga kon isulti namo kini pag-usab, ang dili maayong mga hunahuna mawala. Pinaagi sa pag-usab sa usa ka pulong, nakahimo usab kami og motto: “Kita mamulong subay niini nga mga butang!” Kon bisan kinsa namo mosulti niini nga mga pulong, kami maghunahuna, “Ang akong mga pulong ba tinuod, maputli, maloloy-on, mahiyason, matahum, o maayo og dungog o dalaygon?” (tan-awa sa Mga Artikulo sa Hugot nga Pagtuo 1:13). Kon dili mao, kami nasayud nga kami adunay buluhaton.
Unsay Atong Mahimo
Nagpuyo kita sa panahon nga adunay daghan nga dili balaanon, bastos, ug bulgar. Tingali imposible nga makapanalipod sa atong kaugalingon sa pagpaminaw o sa pagtan-aw sa mga butang nga gusto natong likayan. Ang yawe mao nga kita mosiguro nga dili gikan nato ang mga butang nga dili balaanon, bastos, o bulgar. Si Pablo mibati niini sa dihang siya miingon, “Kinahanglang walay sulting mahilas nga magagula gikan sa inyong ba-ba” (Taga-Efeso 4:29).
Akong nakita ang ubang kabatan-onan nga mogamit og dili angay nga mga pinulongan tungod kay nagtuo sila nga makatabang kini nga sila dawaton ug ang uban mogamit niini tungod sa tinguha nga mailhan. Gani, kini mao ang dakong mga rason nganong ang kabatan-onan magsugod niini nga kinaiya.
Nakadayeg ako pag-ayo niadtong kabatan-onan nga “maningkamot nga mahimong lahi”2 sama sa batan-ong lalaki uban sa usa ka higala sa dili miyembro kinsa himalikas kanunay. Matag higayon nga ang iyang higala mamalikas, tarungon niya sa paghangyo siya sa paghunong. Sa katapusan ang iyang higala mihunong. Ang higala nakadayeg kaayo kaniya ug sa paagi sa iyang pagpakabuhi nga gusto siyang makat-on og dugang pa mahitungod sa Simbahan. Sa wala madugay, siya gibunyagan.
Unsay atong gibati sa atong mga kasingkasing maoy atong gihunahuna, ug unsay atong gihunahuna maoy atong masulti. Busa, tinuod nga ang mga pulong nga atong gigamit mopakita sa mga pagbati sa atong mga kasingkasing ug kon kinsa gayud kita.
Sama sa maayo kaayong pagkapahayag sa Alang sa Kalig-on sa Kabatan-onan: “Limpyo ug intelihente nga pinulongan mao ang ebidensya sa usa ka maalamon ug limpyo nga hunahuna. Ang maayo nga mga pinulongan nga makapabayaw, makapadasig, ug makatabang sa uban nagdapit sa Espiritu nga makig-uban kaninyo.”3
Ang matag usa nato makatagamtam sa mga panalangin sa pagbaton sa Espiritu kanunay uban nato, sama sa gisaad kon kita moambit sa sakrament matag adlaw nga Igpapahulay. Kini mag-agad nato—kon unsaon nato sa pagbuhat, unsay atong buhaton, ug, oo, bisan unsa ang atong isulti. Manghinaut ako nga atong gamiton ang atong mga pulong dili sa pagpasipala o paglibak apan sa pagpakita nga kita mga sumusunod sa atong Manluluwas, gani si Jesukristo.