Limpyo nga Pinulongan

Ang mga pulong nga atong gisulti makapamatuod ni Kristo, makahupay sa nanginahanglan, makadayeg sa usa ka higala, o makapadayag og gugma sa sakop sa pamilya. Kita usab makasulti og mga pulong nga makapasakit sa emosyon, makapakatap sa libak, makapasipala, o makapaubos. Ang pagtabang sa inyong mga anak nga mogamit og limpyo nga pinulongan modala og kalinaw ug pagdasig sa inyong panimalay. Niining isyu karong bulana sa mga pahina 60–61, si Larry M. Gibson sa kinatibuk-ang kapangulohan sa Young Men naghisgot sa kaimportante sa limpyo nga pinulongan:

“Unsay atong gibati sa atong mga kasingkasing maoy atong gihunahuna, ug unsay atong gihunahuna maoy atong masulti. Busa, tinuod nga ang mga pulong nga atong gigamit mopakita sa mga pagbati sa atong mga kasingkasing ug kon kinsa gayud kita. …

“Ang matag usa nato makatagamtam sa mga panalangin sa pagbaton sa Espiritu kanunay uban nato, sama sa gisaad kon kita moambit sa sakrament matag adlaw nga Igpapahulay. Kini mag-agad nato—kon unsaon nato sa pagbuhat, unsay atong buhaton, ug, oo, bisan unsa ang atong isulti.”

Mga Sugyot sa Pagtudlo sa mga Batan-on

Basaha uban sa inyong pamilya ang seksyon kabahin sa pinulongan diha sa Alang sa Kalig-on sa mga Kabatan-onan (mga pahina 20–21). Hisguti kon unsa ang buhaton kon ang naglibut kaninyo mogamit og dili maayo nga mga pinulongan.
Basaha ang artikulo ni Brother Gibson sa mga pahina 60–61. Gamita ang iyang artikulo sa paghimo og mga tumong aron sa pagtabang sa usag usa nga mogamit og limpyo nga pinulongan.
Tun-i ug hisguti ang mga kasulatan nga gilista diha sa tuo.
Basaha “Ang Pagpili sa Dili Paglibak” sa pahina 59 niini nga isyu ug hisguti ang kadaut nga mahimo sa paglibak. Hisguti nganong mahitabo ang pagpanglibak ug unsaon sa paglikay niini.
Tan-awa ang video ug basaha ang mga artikulo sa mga batan-on kabahin sa gahum sa pinulongan. Adto sa youth.lds.org ug i-klik ang tab nga “For the Strength of Youth”. I-klik ang “Language.” Sa tuo nga bahin sa pahina mao ang seksyon sa “Related” nga nagpakita og mga video sama sa “No Cussing Club” ug mga artikulo sa mga batan-on kabahin sa dili ipakaubos ang uban.

Mga Sugyot sa Pagtudlo sa mga Bata

Ikonsiderar ang pagbasa sa “Ang mga Pulong nga Atong Isulti” (Rosemary M. Wixom, Liahona, Mayo 2013, 81); “Kadto nga mga Pulong” (Liahona, Dis. 2011, 60); o “Usa ka Malumo nga Tubag” (Liahona, Hunyo 2011, 70). Hisguti kon unsay atong bation kon kita mosulti og nindot nga mga butang sa usag usa.
Ihisgut ang mga butang nga dili angay isulti sa inyong panimalay. Paghimo og mga tumong nga mosulti og “palihug” ug “salamat” ug mas modayeg.
Ihisgut kon sa unsang paagi ang tanan mas malipayon kon kita mabination sa usag usa. Kantaha ang “Kindness Begins with Me [Pagkamabination Magagikan Kanako]” (Children’s Songbook, 145) o laing mga kanta mahitungod sa pagkamabination.