Padayon

Steven Scott Stokes, North Carolina, USA

Sa hapit na ko mogradwar sa kolehiyo, ang akong asawa ug ako namalandong sa duha ka pangutana: kon kanus-a kami magsugod sa pagpanganak ug asa paingon human sa gradwasyon. Migahin kami og daghang panahon sa paghisgut niining mahagitong mga isyu apan walay nahimo nga solusyon.

Usa ka Dominggo niana, ang among panag-istorya nahimong debati, dayon nahimo kining panaglalis. Nianang higayona, ang doorbell mibagting. Nasuprisa kami sa pagkakita nga ang among mga home teacher nagbarug sa pultahan.

Gipasulod namo sila ug naminaw sa ilang mensahe. Usa sa among mga home teacher misugod sa pag-istorya kabahin ni Moises ug sa anak sa Israel nga mieskapo gikan sa Ehipto. Pag-abut sa mga anak sa Israel sa mga kabaybayunan sa Pulang Dagat, dili na sila makapadayon, ug ang mga Ehiptuhanon hapit na moabut. Ang mga kasulatan nag-ingon nga ang mga anak sa Israel “nangahadlok sila pag-ayo” (Exodo 14:10). Sa dihang si Moises nag-ampo alang sa giya, ang Ginoo mitubag, “Ngano ba nga nagatuaw ikaw kanako? Ingna ang mga anak sa Israel nga magapadayon sila” (Exodo 14:15).

Samtang ang among home teacher nagbasa niana nga kasulatan, ang mga pagbati sa kahigawad ug kahadlok nahanaw. Ang akong asawa ug ako nakaamgo nga kami naglingkod sa daplin sa Pulang Dagat naghunahuna kon unsay buhaton aron “makita ang kaluwasan ni Jehova” (Exodo 14:13), kinahanglan kami nga magpadayon.

Sa among sitwasyon, ang pagpadayon nagpasabut nga mohimo og sinabutan nga desisyon, magtrabaho sa makugihon, ug mosalig sa Ginoo. Kinahanglan kaming mohunong sa pagdebati ug magsugod sa paglihok pinaagi sa hugot nga pagtuo. Samtang kami nagsunod sa giya sa Ginoo, ang dagat sa mga pagpili diha sa among atubangan naiway, ug kami nakalakaw nga wala maunsa. Mapasalamaton kami sa mga panalangin nga among nadawat tungod sa pagpadayon pinaagi sa hugot nga pagtuo ug sa mga home teacher nga nagdasig namo sa paghimo sa unang mga lakang.