Nahigmata Ko sa Ebanghelyo

Pangalan gipugngan, France

Nagdako ko sa mga ginikanan nga dili motuo og Dios ug isip batan-on mibati ko nga ang akong kinabuhi maayo ra nga walay Dios. Apan kana nausab niadtong 1989, sa dihang mibuto ang akong large intestine [dakong tinai], ug na-coma ko og walo ka adlaw.

Wala kaayo ko kahinumdom sa higayon nga anaa ko sa ospital, apan dili gyud nako makalimtan nga daw nakakita og usa ka tawo nga nagputi nga nagbarug sa akong tapad human sa akong operasyon ug nagsulti kanako nga panahon na para “mobalik ug momata.” Sa dihang dili ko mosugot, siya midugang, “Akong igsoon, patay ka na. Mobalik ka, o magpabilin ka dinhi.” Akong gisunod ang iyang gisulti ug nahigmata nga mibati og mga sakit.

Human makagawas sa ospital, ako adunay katingad-an nga mga damgo nga naglakip sa mga tawo nga wala pa nako sukad mahimamat. Mibati ko nga aduna koy gisaad nga akong buhaton, apan wala ako masayud kon unsa kini. Misugod ko sa pagsiksik ug pagbasa kabahin sa lain-laing mga relihiyon. Samtang nagbasa ko sa Bag-ong Tugon, nakaamgo ko nga kon ang kamatuoran anaa sa kalibutan, makaplagan kini kang Jesukristo.

Nagsiksik ko gikan sa 1989 hangtud 1994. Mibati ko og kalibug samtang nagsiksik ko sa mga tawo nga kanunay nakong madamgohan. Ang akong panlimbasug ug kalibug misamot, ug nakaplagan nako ang akong kaugalingon nga nag-ampo gayud para sa mga tubag.

Sa wala madugay human niining mga pag-ampo, nahimamat nako ang bag-o nga kauban sa trabaho. Siya nasayud nga nanlimbasug ko, ug giingnan nako siya nga ako nangita sa kamatuoran. Iyang kong gihatagan og Basahon ni Mormon, nga gibalibaran gyud nako og maayo. Apan iya kong nakumbinser nga dawaton kini, ug gihurot ni nako og basa sa usa lang ka gabii. Diha-diha dayon nasayud ko nga akong nakaplagan ang akong gipangita.

Sa dihang akong nahimamat ang mga misyonaryo, nakurat ko kay usa kanila mao ang usa sa akong nakita sa akong mga damgo. Mihangyo ko dayon nga magpabunyag, apan kinahanglan usa ko nilang tudloan.

Samtang nagtuon ko sa ebanghelyo ug nagsimba, akong nakita ang tanang mga tawo diha sa akong damgo. Nasayud ko nga ang ebanghelyo mao ang akong kinahanglan nga makaplagan. Ang adlaw sa akong bunyag mao ang labing malipayon nga adlaw sa akong kinabuhi. Unom ka bulan ang milabay, gitawag ko isip presidente sa branch. Karon, hapit 20 ka tuig na ang milabay, ako malipayon gihapon nga nagserbisyo sa Simbahan. Uban sa akong pamilya, ang ebanghelyo mao ang akong labing bililhon nga naangkon.