Dili Kana Mao ang Gitudlo Kanako
Irene Taniegra, Philippines
Usa ka adlaw sa trabaho, ako kinahanglan mobiya og sayo aron sa pagtuman og importanting mga sugo gikan sa akong inahan. Miadto ko sa opisina pagkabuntag ug giingnan akong kauban sa trabaho nga dili ko motrabaho inigka hapon. Atol sa break mihunghong siya kanako, “Makatabang ko nimo sa orasan [time clock].”
“Ayaw lang, salamat,” miingon ko.
Sa akong pagbiya sa opisina aron makasakay sa bus, ang akong higala misunod nako ngadto sa time clock. Siya mihunghong, “Nganong dili na lang ka mopanso para karong hapon, ug dayon iapil tika og panso sa akong pag-uli unya?”
Sa wala pa ko makasulti og usa ka pulong, siya midugang, “Tan-awa, ang atong sweldo ubos sa minimum, busa OK ra nga mobuhat ini. Gamay ra ni kaayo nga kantidad. Gawas pa, dili lang kita ang nagbuhat niini.”
Nagsugod ko sa pagkonsiderar sa iyang gisulti. Siya adunay maayong mga punto, ug nasayud ko nga siya adunay maayo nga mga intensyon. Apan dili kini mao ang gitudlo kanako sa Simbahan.
Naningkamot pag-ayo, hinay nako siyang giingnan, “Akong higala, ang Ginoo maayo, ug kon Siya mopanalangin kanato, sobra pa ang atong madawat gikan Kaniya.”
Mibiya siya ug ingon og nasuko nga wala nako dawata ang iyang tanyag. Samtang ako naglakaw ngadto sa hununganan sa bus, nabalaka ko kon unsa ka gamay ang akong sweldo. Ako nasayud nga may mga pagkaon nga dili nako mapalit sa sunod buwan.
Samtang naglakaw ko, akong nahinumduman ang mga pulong sa usa sa mga himno: “Magmatinud-anon; Dios mopanalangin ug tabang tagaan.”1 Usa ka hugpong sa mga pulong gikan sa laing himno akong nahinumduman: “Piliang matarung! Panalangin imong maangkon.”2
Kini nga mga linya milig-on sa akong desisyon nga dili magpadala sa tintasyon apan sa pagsalig sa saad sa Ginoo.
Tulo ka tuig ang milabay sukad niana nga hitabo, ug karon ako aduna nay bag-ong trabaho. Ang Ginoo siguradong mipanalangin kanako. Milungtad og panahon, apan ang saad sa himno natinuod gayud, ug akong gibati nga daghang mga panalangin ang padayon nga moabut kanako kon magpadayon ko sa pagpili og matarung. Mapasalamaton ko sa mga himno, nga naghatag kanako og kaisug nga magpabiling matarung sa atubangan sa Dios.