Pagtuon sa Kasulatan alang sa Kalig-on sa Pamilya
Pagtukod og lig-on nga pundasyon alang kaninyo ug sa inyong pamilya pinaagi sa mas makanunayon ug makahuluganong pagtuon sa kasulatan.
Ang mosunod nga mga ideya makatabang kaninyo ug sa inyong pamilya nga makapahimulos sa mga ganti sa gipalambo nga pagtuon sa kasulatan. Kini nga mga ehemplo mga sugyot lang ug mahimong ipahiangay sumala sa inyong indibidwal ug pamilya nga panginahanglan.
Pagtuon nga adunay Pangutana
Ang pagdangup sa mga kasulatan sa pagpangita og mga tubag mao ang usa ka maayo nga paagi aron mapalambo ang inyong pagtuon sa kasulatan. Mahimo ninyong sugdan inyong pagtuon uban sa pag-ampo, naghangyo aron makit-an ang mga tubag sa inyong piho nga mga pangutana. Samtang magbasa kamo, mag-highlight sa mga kasulatan nga nagtubag sa inyong mga pangutana. Pagsulat og mubo nga mga sulat diha sa kilid sa inyong mga kasulatan o sa lain nga notebook.
Kon magtuon isip pamilya, kamo makasugod sa matag pagtuon sa kasulatan pinaagi sa pagpangutana sa inyong mga anak kon sila adunay mga pangutana nga ilang gipaningkamutang tubagon. Samtang kamo mobasa, pangita og mga kasulatan nga motubag niining pangutanaha, ug hunong aron hisgutan kini ngadto kanila.
Pagtuon sumala sa Hilisgutan
Pagpili og hilisgutan nga gusto ninyong mas makat-on pa, sama sa pag-ampo, ug basaha ang mga pulong diha sa Bible Dictionary o sa Giya ngadto sa mga Kasulatan. Dayon basaha ang mga kasulatan nga nalista niana nga hilisgutan sa Giya ngadto sa mga Kasulatan, Index, o Topical Guide. Diha sa lista sa mga kasulatan, i-highlight ang bersikulo nga nakatabang og maayo. Human sa pag-highlight sa inyong paborito nga mga kasulatan kabahin sa pag-ampo, kamo makaangkon og personal nga mga pakisayran sa hilisgutan. Kamo makamarka sa inyong napiliang kolor sa tanang mga kasulatan nga inyong nakit-an kabahin sa piho nga hilisgutan. Pagpili og laing doktrina nga tun-an kon mahuman namo ug paggamit og bag-ong kolor sa pagmarka sa mga bersikulo.
Kon magtuon isip usa ka pamilya, dungan nga mopili og usa ka hilisgutan ug i-assign ang matag bata sa pagbasa og hilom sa pipila ka mga bersikulo dayon ipakigbahin ang iyang paborito. Mahimong modangat og pipila ka adlaw ang pagkompleto sa usa ka hilisgutan, busa i-monitor ang inyong nakat-unan pinaagi sa paghisgut niini ug pagsulat og mubong mga sulat inigkahuman sa kada sesyon sa pagtuon.
Pagtuon alang sa Giya
Si Presidente Henry B. Eyring, Unang Magtatambag sa Unang Kapangulohan, kausa mipasabut giunsa niya paggamit ang pagtuon sa kasulatan sa pagpangita og pihong giya alang sa iyang kinabuhi ug calling. Human og ampo sa Langitnong Amahan kon unsay angay buhaton, si Presidente Eyring nagsulat og lista sa mga tubag, gi-color-code ang kada item sa lista, ug nagpapilit og kopya sa usa ka dili mahal nga set sa mga kasulatan. Siya mipasabut, “Ang unang [tubag diha sa lista] mao ang ‘Ako mahimong usa ka saksi nga si Kristo ang Anak sa Dios.’ Dayon akong gibasa ang akong mga kasulatan nangita og mga ideya kon unsaon nako nga mahimong saksi nga si Kristo mao ang Anak sa Dios. Kada higayon nga aduna koy mabasahan kabahin niini, markahan ko kini og blue. Sa wala madugay nakamugna ko og akong kaugalingong topical guide sa unsay akong gihunahuna nga gusto sa Ginoo nga akong buhaton.”1
Kon magtuon isip usa ka pamilya, pagtino og pipila ka bahin nga gusto ninyong dungang palamboon. Isulat kini ug ibutang sa dapit nga makita. Samtang magbasa kamo, dapita ang matag bata nga mangita ug mag-highlight sa mga kasulatan nga may kalabutan niini.
Kon ang pagbasa og pipila ka mga bersikulo sa usa ka adlaw lisud ug ang mas lawom nga pagtuon daw imposible o gani ang pagpundok sa imong pamilya lisud, ayaw pagpakawala sa paglaum ug ayaw og hunong. Si Elder David A. Bednar sa Korum sa Napulog Duha Ka mga Apostoles mitambag nga samtang walay panghitabo sa pagtuon sa kasulatan sa pamilya nga ingon og halandumon o gani malampuson, “ang atong pagkamakanunayon sa paghimo og daw gagmay nga mga butang modala ngadto sa mahinungdanong mga sangputanan sa espiritwal.”2
Samtang magtinguha kita sa pagbasa sa mga kasulatan nga mas kanunay ug magpalambo sa atong pagbasa sa mga kasulatan pinaagi sa makahuluganon nga pagtuon, ang Ginoo mopanalangin sa atong mga paningkamot. Siya mogiya kanato samtang kita mohan-ay sa atong pagtuon sa kasulatan ug himoon kini nga mas magantihon alang kanato ug sa atong mga pamilya.
Agosto
Gugma sa panimalay
Pagpasaylo
Pagpamatuod
Personal nga Pag-ampo
Serbisyo