Ang Pamaagi sa Lider aron Makadawat og Pagpadayag
Ang mga lider sa lokal nga priesthood ug auxiliary nagpakigbahin og upat ka mga baruganan nga nakatabang kanila sa pagbuhat sa ilang calling nga may inspirasyon.
“Sa dihang una kong gitawag, daw nasanapan ko,” miingon ang presidente sa branch nga karon nakaserbisyo na og pipila ka tuig. “Ako adunay hugot nga pagtuo nga ang Langitnong Amahan nasayud kon unsaon sa pagpanalangin sa mga miyembro ug sa ilang mga pamilya, apan unsaon nako pagkasayud kon unsay Iyang gusto nga akong buhaton aron makatabang nila?”
Nasayud ang presidente og duha ka baruganan nga nakalig-on niya isip usa ka kinabig sa Simbahan ug isip batan-ong amahan: pagtuon sa kasulatan ug pag-ampo. Busa iya kining gibuhat uban sa bag-ong mga katuyoan.
“Samtang ako kining gibuhat, ako mibati nga kinahanglan nakong basahon ang Doktrina ug mga Pakigsaad 9:8, nga ‘magtuon niini diha sa imong hunahuna; unya ikaw kinahanglan nga mangutana [sa Ginoo] kon kini husto.’ Sa dihang akong gibasa pag-usab kadto nga mga pulong, akong nasayran nga ang Ginoo naggiya na kanako sa paagi nga makadawat og pagpadayag.”
Kana mao ang paagi nga kinahanglang buhaton sa tanang mga lider aron maepektibo sa ilang mga calling. Ug samtang sila magtinguha og inspirasyon diin sila may katungod, balik-balik nilang makat-unan nga ang piho nga mga baruganan sa ebanghelyo makatabang para sa balaanong paggiya. Ania ang upat niini.
1. Pagtinambagay sa Usag Usa
“Akong nakita nga bisan nadasig ko pag-ayo sa pagbuhat sa usa ka butang, ako mobati og kasiguroan kon ako kining hisgutan uban sa akong mga magtatambag,” miingon ang kanhi presidente sa Relief Society sa branch. “Usahay sila yanong mokumpirma nga susama ang ilang gibati, ug amo kining buhaton nga nagkahiusa. Apan usahay ila kong tabangan nga makakita sa mga butang nga wala nako makita, ug mahimo namong usabon unsay among gibuhat o mas masensitibo sa among pagbuhat niini. Dayon amo gihapon kining buhaton nga nagkahiusa.”
Ang tambag makita usab pinaagi sa pagsusi sa mga handbook, pagtuon sa mga mensahe sa kinatibuk-ang komperensya, ug pag-ampo uban sa hugot nga pagtuo.
“Pipila sa labing maayo nga tambag nga akong nadawat miabut sa dihang akong gibalik-balik pagbasa ang mga pakigpulong sa kinatibuk-ang komperensya,” miingon ang presidente sa Young Women sa ward. “Dayon sa akong pag-ampo nga nagluhod, akong hangyoon ang Langitnong Amahan kabahin sa mga butang nga akong natun-an ug unsaon paggamit sa mga pagtulun-an sa buhing mga propeta ug sa kinatibuk-ang mga auxiliary sa pagtabang sa batan-ong mga babaye.”
Usa ka magtatambag sa kapangulohan sa Sunday School sa stake miingon, “Kon kami mag-miting isip kapangulohan, kanunay ming moribyu og mubo nga tudling sa Handbook 2: Administering the Church. Samtang kami kanunay nga nagribyu sa mga instruksyon nga amo nang nadawat, ang Espiritu motabang kanamo nga magsunod kanunay sa mga sumbanan.”
“Nahupay kaayo ko sa katinuod nga ang Simbahan sa Ginoo usa ka simbahan sa mga konseho,” miingon ang usa ka presidente sa stake. “Talagsaon kini nga kasinatian nga modumala sa mga konseho diin ang mga tawo nga adunay daghang kaalam ug kasinatian mag-ampo og dungan ug dayon hisgutan ang pinakaepektibong pamaagi. Ang ilang inspirasyon makapahimo kanako sa paghunahuna sa mga alternatibo, maminaw sa Espiritu, ug dayon adunay hingpit nga pagsalig sa pagpakumpirmar sa akong desisyon ngadto sa Ginoo.”1
Usahay ang pagtinguha og tambag nagpasabut sa pagpangita og usa ka tawo nga eksperto. “Ako naningkamot sa pagtabang sa usa ka pamilya nga may problema sa pinansyal ug mibati nga makig-istorya sila sa usa ka brother diha sa ward kinsa usa ka tigtambag sa pinansyal,” miingon ang bag-ohay lang nga na-release nga bishop. “Nakatabang siya kanila sa paagi nga dili gayud nako mahimo.”
Lain nga bishop, kinsa natambagan nga ang mga bishop kinahanglang motugot sa ubang mga lider sa ward nga molambo ug mobuhat sa ilang katungdanan, misulti niining kasinatian: “Usa ka biyuda sa among ward gusto nga bisitahan sa bishop dili moubos kausa matag semana. Sa iyang hunahuna, ang pagbisita ra sa bishop ang madawat. Naningkamot ko nga makigkita niya kutob sa mahimo, apan daghan ko og mga responsibilidad, lakip na ang usa ka batan-ong pamilya. Sa katapusan, uban sa usa sa akong mga magtatambag, ako siyang gibisitahan pag-usab.
“Samtang kami nag-istoryahanay, nadasig ko sa pagsulti, ‘Minahal nga sister, ikaw nasayud nga isip imong bishop ikaw akong gimahal. Ug tungod kay ikaw gimahal nako pag-ayo, gihangyo nako ang duha sa atong matinud-anong mga tighupot sa Melchizedek Priesthood ug duha sa atong talagsaon nga mga sister sa Relief Society sa pagsusi kanimo dili moubos kausa matag bulan, mas sagad pa kon gikinahanglan. Sila moreport kon ikaw adunay mga panginahanglan o kabalaka. Mahimo ba na?’ ‘Oo, bishop,’ miingon siya. Nangutana ko kon gusto ba niya nga masayud sa ilang mga ngalan, ug siya miingon og oo. Sa dihang ako siyang gisultihan, siya miingon, ‘Sila ang akong mga home teacher ug visiting teacher!’ Ug ako miingon, ‘Karon imong nasabtan ang paagi nga giestablisar sa Ginoo aron kami makaamuma kanimo.’”
2. Pagpaminaw nga Kinasingkasing
Ang mga lider miingon usab nga ang abilidad sa pagpaminaw ug pag-ila makatabang sa pagtinguha og inspirasyon.
“Samtang kami makigkita sa mga sister, ako naningkamot sa pagpaminaw labaw pa sa mga pulong nga ilang gipangsulti,” miingon ang presidente sa Relief Society sa ward. “Usahay pinaagi sa Espiritu ako mobati nga sila nagkinahanglan og tabang. Ako mibati nga napanalanginan nga makakita niini sa ilang mga mata o makamatikod niini sa ilang linihokan. Gani, usahay ako moingon, ‘Ako ang inyong presidente sa Relief Society, ug mibati ko nga kamo adunay gikinahanglan. Unsaon nako nga makaserbisyo kaninyo?’ Akong gibati nga kanunay kong makadawat og inspirasyon pinaagi sa pagpangutana, ‘Unsa kaha ang buhaton sa Manluluwas?’”
“Ako ganahan sa paagi nga ang among bishop naminaw sa mga sister sa among ward council,” miingon ang presidente sa Primary sa ward. “Kanunay siyang mangutana kon unsa ang among gibati ug naminaw pag-ayo sa tanan nga among gisulti. Kadaghan siya miingon, ‘Kinahanglan natong hinumduman nga daghan og mga ideya ang mga asawa, mga inahan, ug dili minyo nga mga sister.’”
‘Kinahanglan usab natong hinumduman nga ang pagpaminaw naglakip sa pagpaminaw sa Espiritu,” miingon ang usa ka high priests group leader. “Ang labing tukma nga paghukom sa kalampusan sa usa ka lider mao ang iyang abilidad sa pagbati ug pagsunod sa Espiritu. Gipakita kini kadaghan ni Presidente Monson.”2
3. Pagbarug sa Balaan nga mga Dapit
Ang mga lider makahibalo usab nga may pihong mga dapit nga angay sa pagpadayag.
“Alang kanako, ang pinakamaayong dapit nga mobati og kadasig mao ang templo,” miingon ang usa ka magtatambag sa bishopric. “Kon gusto nako nga maduol sa Ginoo, moadto ko sa Iyang balay aron dili mobati og kabalaka ug mo-focus sa pagpaminaw sa Espiritu.”
“Ako adunay kwarto sa akong panimalay nga gihimo nakong opisina,” miingon ang usa ka patriyarka sa stake. “Akong gihangyo ang Ginoo nga himoon kining dapit nga maanaa ang Espiritu. Kon mangandam ko sa paghatag og panalangin, ako moadto didto ug mag-ampo. Didto usab ako mang-interbyu ug mohatag og panalangin.”
“Ang atong mga meetinghouse gipahinungod nga mga dapit sa pagsimba,” miingon ang usa ka bishop. “Usahay may adlaw sa semana, kon gusto ko nga mobati og kalinaw, molingkod ko diha sa chapel. Maghunahuna ko sa mga miyembro sa ward ug unsa ka dako ang paghigugma sa Manluluwas ngadto kanila. O usahay mokanta ko og himno.”
“Alang kanako ang Primary usa ka balaan nga dapit,” miingon ang lain nga bishop. “Kon gusto ko nga mobati og kahinam ug kadasig, motapad ko sa mga bata sa Primary samtang sila manganta. Kanunay makapabayaw kini sa akong kasingkasing.”
“Ang pag-ampo makapabalaan sa bisan unsa nga dapit,” miingon ang presidente sa Young Men sa branch. “Hunahunaa ang mga pagpadayag nga nadawat ni Propeta Joseph dihang anaa siya sa Bilanggoan sa Liberty.Napahimo niya kining balaan nga dapit pinaagi sa pagtawag sa Ginoo.”
4. Pagbuhat nga may Katungod
“Daghang mga miyembro sa among ward nga wala giseryuso ang mga calling,” miingon ang usa ka bishop. “Mibati ko nga makatabang ko nila pinaagi sa pagpasabut kon sa unsang paagi kami, isip bishopric, nag-ampo aron masayud kinsa ang tawagon ug nga kami nakadawat og tubag. Gusto nako nga masayud sila nga ang Ginoo, pinaagi sa mga lider nga may katungod, mitawag kanila. Kini nakahimo og dakong kalainan sa dihang sila nasayud nga dinasig ang ilang calling ug ang Ginoo nagpaabut nga sila usab motinguha og inspirasyon aron mapalambo kana nga calling.”
Siya ug ang iyang mga magtatambag nagsunod sa paagi nga makadawat og pagpadayag, usa ka paagi nga mahimong buhaton sa tanang mga miyembro ug lider sa Simbahan. Ug pinaagi sa paghulagway sa paagi nga ilang gibuhat, sila nakadasig usab sa uban.