Welfare

Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi. Alang sa dugang nga impormasyon, adto sa reliefsociety.lds.org.

Hugot nga Pagtuo, Pamilya, Kahupayan

Ang mga katuyoan sa welfare sa Simbahan mao ang pagtabang sa mga miyembro nga mahimong mapaningkamuton sa kaugalingon, pag-atiman sa mga kabus ug timawa, ug paghatag og serbisyo. Ang welfare mahinungdanon sa buhat sa Relief Society. Si Presidente Henry B. Eyring, Unang Magtatambag sa Unang Kapangulohan, mitudlo:

“[Ang Ginoo] gikan pa sa sinugdanan sa panahon Siya mihatag og mga pamaagi aron ang Iyang mga disipulo makatabang. Gidapit Niya ang Iyang mga anak sa pagpahinungod sa ilang panahon, ilang kapanguhaan, ug ilang kaugalingon aron moapil Kaniya sa pagserbisyo sa uban. …

“Siya midapit ug misugo kanato sa pag-apil diha sa Iyang buhat aron sa pagbayaw niadtong nanginahanglan. Naghimo kita og pakigsaad sa pagbuhat niana diha sa pagbunyag ug sa sulod sa balaan nga mga templo sa Dios. Bag-uhon nato ang pakigsaad ma-Dominggo sa higayon nga kita moambit sa sakrament.”¹

Ubos sa direksyon sa bishop o presidente sa branch, ang lokal nga mga lider makatabang sa espirituhanon ug temporal nga kaayohan. Mga oportunidad sa pagserbisyo sa kasagaran magsugod pinaagi sa mga visiting teacher kinsa nagtinguha og inspirasyon aron masayud unsaon pagtubag sa mga panginahanglan sa matag sister nga ilang bisitahan.

Gikan sa mga Kasulatan

Lucas 10:25–37; Santiago 1:27; Mosiah 4:26; 18:8–11; Doktrina ug mga Pakigsaad 104:18

Gikan sa Atong Kasaysayan

Niadtong Hunyo 9, 1842, gisangunan ni Propeta Joseph Smith ang mga sister sa Relief Society sa “paghupay sa kabus” ug sa “pagluwas og mga kalag.”² Kining mga tumong mahinungdanon gihapon sa Relief Society ug napahayag sa atong motto, “Ang gugma wala gayuy pagkatapus” (1 Mga Taga-Corinto 13:8).

Ang atong ikalima nga kinatibuk-ang presidente sa Relief Society, si Emmeline B. Wells, ug ang iyang mga magtatambag mipasiugda niini nga motto niadtong 1913 isip pahinumdom sa atong sukaranang mga baruganan: “Kami namahayag gayud nga kini ang among katuyoan … [mohupot] og maayo sa dinasig nga mga pagtulun-an ni Propeta Joseph Smith dihang gipadayag niya ang plano diin ang babaye pagatugahan sa gahum pinaagi sa calling sa priesthood nga pundok-pundukon ngadto sa haum nga mga organisasyon sa katuyoan nga pagpangalagad sa masakiton, pagtabang sa nanginahanglan, paghupay sa mga tigulang, pagpasidaan sa mga dili mabinantayon ug pagtabang sa mga walay ginikanan.”³

Karon ang Relief Society adunay impluwensya sa tibuok kalibutan samtang ang mga sister mopabati og gugmang putli, ang tiunay nga gugma ni Kristo, sa ilang mga silingan (tan-awa sa Moroni 7:46–47).