Padayon nga may Hugot nga Pagtuo
Unsay inyong buhaton kon kamo kinahanglan nga mohimo og desisyon ug nakaampo na kabahin sa inyong mga pagpili, apan dili gihapon mo sigurado kon unsay angayang buhaton?
Si Elder Jeffrey R. Holland sa Korum sa Napulog Duha ka mga Apostoles mipahayag, “Kini yano ug ugdang nga kamatuoran nga sa wala pa [ug human sa] talagsaong mga higayon, sigurado … dakong espirituhanon nga mga higayon, adunay moabut nga kalisdanan, oposisyon, ug kangitngit” (“Cast Not Away Therefore Your Confidence,” Liahona, Hunyo 2000, 34).
Apan ang oposisyon wala magpasabut nga gipasagdaan namo sa Langitnong Amahan. Anaa Siya, ug Siya mogiya kaninyo. Usahay kita kinahanglang mopadayon sa unahan nga may hugot nga pagtuo hangtud ang atong dalan mahayagan. Ang mosunod mao ang pipila ka mga ideya gikan sa modernong mga propeta kabahin sa mapailubong maghulat sa mga tubag ug paggiya.
Maglakaw padulong ngadto sa Ngilit sa Kahayag
“Human ako gitawag isip General Authority, ako midangop ni Elder Harold B. Lee para sa tambag. Siya naminaw og maayo sa akong problema ug misugyot nga makigkita ko ni Presidente David O. McKay. Si Presidente McKay mitambag nako sa direksyon nga akong angay paingnan. Ako andam kaayo nga magmasulundon apan akong nakita nga imposible alang kanako sa pagbuhat sa iyang gitambag nga akong buhaton.
“Mibalik ko ni Elder Lee ug misulti kaniya nga wala ko makakita og paagi sa pagbuhat sigon sa gitambag kanako nga akong paingnan. Siya miingon, ‘Ang problema nimo kay gusto nimong makita ang katapusan gikan sa sinugdanan.’ Mitubag ko nga gusto lang nakong makita ang una o ang ikaduha nga lakang. Dayon miabut ang leksyon nga magpabilin nako sa tibuok kinabuhi: ‘Kinahanglan kang magkat-on sa paglakaw padulong ngadto sa ngilit sa kahayag, ug pipila ka lakang ngadto sa kangitngit; dayon ang kahayag mogawas ug mopakita kanimo sa agianan.’ Dayon iyang gikutlo kining 22 ka mga pulong gikan sa Basahon ni Mormon:
‘Ayaw pakiglalis tungod kay kamo wala makakita, kay kamo dili makadawat og saksi hangtud human sa pagsulay sa inyong hugot nga pagtuo’” (Ether 12:6).
Presidente Boyd K. Packer, Presidente sa Korum sa Napulog Duha ka mga Apostoles, “The Edge of the Light,” BYU Magazine, Mar. 1991, magazine.byu.edu.
Padayon uban sa Pagsalig
“Unsay inyong buhaton kon kamo nangandam og maayo, tinud-anay nga nag-ampo, naghulat og igong panahon alang sa tubag, ug gihapon walay gibati nga tubag? Mahimo kamong magpasalamat kon mahitabo man kana, kay kana timailhan sa pagsalig [sa Langitnong Amahan]. Kon kamo nagpuyo nga takus ug ang inyong pagpili uyon kanunay sa pagtulun-an sa Manluluwas ug kamo kinahanglan nga mobuhat, padayon uban sa pagsalig. Kon kamo sensitibo sa pagdasig sa Espiritu, usa sa duha ka butang piho nga mahitabo sa tukma nga panahon: mahimong kasamok sa hunahuna, buot pasabut sayop nga pagpili, o ang kalinaw o ang kainit sa dughan mabati, sa pagpamatuod nga ang inyong gipili husto. Kon kamo nagpuyo nga matarung ug nagbuhat uban sa pagsalig, ang Dios dili motugot nga kamo moabut og layo nga walay pahimangno kon nasayop kamo sa inyong desisyon.”
Elder Richard G. Scott sa Korum sa Napulog Duha ka mga Apostoles, “Ang Paggamit sa Langitnon nga Gasa sa Pag-ampo,” Liahona, Mayo 2007, 10.
Ayaw Pagdesisyon gumikan sa Inyong Kahadlok
“Ayaw pagdesisyon gumikan sa atong kahadlok. Unta kita makahinumdom kanunay nga magmaya, isalig atong pagtuo sa Dios, ug sa pagpakabuhi nga takus aron Siya mogiya nato. Kita adunay katungod sa pagdawat og personal nga inspirasyon aron sa paggiya kanato sa atong mortal nga pagsulay. Unta kita nagpakabuhi nga ang atong mga kasingkasing andam kanunay sa mga paghunghong ug paghupay sa Espiritu.”
Presidente James E. Faust (1920–2007), Ikaduhang Magtatambag sa Unang Kapangulohan, “Be Not Afraid,” Liahona, Okt. 2002, 6.
Mapailubong Maghulat sa Pagpadayag
“Ang hinay-hinay nga pagtubo sa kahayag gikan sa nagsubang nga adlaw sama sa pagdawat og mensahe gikan sa Dios “pagtulun-an human sa usa ka pagtulun-an, lagda human sa usa ka lagda” (2 Nephi 28:30).Labing kasagaran, ang pagpadayag motubo nga hinay-hinay sa pagdagan sa panahon ug ihatag sumala sa atong tinguha, katakus, ug pagpangandam. Ang ingon nga komunikasyon gikan sa Langitnong Amahan sa hinay-hinay ug sa kalumo ‘motuhop diha sa [atong mga kalag] ingon sa mga yamog nga gikan sa langit’ (D&P 121:45).”
Elder David A. Bednar sa Korum sa Napulog Duha ka mga Apostoles, “Ang Espiritu sa Pagpadayag,” Liahona, Mayo 2011, 88.
Sayri nga ang Dios Moandam
“Atol [sa] busy nga panahon sa akong kinabuhi, si Elder Joseph B. Wirthlin mitawag nako nga moserbisyo isip presidente sa stake.
“Sa pag-interbyu niya nako, daghan ang misulod sa akong hunahuna, nga ang usa mao ang kabalaka nga basin wala koy panahon nga gikinahanglan niini nga calling. Bisan og mibati ko nga mapainubsanon ug napasidunggan sa calling, naghunahuna ko kon dawaton ba nako. Apan kadiyot ra kadto nga hunahuna tungod kay ako nasayud nga si Elder Wirthlin gitawag sa Dios ug nga siya naghimo sa buhat sa Ginoo. May mahimo ba ko gawas sa pagdawat?
“Dunay mga panahon nga kita mosulod sa kangitngit uban sa pagtuo, masaligon nga ang Dios mobutang og lig-on nga tumbanan sa atong tiil kon atong himoon. Ug mao nga malipayon nakong gidawat, nakahibalo nga ang Dios motabang.”
Presidente Dieter F. Uchtdorf, Ikaduhang Magtatambag sa Unang Kapangulohan, “Ang Ngano sa Priesthood nga Pagserbisyo,” Liahona, Mayo 2012, 59.