Unsaon man nako sa “pagbarug sa balaang mga dapit” kon daghan kaayong dili balaanon sa akong palibut, sama diha sa eskwelahan?

Aron sa pag-andam kanato alang sa lisud nga panahon, ang Ginoo nagmando kanato nga “magbarug sa balaan nga mga dapit” (D&P 45:32; tan-awa usab D&P 87:8). Sa pagbuhat niana, kita kinahanglan nga magpuyo nga takus ug magbaton sa Espiritu Santo. Ang Espiritu motabang nato sa pagbuntog sa tintasyon ug sa negatibo nga mga impluwensya. Ania ang pipila ka mga paagi sa pagdapit sa Espiritu nganha sa inyong kinabuhi:

Pag-ampo. Sugdi ang inyong adlaw sa pag-ampo, ug ilabi na sa higayon nga kamo anaa sa dili balaan nga mga impluwensya sa eskwelahan o bisan asa.
Pagtambong sa seminary ug pagtuon sa kasulatan matag adlaw. Ang pagtuon sa mga doktrina nga gitudlo sa mga kasulatan makatabang kaninyo nga mapuno sa kahayag ug kamatuoran—“ang kahayag ug kamatuoran mobiya niana nga usa ka dautan” (D&P 93:37).
Pag-ambit sa sakrament matag semana. Samtang makahuluganong kamong mobag-o sa inyong pakigsaad sa pagsunod sa ebanghelyo, kamo makadawat sa saad sa Ginoo nga makabaton sa Iyang Espiritu uban kaninyo.
Pagsunod sa mga sumbanan diha sa Alang sa Kalig-on sa mga Kabatan-onan. Kini nga mga sumbanan makatabang kaninyo sa pagbarug sa pagkabalaan.
Pakigsuod sa inyong mga ginikanan. Ang mga kabatan-onan kinsa adunay maayong relasyon sa ilang mga ginikanan mas lig-on sa lisud nga mga sitwasyon.

Kining mga sugyot mopalig-on kaninyo sa espirituhanong paagi. Kini makatabang kaninyo kon inyong makita ang inyong kaugalingon sa usa ka dili balaan nga sitwasyon nga dili kalikayan, sama sa eskwelahan. Apan mas labing maayo kon makalikay kamo sa dili balaan nga mga sitwasyon kon mahimo.

Hunahunaa ang Templo

Ang labing balaan nga dapit nga anaa dinhi sa yuta mao ang templo. Ang paghunahuna niini makatabang ninyo sa pagbuhat sa matarung, bisan unsa pay inyong kahimtang. Mahimo usab kamong makabutang og litrato sa templo diin inyong makita; kini makatabang ninyo nga mobati og mas maayo ug kalig-on nga dili maminaw sa dili balaanon nga anaa sa eskwelahan.

Angel T., edad 18, Ecuador

Pagbaton og Kinaiya sa Balaang Pagtahud

Akong nakat-unan nga kamo makahimo sa dapit palibut kaninyo nga balaan, tungod kay kinsa kita mas importante kaysa asa kita. Adunay daghang mga tintasyon sa eskwelahan, apan unsa gyud ang importante mao ang pagbaton og kinaiya sa balaan nga pagtahud ngadto sa Langitnong Amahan ug naningkamot sa pagdala diha kaninyo sa ngalan ni Kristo. Niining paagiha, kamo makahimo sa inyong eskwelahan nga balaan nga dapit alang kaninyo tungod kay kamo naghinumdom sa Langitnong Amahan ug sa atong Manluluwas.

Elder Ojeda, edad 21, Colombia Bogotá North Mission

Barug alang sa Inyong Hugot nga Pagtuo

Himoa nga ang dapit libut ninyo nga balaan. Palibuti ang inyong kaugalingon sa mga higala nga makasunod sa mga rekomendasyon diha sa Alang sa Kalig-on sa Kabatan-onan. Pahibaloa ang uban sa inyong mga sumbanan ug hangyoa sila sa paghunong sa dili maayo nga panag-istoryahanay o pagpalong sa musika kon anaa kamo. Ayaw kahadlok sa pagbarug alang sa inyong hugot nga pagtuo.

Thomas S., edad 15, Georgia, USA

Pagpili sa Maayo, Paglikay sa Dili Maayo

Ako naningkamot nga makalikay sa mga dapit sa akong eskwelahan diin ako nasayud nga ang ubang mga tawo sa kasagaran maghimo og sayop nga mga butang. Mainampingon usab ako nga mopili sa akong ikatupad sa paglingkod sa klase o atol sa paniudto tungod kay sila makaapekto sa akong hunahuna ug binuhatan. Apan bisan unsa pa kita ka mabinantayon, kita usahay makakita o makadungog og dili balaanon. Kon kini mahitabo ngari kanako, molingiw dayon ako ug mokanta og himno sa akong hunahuna aron sa paghawan sa akong hunahuna. Usab, ang pagbasa sa mga kasulatan ug sa pagpakig-istorya sa makapabayaw nga mga higala nakatabang usab nako. Dili kita kanunay makapili sa atong palibut, apan kita makapili kon unsay atong reaksyon niini.

Eliza A., edad 14, Utah, USA

Magmalig-on ug Magmaisugon

Kinahanglan gayud nga magmalig-on ug magmaisugon kita. Kinahanglang mopili kita sa matarung. Usahay lisud kaayo, apan kon buhaton nato kana, magmalipayon kita. Kon ang mga tawo mohangyo nato sa pag-inom o pagsigarilyo uban nila, kinahanglang magmaisugon kita ug moingon og dili. Mahimo natong ipasabut kanila nga gusto kita nga mopili sa matarung, mao nga dili kita mobuhat niadtong mga butanga.

Anastasia N., edad 20, Ivano Frankivsk, Ukraine

Tinguhaa ang Espiritu

Makasugat kita og mga tawo sa eskwelahan kinsa dili sama sa atong mga sumbanan. Bisan pa niana, uban sa Espiritu Santo nga naggiya sa atong dalan, makahimo kita sa paghimo og hustong mga pagpili ug sa paghatag og maayong ehemplo alang kanila. Importante alang nato nga kita sa kanunay “mobarug sa balaan nga mga dapit” aron mobati sa gugma sa Langitnong Amahan. Usa ka paagi sa pagbuhat niana mao ang pagtinguha sa pakig-uban sa Espiritu Santo. Kon mopili kita nga anaa sa kahimtang sa gugma sa Dios, adunay hingpit nga kalipay ang atong mga kasingkasing, nasayud nga ang Langitnong Amahan nahimuot sa atong mga aksyon.

Genzen N., edad 18, Zamboanga, Philippines

Dili Gayud I-kompromiso

Pipila ka tuig na ang milabay, usa ako sa mga miyembro sa Simbahan sa akong grado. Ang mga tawo nagtuo nga ako lahi kay ako mahalaron sa pagsunod sa tanang mga sumbanan sa Simbahan. Mao nga usa ka adlaw niana nakahukom ko nga akong ikompromiso ang akong mga sumbanan og gamay. Sa dihang gihimo nako, nakamatikod ko nga mas mitagad ang uban nako. Apan human sa pipila ka semana, dili maayo ang akong gibati ug miduol sa Ginoo sa paghinulsol. Mitabang Siya nako, ug kinahanglan kong mohimo og dakong sakripisyo, apan kadto wala maanugon! Nakita gayud nako ang mga panalangin sa pagsunod sa ebanghelyo diha sa eskwelahan. Nawad-an kog mga higala ug pagtagad, apan nakaangkon ako og pagtahud ug kalipay.

Sutton K., edad 15, Texas, USA