Nganong Magminyo sa Templo?

Kita maghisgot pirme kabahin sa kaminyoon sa templo diha sa Simbahan. Nakahunahuna ba kamo kon ngano?

Daghan ang naghisgot karong bag-o kabahin sa kaminyoon—unsa kini, ngano aduna kita niini, ang tahas niini sa katilingban. Sa simbahan maghisgot kita pirme kabahin sa kaminyoon sa templo. Kamo nasayud nga kini importante tungod kay kamo nakadungog mahitungod niini sukad gitudloan kamo sa inyong unang mga leksyon kabahin sa ebanghelyo, bisan naa mo sa Sunbeam o kinabig sa inyong pagkakabatan-on.

Apan ang pipila ninyo tingali naghunahuna, “Ngano?” Kaninyo tingali labaw pa kini sa usa ka pangutana kon unsa ang kaminyoon sa templo. Kamo gusto nga masayud—sa inyong kasingkasing, dili lang sa inyong hunahuna—nganong maningkamot kamo og maayo nga maminyo sa templo, ilabi na nga ang kaminyoon isip usa ka ideya ug institusyon daw nagkahuyang na diha sa mga katilingban sa tibuok kalibutan.

Nan, nagsugod kini sa doktrina sa pamilya.

Ang Doktrina sa Pamilya

Gamiton nato ang termino nga doktrina aron makatabang sa pagpasabut sa daghang mga butang diha sa Simbahan. Sama pananglit, ang Giya ngadto sa mga Kasulatan naghubit sa doktrina ni Kristo isip “mga baruganan ug mga pagtulun-an sa ebanghelyo ni Jesukristo.”¹ Mao nga unsay buot natong ipasabut kon kita maghisgut kabahin sa doktrina sa pamilya o sa doktrina sa mahangturong kaminyoon?

“Ang Pamilya: Usa Ka Pamahayag ngadto sa Kalibutan” namahayag, “Ang kaminyoon tali sa usa ka lalaki ug usa ka babaye gi-orden sa Dios ug … ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak.”² Sa laing pagkasulti, kon kita maghisgut kabahin sa rason nganong ania kita dinhi sa yuta ug unsay angay natong makab-ot ug mahimo, kining tanan kalabut sa ideya nga kita kabahin sa usa ka pamilya ug makaminyo ug makaestablisar og bag-ong mga pamilya.

Ang pamahayag sa pamilya usab mipahayag: “Ang balaan nga plano sa kalipay makapahimo sa mga relasyon sa pamilya nga magpadayon human sa kamatayon. Sagrado nga mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga magkahiusa sa kahangturan.”³

Apan unsay mahitabo sa atong mga pamilya kon kita mamatay? Kon ikaw maminyo pinaagi sa balaod sa inyong estado o nasud, kana nga balaod aduna bay awtoridad kaninyo kon kamo mamatay? Wala, tungod kay kadto nga mga balaod hinimo sa tawo ug adunay awtoridad lamang kon kamo nagpuyo ubos niana nga awtoridad. Alang sa mga relasyon sa kaminyoon nga magpadayon human kamo mamatay, kana nga mga kaminyoon kinahanglang mabugkos diha sa tukma nga dapit sa may awtoridad nga molungtad hangtud sa kahangturan. Kana nga dapit mao ang templo, ug kana nga katungod mao ang priesthood (tan-awa sa D&P 132:7, 15–19). Pinaagi sa pagpili og kaminyoon sa templo ug pagtuman niadto ng mga pakigsaad, mipili kamo aron magpuyo sa kahangturan uban sa inyong kapikas.

Ang Rason nga Kita Moamuma

Tingali nasayud na kamo niana nga doktrina, ug gani kamo naghunahuna gihapon, “Apan ngano kaha nga kini importante kaayo?” Tingali dili kini kabahin sa pagsabut sa doktrina. Tingali mas kabahin kini sa yano nga pangutana kon unsay kahulugan sa kaminyoon ug pamilya sa inyong kasingkasing. Ang yano nga tubag mao nga ang ang labing dako ug hingpit nga kalipay moabut nato pinaagi sa pagsunod sa ebanghelyo ug pag-angkon ug pagpatunhay sa kaminyoon sa templo.

Sa Abril 2013 nga kinatibuk-ang komperensya, si Elder L. Whitney Clayton sa Kapangulohan sa Seventy mipasabut niining paagiha: “Walay laing relasyon nga makahatag og dakong kalipay, momugna og kaayo, o dakong personal nga kalamboan.”⁴

Nasayud usab kita nga “ang kalipay sa kinabuhi sa pamilya labaw nga makab-ot kon kini gibase sa mga pagtulun-an sa Ginoong Jesukristo.”⁵

Kon maghunahuna kamo mahitungod niini, inyong igahin ang dakong bahin sa inyong kinabuhi nga mag-andam alang sa dagkong mga kausaban nga moabut. Anaa ang bunyag, pagkagradwar sa Primary ngadto sa Young Men o Young Women, pagtambong sa templo, ug pagsiksik sa family history ug mga ordinansa sa templo alang sa inyong mga katigulangan. Alang sa batan-ong mga lalaki, anaa ang pagdawat sa priesthood ug sa pag-uswag diha sa mga katungdanan sa priesthood. Alang sa batan-ong mga babaye, anaa ang pag-uswag diha sa mga klase sa Young Women. Anaa ang paggradwar sa high school o ang sama niini. Ug karon ang mga misyonaryo makabiya sa edad nga 18 o 19. Adunay daghan nga pangandaman ug paabuton.

Apan ang labing importante nga mga pakigsaad nga atong pangandaman mao ang pagkabugkos diha sa templo. Kon ang mga indibidwal sa mga pamilya mosunod sumala sa plano sa kalipay ug motuman sa ilang mga pakigsaad sa templo, sila makasinati og tinuod nga kalipay.

Ang ebanghelyo mao ang katuyoan sa kinabuhi. Kini mao ang tibuok rason nga kita ania dinhi. Kon kita mosunod sa dalan sa ebanghelyo, kini mosangpot sa hingpit nga kalipay. Ug kana nga dalan mosangpot sa kaminyoon sa templo, niini nga kinabuhi o sa kinabuhi nga moabut. Walay mga panalangin nga ihikaw sa matinud-anong mga anak sa Amahan.

Si Elder Bruce R. McConkie (1915–85) sa Korum sa Napulog Duha ka mga Apostoles mitambag, “Ang labing importante nga butang nga buhaton ni bisan kinsa nga Santos sa Ulahing mga Adlaw mao ang pagminyo sa eksakto nga tawo, sa eksakto nga lugar, pinaagi sa eksakto nga awtoridad.”⁶

Hingpit nga mga Kalipay sa Kaminyoon

Ang pipila sa hingpit nga mga kalipay sa kaminyoon naglakip sa:

Pagsalig ug Suporta. Kon kamo magminyo, kamo adunay usa ka tawo nga modasig ug moawhag ninyo sa pagbuhat unsay matarung, kinsa mobayaw ninyo sa matag adlaw, nga moambit sa tanan ninyong mga kalipay ug kasubo.

Mga Bata. Makahatag og hingpit nga kalipay nga saligan sa pag-amuma ug pag-atiman sa mga anak sa Langitnong Amahan.

Pagpakigbahin. Usa gyud ka dako nga panalangin ang pagpakigbahin sa kinabuhi sa usa ka tawo ug sa umaabot sa kinabuhi sa mga anak usab. Ang kalampusan ninyo ug sa inyong kapikas mahimong kalampusan sa pamilya. Ang paghimo og mga panumduman nga mag-uban makadugang sa lawom nga kahulugan sa kinabuhi.

Tambag. Ang kapikas makahatag ninyo og maayo, matinuoron nga tambag, ug kamo makasalig niini tungod kay kamo nasayud nga kini nagagikan sa usa ka tawo kinsa naghunahuna sa inyong kaayohan.

Kalig-on. Ang duha mas lig-on kay sa usa. Kamo makapalig-on ug makatabang sa usag usa sa hingpit nga pagsunod sa ebanghelyo.

Katawa. Kon nakaila gyud mo sa usa ka tawo ug inyong gisaligan ang usag usa, kamo malingaw sa kinabuhi uban sa katawa ug pasiaw.

Gugma. Ang masultihan matag adlaw nga kamo gihigugma makapadasig ug makapabayaw.

Serbisyo. Adunay hingpit nga kalipay sa pagserbisyo sa usag usa ug ilabi na kon gihimo ninyo kini sa tawo nga inyong gihigugma.

Panaghigala. Kamo adunay kauban sa maayo ug dili maayo nga panahon.

Pagsalig. Makapahupay nga masayud nga kauban ninyo ang tawo kinsa kanunay nagtinguha sa unsay labing maayo alang kaninyo ug nga kamo makasulti kaniya nga dili mahadlok.

Pisikal ug Emosyonal nga Kasuod. Ang kaminyoon talagsaon nga relasyon diin ang Ginoo nagbugkos sa duha ka mga tawo sa usa ka mahangturong relasyon kansang mga tumong naglakip sa panag-uyon, panag-uban, ug hingpit nga kalipay.

Apil sa Pag-istoryahanay

Sa tibuok Agosto, kamo magtuon kabahin sa kaminyoon ug pamilya sa inyong mga klase sa korum sa priesthood ug sa Young Women ug sa Sunday School. Ang usa sa importante nga mga doktrina sa pamilya mao nga pinaagi sa kaminyoon sa templo, ang pamilya mabugkos ug usa ka pamilya gihapon human sa pagkabanhaw.

Human makabasa niini nga artikulo, hunahunaa kon unsa ka lahi ang inyong kinabuhi tungod kay kamo mahimong mabugkos sa kapikas didto sa templo. Usab, hunahunaa kon sa unsang paagi kini makaapekto sa inyong pagpili karon ug unsa ang inyong gihimo sa pag-andam alang sa kaminyoon sa templo. Isulat ang inyong mga pagbati ug ikonsiderar ang pagpakigbahin niini sa uban pinaagi sa pagpamatuod diha sa panimalay ngadto sa inyong pamilya, sa simbahan sa Dominggo, o sa sosyal nga media.

Mga Leksyon sa Dominggo

Hilisgutan Niining Bulana: Kaminyoon ug Pamilya