Te riroraa ei taata no te hau
Ua tauturu te hiero, te misioni e te taviniraa ia Roger e i toʻna utuafare ia haere i ni‘a i te avei‘a o te utuafare mure ore.
Ua ite o Roger Randrianarison e, te ere ra toʻna oraraa utuafare i te hoê mea.
Ua parau oia e, « Ua pure au i te Atua ia tauturu mai ia’u ia imi i te hoê mea no te arataʻi i to’u utuafare ». « Ua hinaaro vau ia arataʻi i to’u utuafare i roto i te hoê mea maitai, te hoê mea o te arataʻi i niʻa i te eʻa tiʻa ».
Te haapeʻapeʻa ra oia no niʻa i te aupururaa i ta’na na tamarii e toru—na tamaroa, o Randrianandry e o Sedinirina, e te tamahine o Nirina. Aita oia i oaoa i te mea e, na roto i toʻna huru riri ohie, ua faatupu mai te reira i te mau tamataraa i roto i te utuafare. Ua hinaaro oia ia riro ei metua tane mărû aʻe.
Ua parau oia e, « Ua faaoti aʻera vau e, o vau te taata e tiʻa ia taui no te mea ua ite au e, o vai te huru taata ta’u i riro mai.
Ua topa te ohipa patu fare a Roger tau matahiti i maʻiri aʻenei, e te rave nei oia i te ohipa faahoro taxi i Antananarivo, Madagascar. I te hoê mahana ua faauta oia e piti na tuahine misionare.
Te parau ra oia e, « I to raua parahiraa mai i roto i te pereoo, ua ui mai ra raua i to’u iʻoa e e utuafare anei to’u ». « Ua ui mai raua e, ua ite anei au e, o vai te Atua e te pure ra anei au Ia’na ».
Ua himene na misionare i te mau himene e o Roger a tere noa ai ratou e ua ani ia’na ia haere mai i te pureraa. Ua tamata oia i te haere no te tahi tau taime, tera râ, aita i nahonaho ia’na ia faataa i te hoê taime i roto i ta’na tarena ohipa, e ua moʻe te taamuraa i roto ia’na e te mau misionare.
E pae avaʻe i muri mai, te rave ra o Roger i te ohipa i te fare i te hoê mahana, a faaroo ai oia e piti na misionare te paraparau ra i te hoê taata i rapae mai i toʻna aua. Ua ite o Roger e, e haere mai raua e paraparau ia’na. Ua tupu mai te manaʻo i roto ia’na e, e tiʻa ia’na ia pahono, e, i te mau huru uiraa atoa ta raua e ui mai.
I muri aʻe i te faaiteraa i to raua iʻoa, ua ui mai ra na misionare ia’na e, ua ite anei oia i te parau no niʻa i te Atua. E. Ua hinaaro anei oia e pure i te Atua ? E. Ua hinaaro anei oia e paraparau i te mau misionare ? E. Ahea ? I teie nei. Ua parau mai ra na misionare e, e hoʻi mai raua i roto e 20 minuti. Ia hoʻi mai ra raua, ua apeehia mai raua e te hoê melo e noho ra na pihaʻi iho mai.
Ua haapii na misionare ia Roger e rave rahi taime i te roaraa hoê avaʻe i roto i toʻna fare. Na roto i te mau mea ta ratou i faaroo no niʻa i te Ekalesia, aita te toeʻa o toʻna utuafare i hinaaro e haapii na muri iho i te mau misionare. I muri aʻe hoê avaʻe te haapiiraa no niʻa i te evanelia, ua haere o Roger i te pureraa na muri iho i te mau misionare. Ua putapû oia i te huru o te fariiraa ta’na i ite. Ua parau oia e, « Ua farii te mau melo ia’u mai te huru e, e mea maoro to ratou matauraa ia’u ».
Ua hoʻi o Roger i te fare e ua parau i toʻna utuafare e, e bapetizohia oia i roto i te hoê avaʻe, e e tiʻamâraa to ratou no te maʻiti ia tomo i roto i te Ekalesia e aore râ, aita. Ua ani mai ra ratou ia’na ia tiaʻi rii ia nehenehe atoa ia ratou ia apiti atu ia’na. Ua haamata aʻera ratou i te haere i te mau pureraa e ua maere atoa ratou e te oaoa hoʻi.
Ua putapû roa te tamaiti paari a Roger, o Randrianandry, i te taime matamua a haere ai oia i te mau pureraa a te Ekalesia. Te parau ra oia e, « I te taime matamua a haere mai ai au i te pureraa, ua maere roa vau no te mea, e mea haehaa roa te taata ». « A tahi, e mea au maitai to ratou mau ahu no te pureraa. I muri aʻe i te reira, ua ite aʻera vau e, ua haere mai ratou no te hoê tumu mau, eiaha no te faaiteite noa i mua i te tahi atu mau taata ».
Ua bapetizohia te utuafare Randrianarisons i te 20 no fepuare 2003. I tera ra taime, vaʻu matahiti to Nirina, 17 to Sedinirina, e 19 to Randrianandry. Ua faaea te utuafare i te rave i te ohipa i te mahana Sabati e ua faariro i te oraraa i te evanelia ei ohipa matamua na ratou.
Te mau tauiraa
Te parau ra o Arelina, te vahine a Roger e, « I muri aʻe i to’u bapetizo-raa-hia, ua ite au e rave rahi tauiraa i roto i to matou utuafare ». « Ua riro mai ei utuafare varua, e ua tae mai te mau haamaitairaa e rave rahi, no te pae tino e no te pae varua, na roto mai i te oraraa i te evanelia ».
I te pae no te oraraa, ua haamauruuru Roger i te Metua i te Ao ra no toʻna tautururaa ia’na ia faati‘a faahou i ta’na ohipa imiraa faufaa. I muri aʻe e piti matahiti i te faahororaa i te taxi e i te tahi atu huru ohipa no te faaora i toʻna utuafare, ua haamata oia i te farii faahou i te mau faaauraa ohipa paturaa. Ua parau oia e, « Te tiʻaturi nei au e, te haamaitai nei te Atua ia’u ia faaoti anaʻe au ia pee Ia’na ».
Tera râ, te parau nei ta’na mau tamaiti e, te tauiraa rahi roa aʻe ta ratou i ite tei roto ïa i te huru o to ratou metua tane. Te parau nei ratou i teie nei no niʻa ia’na ei hiʻoraa no te haehaa e te maitai. Ua parau o Roger e, na te evanelia i faaue ia’na ia taui. Mai te taime a haamata ai oia i te tuatapapa i te reira, ua tamata o Roger i te faaî i toʻna oraraa i te mau mea maitai.
Ua parau oia e, « Auaʻe te mau haapiiraa o te evanelia, aita vau e riri faahou ». « I te tahi taime e tupu mai te mau ohipa imi peʻapeʻa, tera râ, tei roto te evanelia i to’u aau, tei roto i to’u upoo, e tei roto i to’u varua. Na te reira e tauturu nei ia’u ia vai hau noa ».
Ia tupu anaʻe te mau mea au ore, na Roger e tamărû i te mau melo o te utuafare e e faahaamanaʻo ia ratou ia rave mai ta te Faaora e rave.
Ua parau o Sedinirina e, « Ua riro to’u metua tane ei taata haehaa, e i teie nei, te atuatu nei oia i to matou utuafare ma te here ». « Ia hiʻo anaʻe au i te tauiraa i roto ia’na, e oaoa rahi to’u i te Metua i te Ao ra, i te evanelia, e i te riroraa ei melo no te Ekalesia ».
Hoê Utuafare Mure Ore
I te matahiti 2006, na roto i te tauturu a te moni tauturu i te taata haere hiero, ua haere o Roger e o Arelina i Johannesburg, Afirita Apatoa, no te taati ia raua i roto i te hiero.
Mai te matahiti 2009 e tae atu i te matahiti 2011, ua tavini o Sedinirina e o Randrianandry i te hoê misioni i Afirita Apatoa—o Sedinirina i Cape Town e o Randrianandry i Johannesburg. Te hoê tuhaa o to raua hinaaro puai ia tavini, no te tauturu ïa i te tahi atu mau utuafare ia taui, mai ta to ratou utuafare i taui.
Ua parau Randrianandry e, « E nehenehe i te hoê semeio mai teie te huru e tupu mai, e ua tupu no te mea ua tae mai te mau misionare i to matou fare ». « No reira, ua hinaaro vau ia rave i te reira atoa ohipa no te hoê utuafare i te tahi atu vahi ».
Na taua faaotiraa ra i hopoi mai i te tahi atu haamaitairaa i te utuafare Randrianarison. E iva mahana to Sedinirina e o Randrianandry faaearaa i roto i te pû haapiipiiraa misionare i Johannesburg. Ua faanaho o Roger no te reva i Afirita Apatoa e o Arelina e ta raua tamahine o Nirina, ia nehenehe i te utuafare taatoa ia taatihia i roto i te hiero. 14 matahiti to Nirina i taua taime ra, e te parau ra oia e, e mea fifi roa ia faataa i te ohipa i tupu e i te manaʻo tei tupu i roto ia’na.
Ua parau oia e, « ua haapuai te reira i to’u faaroo e ua tauturu ia’u ia fatata roa i te Atua ».
I teie mahana te haa nei te mau melo o te utuafare no te faati‘a e no te haapuai i te taata ati aʻe ia ratou. Te tavini nei Roger ei episekopo no toʻna paroisa. Te rave nei Arelina i te ohipa i roto i te Paraimere i roto i te faanahonahoraa te Faaroo i te Atua. E tauturu papaʻi parau no te tĭtĭ o Sedinirina. E tauturu papaʻi parau no te paroisa o Randrianandry. E arataʻi himene no te paroisa o Nirina.
Ua riro te evanelia ei pahonoraa no te mau pure i roto i te utuafare Randrianarison. Ua faaora te reira i te mau puta tahito, ua haafatata ia ratou, e ua horoʻa ia ratou i te raveʻa ia amuitahihia e a muri noa’tu. Ua haapii te reira ia Roger ia here. Ua parau oia e, « te oraraa utuafare o te oraraa ïa tei î i te here ».
No to Roger faautaraa i na misionare i roto i te pereoo taxi, i haamata ai oia i te rave i te eʻa o te ti‘araa pĭpĭ.
Hohoʻa o te utuafare Randrianarison na Matthew D. Flitton
Ua riro te tuatapaparaa a te utuafare i te evanelia ei tautururaa i te utuafare Randrianarison ia haafatata amui ia ratou.
Ua riro te ratereraa i Afirita Apatoa no te taati ia ratou i roto i te hiero no Johannesburg ei haapuairaa i te utuafare Randrianarison.
I niʻa : hohoʻa na David William Newman © IRI ; i raro : hohoʻa © Laura Parker