Ta tatou faufaa aiʻa rahi misionare
E tavini te mau misionare taatoa, to tei tahito ra e to teie anotau, ma te tiʻaturi ia faatupu i te hoê oraraa maitai aʻe no te tahi atu mau taata.
Te amo nei te mau misionare o teie anotau i te faufaa aiʻa rahi o te faaîraa i te fenua nei i te ite i te Fatu (hiʻo Isaïa 11:9). Mai ia Aberahama e tae atu ia Paulo e tae atu ia Amona e tae atu ia Wilford Woodruff, te faaite mai nei te mau misionare i roto i te mau papaʻiraa moʻa e i roto i te aamu o te Ekalesia i te mau misionare o teie tau apî ma te hohoʻa puai.
Ei melo misionare anei, te faaineine ra no te ohipa misionare rave tamau, te tavini ra i te hoê misioni, e aore râ, ua hoʻi mai na te misioni, e nehenehe ta tatou e apo mai i te itoito e i te faaûruraa na roto mai i teie mau hiʻoraa.
Ta tatou faufaa aiʻa misionare i roto i te Bibilia e i te Poe taoʻa rahi
Ua piihia te mau misionare o te Faufaa Tahito, mai ia Iona, ia faaite i te hoê reo faaara i te taata (a hiʻo Ezekiela 3:17–19). Ia au i te hiʻoraa o Iona te ite nei tatou i te faufaa o te tatarahapa e te haapaʻo. Te haapii mai nei te aamu o Aberahama ia tatou no niʻa i te paparaa tupuna e i te mana o te Autahuʻaraa a Melehizedeka.
Ua rohi te mau misionare o te Faufaa Apî, mai ia Petero e o Paulo, no te paruru i te mau haapiiraa a Iesu Mesia. Noa’tu râ i te reira, i roto i te roaraa o te tau, ua topa te ao nei i roto i te taivaraa. Ua faahoʻi faahou mai te Atua i te evanelia na roto i te peropheta Iosepha Semita. I teie nei, te rave nei tatou i te ohipa, mai tei ravehia e tera ra mau misionare, no te paruru e no te faaite i te mau haapiiraa a Iesu Mesia.
Iona i niʻa i te pae tahatai no Nineve, na Daniela A. Lewis. Ua tatarahapa Iona e ua haere e poro e e haapapû e, te faatere nei Iehova i te mau vahi atoa e aita Oia e horoʻa noa nei i Toʻna here i te hoê noa fenua e aore râ, nunaa (a hiʻo Iona 1–4).
© 2002 Daniel A. Lewis
Petero e o Ioane i mua i te mau haapii ture i Ierusalema, na Simon Vedder. Ua arataʻihia mai Petero e o Ioane i mua i te sunederi, e ua ani mai ra te tahuʻa rahi ia raua, « Aore matou i parau hua’tu ia outou, eiaha outou e haapii ma teie nei iʻoa ? e inaha, ua î roa Ierusalema ia outou i ta outou parau … Ua parau atura Petero… na ô atura, o te Atua ta matou e faaroo e ti‘a’i eiaha te taata » (Te Ohipa 5:28–29).
Ho-mai-hia e te Fare Manaha no te Aamu o te Ekalesia
Te aposetolo Paulo, na Karel Skreta. I roto i toʻna mau tere e ta’na mau episetole, ua faaite Paulo i te iteraa papû puai no niʻa i te Faaora ati aʻe Asia Naʻinaʻi e i te rahiraa o te mau fenua itehia i taua taime.
BPK, Berlin / Gemaeldegalerie Alte Meister, Staatliche Kunstsammlungen, Dres / Elke Estel / Hans-Peter Klut / Art Resource, NY
Te haamaitai nei Melehizedeka ia Aberama [Aberahama], na Walter Rane. Ua haamaitai Melehizedeka ia Aberama (a hiʻo Genese 14:18–20) e ua horoʻa atoa ia’na i te autahuʻaraa (a hiʻo PH&PF 84:14). I te tahi atu taime, ua fâ mai te Fatu ia Aberama, ma te parau mai e, « Ua opua hoi au… ia faariro ia oe ei veʻa no te hopoi i to’u nei iʻoa i te hoê fenua ê … E e riro oe ei haamaitairaa no to oe ra huaai i muri ia oe, e tiʻa’i ia ratou ia hopoi i teie nei toroʻa e teie nei Autahuʻaraa i te mau nunaa atoa ra » (Aberahama 2:6, 9).
Ho-mai-hia e te Fare Manaha no te Aamu o te Ekalesia
Ta tatou faufaa aiʻa misionare i roto i te Buka a Moromona
Alama, Amuleka, te mau tamaiti a Mosia, e o Samuela te Ati Lamana, te tahi noa teie o te mau hohoʻa misionare rarahi e itehia nei e tatou i roto i te Buka a Moromona. Na roto mai ia ratou te ite nei tatou i te mau hiʻoraa no te tatarahapa, te faaroo, te haapaʻo e te itoito. Mai ia ratou, e nehenehe ta tatou e turuʻi i niʻa i te faaûruraa e te heheuraa no ô mai i te Atua ra no te arataʻi i ta tatou ohipa misionare.
Amona i mua i te Arii Lamoni, na Gary L. Kapp. Ua faaora Amona, te hoê o te mau tamaiti a Mosia, i te nănă a te Arii Lamoni. Ia ani atu te Arii ia Amona e, na te Atua anei oia i tono mai, na ô atura Amona e, e taata oia tei piihia e te Varua Maitai no te haapii i te evanelia « i teie nei mau taata [no Lamoni], ia faafariuhia mai ratou i te ite i te parau-tiʻa e te parau mau » (Alama 18:34).
© Gary L. Kapp, eiaha e tapitihia te neneʻiraa
Oia tei faatae mai i te parau maitatai i to’u nei Varua ra, na Walter Rane. Ua fâ mai te hoê melahi ia Samuela te Ati Lamana e ua faaite mai i te « parau maitatai i te varua o [Samuela] » no niʻa i te hoʻiraa mai o te Faaora (Helamana 13:6–7). Ei tuhaa no toʻna piiraa ia haapii i te Ati Nephi, ua taʻuma o Samuela i niʻa i te patu aua o te oire no Zarahemela e ua faaite i teie parau maitatai i te taata.
Ho-mai-hia e te Fare Manaha no te Aamu o te Ekalesia
Ta tatou faufaa aiʻa misionare i roto i Te Parau Haapiiraa e te Mau Parau Fafau
I muri aʻe i te Faaho‘i-faahou-raa mai o te evanelia, ua titauhia te mau misionare. Ua faaite te mau misionare mai ia Dan Jones, Orson Hyde, e o Parley P. Pratt i te Buka a Moromona e te evanelia a Iesu Mesia. Te tahi pae mai te taeaʻe o te peropheta Iosepha, ua tavini ratou i te mau vahi fatata i to ratou fenua. Ua ratere te tahi pae i te atea roa no te faaite i te evanelia i te mau fenua mai ia Thailand, te mau Motu Sandwich (Hawaii), i Danemaka, e i Peretane.
Pinepine teie mau misionare matamua i te tavini i te misioni roa e te rau atoa. Ua faaruʻe ratou i to ratou mau metua, te feia tei herehia e ratou, ta ratou vahine, te mau tamarii e te mau mootua mai ta tatou e rave nei. Ua riro ratou ei hiʻoraa no tatou i teie mahana i te pae no te faaroo, te itoito, te haapaʻo, te tamau maite e te rave maitai.
Te mau orometua momoni, na Arnold Friberg, no roto mai i te hoê hohoʻa tumu na Christen Dalsgaard. E hohoʻa huru matarohia teie no te ohipa pororaa evanelia i te tenetere 19 ra, oia hoʻi, te hohoʻa o te hoê misionare Feia Mo‘a i te Mau Mahana Hopea Nei i tahito ra te haapii nei i te evanelia a Iesu Mesia i te hoê utuafare no Danemaka tei haaputuputuhia i roto i te hoê fare faaapu. Ua haapii atoa te mau misionare i te hiti purumu e aore râ, i roto i te mau fare putuputuraa o te oire.
© IRI, ho-mai-hia na Arnold Friberg
Te faaineine nei Wilford Woodruff no te bapetizoraa i Benbow Farm, na Richard A. Murray. Ua arataʻi te Fatu ia Wilford Woodruff i te mau matahiti 1840 ra i te fare faaapu no John Benbow i Herefordshire, Peretane. Ua papaʻi o Wilford e, « i vai na te taata i reira tei pure no te ani i te faanahoraa o te mau mea no tahito ra ». « Te ohipa tei tupu maori râ, i roto i na mahana matamua e toru ahuru i muri aʻe i to’u taeraa i reira, ua bapetizo vau e ono hanere taata … I roto e vaʻu avaʻe to’u raveraa i te ohipa i roto i taua fenua ra, ua arataʻi mai au tauatini e vaʻu hanere taata i roto i te Ekalesia. No te aha ? No te mea te vai ra hoê pŭpŭ taata tei ineine no te Evanelia » (« Discourse », Deseret Weekly, 7 no novema 1896, 643).
Patu i niʻa i ta tatou faufaa aiʻa misionare
Mai te mahana a faaara ai te peresideni Thomas S. Monson i te amuiraa rahi no atopa ra 2012 e, e nehenehe i te feia apî tamahine e i te feia apî tamaroa e reva i te misioni i te hoê matahiti apî aʻe, e rave rahi ahuru tauatini Feia Mo‘a i te Mau Mahana Hopea Nei tei tomo i roto i te aua misioni.
I roto i te amuiraa rahi no eperera 2013, ua faaite mai Elder Neil L. Andersen, no te Pŭpŭ no te Tino Ahuru Ma Piti Aposetolo, i toʻna iteraa papû no niʻa i te ohipa misionare e ua faaitoito mai ia tatou tataʻitahi ia riro ei tuhaa faufaa no teie semeio o te iritihia nei, na roto i te tautururaa i te feia tei ineine no te faaroo i te evanelia : « A faaûru papû noa ai te Fatu e rave rahi atu â mau misionare ia tavini, te faaara atoa nei Oia i te feruriraa e te iriti roa nei ho‘i i te aau o na taata e rave rahi atu â, na taata maitatai e te parau-ti‘a, ia farii i Ta’na mau misionare. Ua mâtau a‘ena outou ia ratou e aore râ e mâtau mai outou ia ratou. E fetii ratou no outou e te ora nei ratou na piha‘i iho i to outou fare. Te haere nei ratou na piha‘i iho ia outou na ni‘a i te puromu, te parahi ra i piha‘i iho ia outou i te haapiiraa, e te farerei nei ia outou i ni‘a i te Itenati » (« E semeio mau te reira », Liahona, Me 2013, 78).
Te bapetizo nei te mau misionare tae apî mai i te mau taata aiʻa no te mau motu no Sandwich (Hawaii) i te mau matahiti 1851 ra. E mea apî rii mai teie hohoʻa.
Eiaha e tapitihia te neneʻiraa
Haapii i te evanelia na ni‘a i te mau purumu, na Ken Spencer. Te faaite nei teie na misionare i te evanelia i te hoê taata i mua i te hoê fare hooraa buka i New Brunswick, New Jersey, te mau Hau Amui no Marite.
Ho-mai-hia e te Fare Manaha no te Aamu o te Ekalesia
Misionare morohi ore, na Juei Ing Chen. Te imi nei te mau melo o te Ekalesia no Taiwan, mai te mau melo misionare i te mau fenua atoa, ia faaite i to ratou oaoa i roto i te Ekalesia e te papaʻiraa moʻa Tei niʻa te mau papaʻiraa moʻa i te amuraa maa ; e tei niʻa te hohoʻa o te hiero no Taipei Taiwan i te vairaa rahi ninamu.
© IRI, ho-mai-hia na Juei Ing Chen
E uaʻa te Ati Lamana mai te roti ra, na Joselito Jesus Acevedo Garcia. Te faaite nei te hohoʻa i te varua o te ohipa misionare i rotopu i te taata reo paniora. Te faaineine nei e piti na misionare i te haapii i te evanelia a rave noa ai te taata i ta ratou ohipa no te mau mahana atoa. Te tiʻa nei te hiero no Lima Peru i ropu i te mau fare naʻinaʻi e i te mau animala no te fenua iho, ei faaiteraa i te tupuraa o te Ekalesia.
Ho-mai-hia e te Fare Manaha no te Aamu o te Ekalesia
Te mau misionare Feia Mo‘a i te Mau Mahana Hopea Nei i Sierra Leone, na Emile Wilson. Ua faati‘ahia te misioni matamua i Sierra Leone i Freetown i te 1 no tiurai 2007. Ua riro mai Freetown te 3 000raa o te tĭtĭ i roto i te Ekalesia i te 2 no titema 2012.
Ho-mai-hia e te Fare Manaha no te Aamu o te Ekalesia