Uiraa e pahonoraa
« Eaha ta’u e parau atu i te mau melo ore e ani mai nei e, no te aha aita te tahi o te mau melo o te Ekalesia e ora nei i ta tatou mau faatureraa ? »
E ohipa nehenehe roa ïa ahiri e, e haapaʻo hope roa te mau melo atoa o te Ekalesia i te evanelia. E ere te mau haamaitairaa rahi atu anaʻe ta ratou e fanaʻo i roto i to ratou oraraa, e riro atoa râ ratou ei mau hiʻoraa maitai no te mau taata e haati nei ia ratou. Tera râ, e taata tahuti tatou, no reira, e hape ihoa tatou i te tahi mau vahi. Te tumu rahi te tahi mau taata i hau ai i te haapaʻo i te evanelia i te tahi atu mau taata no te mea ïa e, ua taa ê to tatou huru faafariuraa e te puai o to tatou iteraa papû, to te tahi i to te tahi. E mea taa ê to tatou mau tamataraa i to te tahi, e e mea taa ê atoa te mau raveʻa tauturu e te mau taata no te tauturu ia tatou.
Eita paha te melo ore e maramarama i te mau taʻo mai « faafariuraa » e « iteraa papû », tera râ, e ite maramarama e, ua nehenehe ta te taata tataʻitahi e maʻiti nahea i to’na oraraa. E nehenehe ta outou e haamaramarama e, na te Metua i te Ao ra i faaoti ia riro mai te reira te huru. Ua horoʻa mai oia ia tatou i to tatou tiʻamâraa no te ma‘itiraa ia nehenehe ia tatou ia tupu i te rahi i te pae varua na roto i te maʻitiraa i te maitai. Ua ite atoa râ te Metua i te Ao ra e, e te mau taata atoa—eiaha râ o Iesu Mesia—e hape e no reira Oia i horoʻa mai ai i te hoê Faaora no tatou. Na roto i te Taraehara, e nehenehe ta tatou e tatarahapa, ia faaorehia te hapa, ia haapii no roto mai i ta tatou mau hape, e ia haere i mua i roto i te oraraa.
E nehenehe atoa ta outou e faaite e, aita tatou e haavâ nei i te feia o te ore nei e pee i te mau ture a te Ekalesia. Te tamata nei râ tatou i te tauturu ia ratou, ia haroʻaroʻa ia ratou, e ia faaoromai i to ratou huru. Aita tatou e farii i te hara, tera râ, aita tatou e faahapa nei i te taata hara (a hiʻo Ioane 8:11). Te vai noa nei te tatarahapa, no tatou paatoa.
Maʻimi i te papaʻiraa moʻa
E itehia te pahonoraa i te uiraa i roto i te mau papaʻiraa moʻa. Ia ore anaʻe te taata e haapaʻo i te mau faaueraa, eiaha tatou e haavâ (a hiʻo Mataio 7:1). Te parau ra Roma 3:23 e, « Ua rave paatoa hoi i te hara, e ua ere i te haamaitai a te Atua ra ». Tera râ, e parau mau, e mea tiʻa i te mau melo o te Ekalesia ia tamata ia riro ei feia haapaʻo.
Madison M., 13 matahiti, Texas, te mau Hau Amui no Marite
Haapii no niʻa i te Taraehara
Ia parau anaʻe te taata i te mau mea mai te reira te huru, aita vau e imi i te hapa i niʻa i te melo o te ore e pee nei i te mau ture, e faaohipa râ vau i te reira no te haapii i te parau no te Taraehara. E parau vau e, e ere no te mea e, e momoni matou, ua riro ïa matou ei feia maitai roa, e e parau vau e, te vai nei te Taraehara ia tiʻa ia tatou ia tatarahapa i ta tatou mau hara e ia faatitiaifaro i te reira mau hape. Na teie huru parau e iriti i te opani no te tahi atu mau uiraa e rave rahi.
Jayde H., 16 matahiti, Oregon, te mau Hau Amui no Marite
Te haapii nei te Ekalesia ia tatou ia rave i te maitai
Mai te mau huru taata atoa, te faaruru nei te Ekalesia i te mau tamataraa e te mau faahemaraa. E paruparu to tatou paatoa, eiaha râ no te reira e parau ai tatou e, e ere te Ekalesia i te parau mau. Na Iesu Mesia teie Ekalesia, o te tauturu nei i te taata ia ite i te evanelia mau e ia farii i te faateiteiraa. Te taata tino o te haapaʻo ore nei i te mau faaueraa (a hiʻo Mosia 3:19), e e ere ïa i te hape no te Ekalesia. Te haapii nei te Ekalesia ia tatou ia rave i te ohipa maitai. Tera râ, e tiʻa ia tatou paatoa ia maʻiti.
Lavinia S.,19 matahiti, Bulacan, Philipino
Ua faataahia te mau faatureraa no to tatou oaoa
Ia’u nei, ua tano maitai teie uiraa i te mea e, ua mâtau vau i te tahi mau taata tei rave i te maʻitiraa tei faaatea ê ia ratou i te evanelia. Ua horoʻa mai te Fatu ia tatou i te mau faaueraa ia oaoa tatou e no te « faatupu i te tahuti ore e te ora mure ore o te taata nei » (Mose 1:39). Te hinaaro nei te Fatu ia hoʻi tatou Ia’na ra ; tera râ, te hinaaro nei oia ia rave tatou i ta tatou iho mau maʻitiraa. No reira te tahi mau taata e ore ai e haapaʻo i ta tatou mau ture. Te tauturu nei te mau ture ia’u iho no te mea ua ite au e, ua horoʻa mai te Metua i te Ao ra i te reira ia’u nei ia tiʻa ia’u ia hoʻi e ia ora i pihaʻi iho Ia’na e ia oaoa. E tapaʻo faaite te reira no Toʻna here ia’u.
Morgane D., 18 matahiti, Languedoc-Roussillon, Farani
Haapaʻo i ta tatou mau faatureraa
Mai te au i te tahi atu pŭpŭ e aore râ, haapaʻoraa, te vai ra te tahi mau taata tei riro ei mau taata haapaʻo a‘e e aore râ, haapaʻo ore aʻe. Ta tatou noa, o te haapaʻoraa ïa i ta tatou mau ture, i te faito maitai roa e maraa ia tatou, e ia tiʻaturi e ia pure e, e na reira atoa te tahi atu mau taata.
Maren S.,16 matahiti, Arizona, te mau Hau Amui no Marite
Ia riro ei hiʻoraa maitai
E mea faufaa teie Ekalesia no te tauturu ia tatou ia haapaʻo i te mau faaueraa a to tatou Metua i te Ao ra, e ia ora faahou i pihaʻi iho Ia’na. Tera râ, eiaha no te mea e, tei roto te hoê taata i te Ekalesia e riro noa ïa oia ei taata maitai. A hiʻo na i to tatou ao i teie mahana, ua î i te ino e i te mau ohipa viivii, noa’tu e, ua î te ao nei i te taata tei faaoti e pee ia Iesu Mesia i roto i te oraraa hou te oraraa tahuti nei. Te manaʻo nei au e, te ohipa maitai roa aʻe o te tiʻa ia tatou ia rave o te faaiteraa ïa i te hiʻoraa maitai i to tatou mau hoa.
Kaden S., 15 matahiti, Utah, te mau Hau Amui no Marite
A pure no ratou e a hahaere ia ratou
Te mau melo e ore e haapaʻo nei i ta tatou mau faatureraa, aita ïa to ratou iteraa papû i faatumuhia i niʻa ia Iesu Mesia. E pure tatou no ratou, ia tiʻa ia ratou ia imi i te arataʻiraa a te Varua, e ia tiʻa ia ratou ia farii i to ratou iho iteraa papû. E haere tatou e farerei i teie mau taata e e tauturu ia ratou ia haere mai i te Mesia.
Andrea C.,13 matahiti, Lima, Peru