Ani manihini i te Faaora ia tomo mai
« Inaha, te tiʻa noa nei au i te uputa, te patoto atu nei : ia faaroo mai te hoê taata i ta’u reo, e ua iriti i te opani ra, e haere atu vau i roto ia’na ra » (Apokalupo 3:20).
I to’u tau tamariiraa, i te puʻe tau Noela, e faatautau to’u metua vahine i te hoê hohoʻa o te Faaora te patoto ra i niʻa i te uputa. Aita â matou i riro atura ei melo no te Ekalesia, e ua ani tamau noa vau, « No te aha Iesu e patoto ai i niʻa i te uputa ? O vai to te tahi pae mai ? »
Tau matahiti i muri mai ua ite aʻera vau e, aita e tape‘araa to te pae rapae o te opani ta te Faaora e patoto nei. Titauhia i te taata i roto mai ia iriti mai i te uputa. I teie nei ua ite au e, o vai to te tahi pae mai i te opani. O tatou ïa ! Te patoto nei te Faaora, e ua titauhia ia tatou paatoa ia iriti i te opani e ia ani manihini Ia’na ia tomo mai i roto i to tatou oraraa.
I to’u apîraa, ua faaoti aʻera vau ia ani manihini i te Faaora ia tomo mai i roto i to’u oraraa na roto i te bapetizoraa ia’u e te riroraa ei melo no te Ekalesia. Ua riro to’u mau hoa ei mau hiʻoraa maitai no’u. Oia atoa to’u mama ruau. E rave ohipa hiero oia i roto i te hiero no Los Angeles Califonia. E faaruʻe mai oia i te fare i te hora 4:00 i te aahiata no te tavini i te Fatu i roto i te hiero.
E piti matahiti i muri iho i to’u bapetizoraahia, ua faaoti aʻera vau e tavini i te Fatu ei misionare rave tamau. I roto i ta’u misioni, ua tauturu vau e rave rahi taata ia haapii mai no niʻa i te Faaora ia tiʻa ia ratou ia ani manihini Ia’na ia haere mai i roto i to ratou oraraa.
I muri mai, ua tavini au ei peresideni misioni i Samoa. Ua ani tamau noa vau i te mau misionare apî eaha te taime i faaoti ai ratou ia rave i te hoê misioni. E rave rahi tei parau mai e, tei roto ratou i te Paraimere a rave ai ratou i te faaotiraa ia tavini !
E tauturu te Paraimere ia outou ia faaineine no te ohipa misionare. A haapii mai i te rahiraa e tiʻa ia outou ia apo mai. A haamau i te hoê opuaraa no te tavini i te hoê misioni. Ei reira e tiʻa atoa ai ia outou ia tauturu i te taata ia ani manihini i te Faaora ia tomo i roto i to ratou oraraa. Te riroraa ei misionare, na te reira e taui i to outou oraraa—ua taui te reira i to’u.
Faahohoʻaraa na Jennifer tolman