Eaha te mea i arataʻi mai ia outou i Rexburg nei ?

Sandra Rush, Idaho, te mau Hau Amui no Marite

I muri aʻe e rave rahi matahiti i te oraraa i te vahi aita i rahi te melo o te Ekalesia, ua taui maua o ta’u tane i te faaearaa e ua haere maua i Rexburg, Idaho, te mau Hau Amui no Marite, e piti anaʻe utuafare melo ore i reira. Ua fanaʻo maua i te mea e, ua ora maua i pihaʻi iho i te hoê o taua na utuafare ra.

Te tapu ra te metua tane i te aihere i te taime matamua a haere ai maua na niʻa i to maua aroa. Ua haere atura maua o ta’u tane na roto i te aua no te farerei. A toro atu ai au i to’u rima, ua ui atura vau e, « Ahani, eaha te mea i arataʻi mai i to oe utuafare i Rexburg nei ?

Ua pahono mai ra oia e, « no ta’u ohipa—e ua imi taa ê matou i te hoê oire e tiʻa ia faaitehia’tu i te Mesia ra ».

Mai te mea ra e, ua taorahia mai te hoê pakete pape toʻetoʻe i niʻa i to’u mata, tera râ, ua ataata vau. Ua faaoti aʻera vau i taua taime ra e, noa’tu eaha ta to maua taata tupu apî i parau e aore râ i rave, e riro mai maua ei na taata tupu maitai roa aʻe aita teie utuafare i farii aʻenei. I roto i te mau farereiraa atoa, e tamata maua i te pahono noa ma te mărû, te here e te maitai, mai ta te Faaora e na reira.

I roto i na matahiti e vaʻu i muri mai, ua tupu te mau ohiparaa i rotopu i to matou na utuafare. Ua ani manihinihia te metua vahine ia haere mai i te mau ohiparaa a te Sotaiete Tauturu. Ua ani manihini mai oia ia’u e e rave rahi Feia Mo‘a i te Mau Mahana Hopea Nei no taua vahi ra, ia haere i te hoê aruʻi putuputuraa faaterehia na ta’na ekalesia. Ua ani manihinihia ta’u tane e o vau ia haere e faaroo i te aruʻi oriraa e te haʻutiraa piana a ta raua mau tamarii. Ua anihia to raua utuafare ia amui mai i roto i te faaoaoaraa tunuraa maa no taua vahi ra. E ua farii maua i te mau niuniu na ta raua mau tamarii paari ia hinaaro anaʻe ratou e hoʻi i te fare ia faaoti te ohipa, aita i roaahia to ratou na metua.

Ua haapeʻapeʻa na metua aʻunei ta raua mau tamarii e haamata ai i te au roa i te Feia Mo‘a i te Mau Mahana Hopea Nei, no reira aita raua i vaiiho i ta raua mau tamaroa ia tomo mai i roto i te faanahoraa ohipa Scout a ta matou paroisa. Tera râ, ua riro to maua utuafare ei vahi papû, inaha, e vaiiho raua i ta raua mau tamarii ia haere mai e haʻuti e ta maua mau mootua ia haere mai ratou e farerei ia maua.

I te mau taime atoa e tamata to maua na taata tupu i te tauturu mai ia maua ia ite « i te hape o to maua haerea », e faahaamanaʻo maua ia raua e, te faatura nei maua i to raua mau tiʻaturiraa, e i te huru o to raua oraraa e ta raua huru haapaʻoraa i ta raua mau tamarii. E i reira maua e parau atu ai e, te hinaaro atoa nei maua ia faatura atoa mai raua i to maua mau tiʻaturiraa, tei faatumu-atoa-hia i niʻa i te mau haapiiraa a te Faaora.

Ia tamata anaʻe te metua vahine i te faariro i to matou taa-ê-raa mai te hoê abuso hohonu na roto i te parauraa e, ua tiʻaturi te Feia Mo‘a i te Mau Mahana Hopea Nei i te hoê « Iesu taa ê », e faahaamanaʻo vau ia’na e, ua tiʻaturi matou paatoa e, e mea hanahana Oia e e Tamaiti here Oia na te Atua. I te pae hopea ua tupu mai te hoê auhoaraa maitai roa i rotopu ia’na e o vau.

Ua taui to raua utuafare i te faaearaa ma te ore e tomo mai i roto i te Ekalesia. Tera râ, mai te mea e, e nehenehe ta ratou e parau e, « Ua noho matou i rotopu i te mau momoni ; e mau taata maitai ratou e te faatura i te taata ma te aau tae mau », e nehenehe ïa ta’u e parau e, ua manuïa matou i te riroraa ei mau taata tupu maitai e i te tautururaa ia ratou ia riro ei feia aau matara aʻe e te afaro i roto i ta ratou mau parauraa no niʻa i te Feia Mo‘a i te Mau Mahana Hopea Nei.