Camille no New York City

E mea rahi roa te mau hoa o Camille, e iva matahiti. « Te mea au roa na’u i roto i to’u mau hoa maori râ, e mea taa ê ratou paatoa », ta’na ïa parau. « No te mau vahi taa ê mai ratou, e e mea taa ê ta ratou huru raveraa i te ohipa ». E mea au na Camille ia haapii mai i te mau mea maitai na roto mai i toʻna mau hoa, e e mea au na’na ia faaite i te mau mea e o ratou. Te ohipa maitai roa aʻe ta’na i faaite i te hoê hoa o te evanelia ïa. I muri aʻe i toʻna faaiteraa i te hiroʻa faaroo matamua, i toʻna hoa ia Yailin, ua ani manihini o Camille i te utuafare o toʻna hoa ia farerei i te misionare. Ua haapii atoa Camille ia Yailin nahea ia pure. I teie nei, e melo o Yailin e toʻna metua vahine no te Ekalesia.

Ta’u mau himene au roa maori râ, « E tamarii au na te Atua ra » e « E Ti‘a i te Utuafare ia Ora Tahoê ». Ta’u irava au roa maori râ Te Parau Haapiiraa e te Mau Parau Fafau 19:23 : « A haapii mai i te mau mea no’u nei, e a faaroo mai na i ta’u mau parau ; a hahaere hoi i roto i te mărû o to’u nei Varua, e e noaa ïa ia oe te hau i roto ia’u nei ». Na teie irava e faaitoito tamau noa ia’u ia oto anaʻe au.

Ua bapetizohia to’u hoa o Yailin i te matahiti 2011. E mea au roa na’u i te mea e, ua nehenehe ta maua e haere amui i te pureraa. Te tauturu nei au ia’na ia tamau aau i te mau hiroʻa faaroo. Tei niʻa maua i te hiroʻa faaroo numera iva.

No te fenua Repupirita Dominicaine to’u mama e to’u papa. No reira paha te raiti e te pipi e te moa i riro ei maa au roa na’u. Na teie e faahaamanaʻo nei ia’u e, no hea mai to’u utuafare.

E pae taata i roto i to’u utuafare. To’u tuahine o Emily, e bapetizohia oia e e haamauhia i te avaʻe titema. To’u taeaʻe o Victor, ua piihia oia i te iʻoa o to’u metua tane. Aitâ ta’u e animara, tera râ, te feruri nei au e rave mai i te hoê honu. E mea au na’u te honu no te mea e mea nehenehe ratou, e e mea taere roa ratou, no reira, eita ïa ratou e horo ê.

E mea au roa na’u te aamu o te Tapena Moroni i roto i te Buka a Moromona. E taiʻo to’u papa i te reira i roto i te pô utuafare, e ua faaûru te reira ia’u ia hamani i ta’u iho reva. Te faahaamanaʻo mai nei ta’u reva ia’u e, o vai au, e tei pihaʻi iho noa te Metua i te Ao ra ia’u.

Hohoʻa ho-mai-hia e te utuafar, maoti e mea ê atu i tei tapaʻohia ; hohoʻa no te tii no te ti‘amâraa © Getty Images ; Come Forth, na Walter Rane, ho-mai-hia e te Fare Manaha no te Aamu o te Ekalesia