E tae atu i te taime e farerei faahou ai tatou
Ua parau… vau
E au te parau ino i roto i ta’u mau parau mai te aihere baradane te mau i niʻa i te huruhuru uri.
Ua oto roa vau i to’u hiʻoraa i te hohoʻa mata o to’u metua vahine. Hiti mahuta. Maere. Inoino. Ua itehia teie mau mea atoa i roto i toʻna mata, e tupu mai ai te manaʻo—hoohia.
Noa’tu ta’na mau haapiiraa ia’u i te roaraa o to’u na matahiti hoê 15 ia faatura i te Metua i te Ao ra na roto i te parau e i te ohipa, tei ô vau, ma te hapa, i te vaiihoraa i te hoê parau teimaha ia mahuti i rapae i to’u vaha.
Aita vau i hinaaro ia parau ino. Na mua’tu i taua matahiti ra, aita vau i faaohipa aʻenei i te parau maamaa. Tera râ, i taua puʻe tau mahanahana ra, ua rave au i te ohipa i roto i te tuhaa haapa‘o i te ohipa taiʻa e te ohipa aʻuaʻu animara no Utaha, e ua mau roa ia’u taua peu ra na roto mai i te mau tamaroa e rave ra i te ohipa i pihaʻi iho ia’u.
Ta matou ohipa o te tapuraa ïa i te aihere baradane i te pae purumu. Ua faaoti oioi matou e e aihere ino mau te Arctium minus. E tupu aere oia i te mau vahi atoa, e maiha mai oia i niʻa aʻe i te tahi atu mau raau. Na toʻna mauraa e haru i niʻa te mau huru mea atoa e tapiri mai ia’na.
Ma te ope i roto i te rima, e ati ïa to matou i te aroraa i teie aihere i te roaraa o te puʻe tau mahanahana ma te rohirohi—e te parau ino. I te haamataraa ua maui rii to’u tariʻa i te mau parau ino a to’u mau hoa. I muri iho ua farii au i te reira. E i te pae hopea, ua rave atoa vau i te reira. I te hopea o te puʻe tau mahanahana, e au te parau ino i roto i ta’u mau parau mai te aihere baradane te mau i niʻa i te huruhuru uri.
To’u iteraa i te au ore o to’u metua vahine i ta’u mau parau tano ore, ua ite aʻera vau e, e tiʻa ia’u ia taui i te reira.
E ere i te mea ohie. E ere te parau ino i te ohipa maʻiti-noa-raa i te taʻo. E huru feruriraa atoa râ. Te mau aparauraa ta tatou e faati‘a nei i roto i to tatou oraraa, te mau taʻo ta tatou e taiʻo nei, e te mau hohoʻa ta tatou i mata‘ita‘i nei, na te reira e faanaho i to tatou mau manaʻo. Aita i maoro ua haapii mai au e, titauhia ia’u ia taui i te mea ta’u i titau manihini i roto i to’u varua mai te mea e, ua hinaaro vau e taui i te mau taʻo ta’u e faaohipa.
Auaʻe râ, e mea itoito vau i te haere i te pureraa e i te haapiiraa evanelia. Ua maiha mai te mau parau ino i ni‘a te mau manaʻo teitei, auaʻe râ, tei roto noa vau i te vahi e tiʻa ai i taua mau manaʻo teitei ra ia tupu faahou te mau aa. Ua haapapû vau i te ohipa taiʻoraa i te mau papaʻiraa moʻa i te mau mahana atoa e i te pure. Ua faaatea mai au ia’u i te mau hohoʻa teata e te mau faanahoraa afata teata o te faaô faahou mai i te mau manaʻo poiri.
Ua ite mărû noa vau i ta’u huru paraparau i te haereraa i te maitai. I te hopea o te matahiti, ua tiʻamâ vau i ta’u peu parau ino.
Mai taua ohipa i tupu ra, ua haapii mai au e rave rahi mau mea no niʻa i te mana o te mau parau. E nehenehe i te parau e faatupu e aore râ, e haamou. E nehenehe e haapepe, e aore râ, e faaora. E nehenehe e taʻiri i te taata raro, e aore râ, e nehenehe e tanu i te huero o te tiʻaturiraa e te here.
E mea au ia ite e, te Faaora Iho, te Hamani o te raʻi e te fenua, ua parauhia Oia e, te Parau (te Logo) (a hiʻo Ioane 1:1–4 ; PH&PF 93:6–11).
Ua haapii mai au e, e auraa maitai e te ino to te parau. E parau tapu tatou no te faaite i te parau mau i roto i te fare haavâraa. E fafau tatou ma te hanahana, e aore râ, e parau tapu tatou, ia haapaʻo i te mau faaueraa a te Atua i te taime a bapetizohia ai tatou. E rave atoa tatou i te mau euheraa moʻa no te haapaʻo i ta tatou mau fafauraa no te hiero no te farii i te mau haamaitairaa rarahi roa aʻe a te Metua i te Ao ra.
Ei puohuraa : E rahi atu to tatou riroraa mai te Parau ra te huru mai te mea e, e faatura ta tatou mau parau Ia’na e e riro mai ei hiʻoraa no Toʻna hanahana.
Hohoʻa na Anna Laurent