Haapeepee i te ohipa no te faaoraraa

A ani manihini noa ai e a here noa ai e a tavini noa ai tatou ia vetahi ê, e riro mai tatou ei mau pĭpĭ mau na Iesu Mesia ma te tauturu atoa ia haapeepee i te ohipa no te faaoraraa.

Noa’tu â te vai ra te anaanatae no ni‘a i te ohipa a te mau misionare rave tamau na ni‘a i te Itenati e te raveraa i te tahi mau tere mata‘ita‘iraa na roto i te mau fare pureraa, e tuhaa iti noa te reira no te hoho‘a rahi o te ohipa no te faaoraraa. Te mea faufaa roa a‘e, o te huru ïa tatou, te mau melo, e faaô atu ia tatou i roto i te hoho‘a rahi a‘e no te haapeepeeraa i te ohipa no te faaoraraa. Aita tatou e anihia nei ia faaô ia tatou i roto i te tahi faanahoraa apî. Te faaitoito-noa-hia ra tatou ia riro mai ei pĭpĭ mau na Iesu Mesia. Ta tatou hopoi‘a, o te utuhiraa ïa ia tatou iho i roto i te hereraa e te taviniraa i te taata e faaati nei ia tatou—tamahana i te hoê hoa ohipa i roto i te ati, titau i te mau hoa ia haere mai i te hoê bapetizoraa, tauturu i te tahi taata paari e to’na aua, titau i te hoê melo mauiui no te tahi tamaaraa e aore râ tauturu i te tahi taata tupu e to’na aamu utuafare. E mau rave‘a ohie ana‘e teie, e te oaoa atoa hoʻi, no te titau i te mau melo mauiui e ratou atoa e ere no to tatou faaroo ia ite i to tatou oraraa e i muri iho ia ite i te maramarama o te evanelia. E riro paha te faaiteraa ia ratou i to tatou mau taime anaanatae e to tatou mau taime mo‘a i roto i to tatou oraraa i te riro mai ei rave‘a faahiahia roa a‘e no tatou no te « rave i te ohipa i roto i ta [Iesu Mesia] ra ô vine no te faaoraraa i te mau varua o te taata nei [te tane e te vahine] » (PH&PF 138:56).

Eaha te ohipa no te faaoraraa ?

Te ohipa no te faaoraraa, o te ohipa ïa a te Metua i te Ao ra no te « faatupu i te tahuti ore e te ora mure ore o te taata nei » (Mose 1:39). I roto i teie ohipa faufaa rahi, te vai nei te ohipa misionare a te melo, te tapeʻaraa i te taata faafariu, te faaitoitoraa i te melo mauiui, te ohipa hiero e te aamu utuafare e te haapiiraa i te evanelia.¹ Pinepine roa tatou i te feruri i teie mau tuhaa o te evanelia ei mau mea taa ê roa. Teie râ, i roto i Te ohipa no te faaoraraa : Haapurororaa na te feia faatere o te ao nei tei tupu i te 23 no tiunu 2013, ua haapii o Elder Russell M. Nelson no te Pŭpŭ no te Tino Ahuru Ma Piti Aposetolo e, « eita teie ohipa e vahihia. E ere teie mau ohipa i te mau ohipa taa ê te tahi i te tahi; e mau tuhaa ana‘e te reira no te ohipa no te faaoraraa ».²

Te parau e « Haapeepee i te ohipa no te faaoraraa »—te i‘oa tei topahia i ni‘a i te tahua itenati apiti i te haapurororaa (hasteningthework.lds.org)—no roto mai ïa i te fafauraa a te Fatu : « Inaha, e [haapeepee] au i ta’u ohipa i roto i te tau mau no te reira » (PH&PF 88:73).

Ua riro te mau oro‘a faufaa rahi no te autahu‘araa—te bapetizoraa, te haamauraa, te faatoro‘araa i te autahu‘araa na te mau tane e te mau oroʻa hiero—ei mau taahiraa rarahi i ni‘a i to tatou eʻa hoʻiraa i to tatou Metua i te Ao ra. Mai te mea e, e amui tatou i roto i te ohipa no te faaoraraa, e pee tatou e e faaûru atoa tatou ia vetahi ê ia pee i te eʻa no te fafauraa.

E rave amui te mau melo e te mau misionare i raro a‘e i te mau taviri no te autahu‘araa

Ua tae te taime ia tutonu faahou â to tatou mana‘o i ni‘a i te parau tumu niu e, te riroraa ei melo i roto i te Ekalesia a te Fatu, maori râ, o te piiraahia ïa ia tatou ia fafau ia tatou iho i roto i Ta’na ohipa no te faaoraraa. Te mau nei te mau peresideni tĭtĭ e te mau episekopo i te mau taviri autahu‘araa no te ohipa misionare i roto i ta ratou mau amuiraa no te Ekalesia³ e na ratou e tauturu i te mau melo ia rave i te ohipa ta te mau pĭpĭ mau a te Mesia e rave—faaite i te maramarama o te evanelia. Te mau nei te mau peresideni misioni i te mau taviri autahu‘araa o te faati‘a ia ratou ia arata‘i i te ohipa a te mau misionare ta ratou e faatere nei.⁴ Ua haapiipiihia te mau misionare rave tamau no te haapii i te mau taata ua faaineinehia no te farii i te evanelia. Na ratou te tururaa mai na muri mai i te mau melo i roto i teie ohipa misionare a te melo, eiaha na ratou e na mua mai. E no reira, e mau apiti te mau misionare rave tamau e te mau misionare melo no te hopoi i te evanelia i roto i te oraraa o te taata ta te Fatu i faaineine no te farii i te reira.

I roto i te haapurororaa, ua parau te peresideni Thomas S. Monson : « Teie te taime no te mau melo e te mau misionare ia haere amui, ia ohipa amui, ia haa amui i roto i te ô vine a te Fatu no te hopoi i te mau varua Ia’na ra. Ua faaineine Oia i te mau rave‘a na tatou no te faaite i te evanelia na roto i te mau huru rau, e e tauturu mai Oia ia tatou i roto i ta tatou mau ohipa mai te mea e haa tatou ma te faaroo no te rave faaoti i Ta’na ohipa ».⁵

Elder missionaries teaching and contacting in Atlanta, Georgia.

Ua parau o Elder Neil L. Andersen no te Pŭpŭ no te Tino Ahuru Ma Piti Aposetolo no ni‘a i te faufaa o te here. Ua parau oia e, « Te rave amui nei tatou i te ohipa na roto i te faaroo e te tahoê—te faaroo ia arataʻi mai te Fatu i to tatou mau taahiraa, e te tahoê, te tahi i te tahi e i te mau misionare, na roto i te here Ia’na e i te tahi e te tahi, e i te feia ta tatou e tavini ».⁶

Na te mau apooraa paroisa e arata‘i tiʻa mai, na te mau taata faatere ohipa misionare no te paroisa e faaau mai

I raro a‘e i te faatereraa a te episekopo, e faaohie te apooraa paroisa, e turu atoa e e faaau hoʻi ratou i te mau tautooraa a te mau melo o te paroisa na roto i te faanahonahoraa e te arata‘iraa i te ohipa no te faaoraraa a te paroisa.⁷

Ei melo no te apooraa paroisa, na te taata faatere ohipa misionare no te paroisa « e faaau i te mau tautooraa a te paroisa no te imi, no te haapii e no te bapetizo i te mau hoa o te Ekalesia. Na’na e faaau i te reira ohipa i ni‘a i te ohipa a te mau misionare rave tamau ».⁸

Bishopric and ward leaders meeting together in a ward council meeting.

I ni‘a i te mau taata faatere ohipa misionare no te paroisa, ua parau Elder Nelson e : « A tauturu [i te mau misionare no] te faaîraa i ta ratou buka farereiraa i te mau farereiraa maitai, aita ïa to ratou e taime no te haere e patoto i ni‘a i te mau opani no te imi i te taata e haapii… [O outou] te tuʻatiraa i rotopu i te mau misionare, te apooraa paroisa e te mau melo o te paroisa ».⁹

Te tapa‘o mau no te manuïaraa

Ei Feia Mo‘a i te Mau Mahana Hopea Nei, ua haamaitaihia tatou ia ora i teie taime te haapeepee nei te Fatu i Ta’na ohipa. No te mea e opuaraa ihoa na te Atua te tuuraa ia tatou i ni‘a i te fenua nei i teie taime, e faito puai to tatou no te rave rahi atu â i ta tatou e mana‘o ra e maraa ia tatou. Mai te mea e, e haere tatou e tii na roto i te mărû e te aroha i te taata e hinaaro nei i ta tatou auhoaraa e ta tatou tauturu, eita roa ïa tatou e ore e manuia. E tae mai te manuiaraa misionare na roto i te faaûruraa e manii mai i roto i to tatou feruriraa e to tatou aau, e na roto noa i te ani-manihini-raa ia vetahi ia tomo mai i roto i to tatou oraraa tei faatumuhia i ni‘a i te evanelia. O te ani-manihini-raa te tapa‘o no te manuiaraa, e ere te bapetizoraa e aore râ, te itoito-faahou-raa mai te taata i roto i te Ekalesia. Mai ta Elder Jeffrey R. Holland no te Pŭpŭ no te Tino Ahuru Ma Piti Aposetolo i parau no ni‘a i teie nuu misionare hanahana e tomo ra i roto i te aua misioni : « Ua tae te hora no tatou ia parau e, ‘Teie mai nei ratou’. E ti‘a ia tatou ia faanahonaho e ia faaohipa i teie rima tauturu tei tonohia mai na te raʻi mai ei rave‘a maitai roa a‘e no te faahoturaa ».¹⁰

An elder missionary talking to a male passenger on a bus.

Ua tae te taime no tatou paatoa ia maramarama rahi a‘e i ta tatou hopoi‘a i roto i te haapeepeeraa i te ohipa no te faaoraraa. A faariro ai tatou, i te ohipa misionare a te melo, te tapeʻaraa i te taata faafariu, te faaitoitoraa i te melo mauiui, te ohipa hiero e te aamu utuafare e te haapiiraa i te evanelia, ei tuhaa ohie i roto i to tatou oraraa, e itehia ia tatou te oaoa rahi e e horo‘ahia mai ia tatou te mau horo‘a pae varua titauhia no tatou no te haapuai i te Ekalesia i roto i te 21raa o te tenetere.

Hoho‘a faahoho‘araa na David Stoker

Hoho‘a faahoho‘araa na John Luke e Cody Bell