Ati a‘e te Ekalesia
Te faahanahana ra Mogolia i te 20 matahiti o te Ekalesia
I te monire 15 no eperera 2013, hau i te 300 melo o te Ekalesia tei putuputu i Zaisan Hill i Ulaanbataar, Mogolia, no te faahanahana i te 20raa o te matahiti o te Ekalesia i te reira fenua. Ua himene te hoê pŭpŭ himene 50 taata, e ua faaroo te taatoaraa i te hoê haruharuraa no Elder Neal A. Maxwell (1926–2004) tei haamoʻa ia Mogolia no te pororaa evanelia i te matahiti 1993.
No Elder Tai Kwok Yuen, e melo na mua a‘enei no te peresideniraa Area no Asia, tei pee atoa hoʻi ia Elder Maxwell i Mogolia i te matahiti 1993 ra, ua ite oia i te huru o to« te rima o te Fatu tura’i-tamau-noa-raa i roto i teie tuhaa no Ta’na ô vine ».
Ua rau te mau faaoaoaraa i faatupuhia i te roaraa o te hepetoma no teie faahanahanaraa. 200 misionare tahito tei tae mai i te hoê putuputuraa misioni. Hau i te 1000 feia Mogolia tei tavini ei misionare rave tamau—fatata roa 1 i niʻa i te 10 o te mau melo i Mogolia. Ua faatupuhia te tahi mau oro‘a bapetizoraa na Mogolia taatoa i te mahana pae ra i te pô ; e 24 taata tei bapetizohia i tera mahana. Ua paraparau o Mary N. Cook, tei haamauruuruhia aita i maoro a‘e nei i te peresideniraa rahi o te Feia Apî Tamahine, i roto i te hoê pureraa na te Feia Apî Tamahine, e ua faahaʻutihia te hoê video no ni‘a i te mau arata‘iraa no te opuaraa Family Tree i roto i te hoê opani iriti no ni‘a i te aamu utuafare. Ua faaiteitehia i roto i te hoê aruʻi rahi te hiro‘a tumu e te mau tareni o te mau melo o te Ekalesia e rave rahi.
Te Feia Mo‘a i Haiti e faahanahana ra, ua tauturu ia tanu i te mau tumu raau
I te 1 no me 2013, ua amui te mau melo o te Ekalesia no Haiti i roto i te hoê opuaraa rahi ati a‘e te fenua no te tanuraa i te mau tumu raau. E mano ohi tei tanuhia i te mahana matamua no te opuaraa, e e rave rahi â te haere mai nei. Ia oti te opuaraa, e tae‘ahia e 400 000 tumu raau apî te tupu mai i Haiti, mai te taporo, te anani, te haari, te iita e te aluna.
Na te Ekalesia i hoo mai i te reira mau tumu raau ei tuhaa no to’na tururaa i te tâtâîraa ia Haiti i muri mai i te aueueraa fenua. Ua faafana‘o atoa teie opuaraa i te mau melo i te hoê ohipa tautururaa no te faahanahana i te 30raa o te matahiti o te Ekalesia i roto i te reira nunaa o te mau motu. A toru ahuru matahiti i teie nei, ua tere te peresideni Thomas S. Monson i Haiti, i tera ra tau, e melo noa ïa no te Pŭpŭ no te Tino Ahuru Ma Piti Aposetolo, e ua haamoʻa oia i te fenua no te pororaa i te evanelia tei faaho‘i-faahou-hia mai.
Ua ti‘a o Elder Neil L. Andersen no te Pŭpŭ no te Tino Ahuru Ma Piti Aposetolo i Haiti i te taime no te faahanahanaraa e ua peresideni oia i te hohoraraa o te ofaʻi haamana‘o i te haamataraa o te Ekalesia i Haiti.
Ua horo‘a te Ekalesia hoê mirioni paunu maa i te faanahoraa Feeding America
I te avaʻe no me 2013 ra, na roto i ta’na amaa tauturu i te ao nei, te Latter-day Saint Charities, ua horo‘a te Ekalesia hau i te hoê mirioni paunu maa i te faanahoraa Feeding America, te faanahoraa tauturu rahi roa a‘e no te mau Hau Amui no Marite i te pae no te haamaharaa i te poʻia. I roto i taua maa horo‘a ra, te vai ra te mau maa punu mai te mau maa hotu, te maa pota, te pĭpĭ, e e operehia te reira i te mau utuafare navaʻi ore na roto i te tahi mau fare horo‘a maa e te tahi mau fare farii otare na te mau Hau Amui no Marite paatoa.
Ua parau o Bob Aiken, te peresideni e te ti‘a faatere rahi no Feeding America e, e faafana‘o teie maa horo‘a te tahi 625 000 tamaaraa.
Ua faahoho‘a te mau taata ori e ta ratou tahiri i te numera « 20 » i roto i te hoê aruʻi faahanahana i te 20raa o te matahiti o te Ekalesia i Mogolia.
Hoho‘a ho-mai-hia e te misioni no Mogolia Ulaanbaatar Mission
Teie te mau misionare e te mau melo i Haiti, te tanu ra i te mau tumu raau i ni‘a i te mouʻa i ni‘a a‘e i te oire no Port au Prince, o te itehia nei i muri roa mai.
Hoho‘a na Jason Swensen