No te aha, e eaha te mea i titauhia ia‘u ia fa‘i i mua i to‘u episekopo ?
Te tautururaa ia outou ia tatarahapa, o te hoê ïa tuhaa taa ê roa o te piiraa o te hoê episokopo. Na te manaʻo o to outou aau e parau mai ia outou e, eaha te taime e titauhia ia outou ia paraparau ia’na.
E uiui paha outou e, no te aha i haapiihia ai ia outou ia faʻi i mua i to outou episkopo e aore râ, te peresideni amaa ia rave anaʻe outou i te hara rahi. E parau paha outou ia outou iho e, « E ere anei te tatarahapa i te hoê ohipa i rotopu noa ia’u e te Fatu ? Mai te mea e, ua faaea vau i te rave i ta’u ohipa hape e ua faʻi i te reira i mua i te Atua, no te aha i titauhia ai ia’u ia paraparau i to’u episekopo ? »
Hohoʻa faahoho‘araa na Christina Smith
E no te aha te episekopo, e e ere i te tahi atu taata ?
E rave rahi feia apî e mea au aʻe na ratou e faʻi i ta ratou mau hapa i to ratou na metua e aore râ, i te feia faatere no te feia apî. Noa’tu e, e nehenehe i to outou na metua e to outou feia faatere e horoʻa mai i te patururaa e te aʻoraa e titauhia, ua parau mai te Fatu e, ua riro te episeko ei haavâ i roto ia Iseraela (a hiʻo PH&PF 107:72, 74). Tei ia’na te hopoiʻa no te faaoti i te tiʻamâraa o te mau melo o ta’na paroisa. Na roto i te faatoroʻaraa e te oraraa parau-tiʻa, ua haamanahia te episekopo no te farii i te heheuraa no ô mai i te Varua Maitai ra no niʻa i te mau melo o ta’na paroisa, tae roa’tu ia oe.
E nehenehe i te episekopo e tauturu ia oe na roto i te tatarahapa na roto i te mau raveʻa e ore e tiʻa i to outou na metua e te tahi atu mau feia faatere ia horoʻa. Mai te mea e, e hara rahi, e faaoti oia e, ia faaitihia to outou mau tiʻaraa i roto i te Ekalesia. Ei hiʻoraa, i roto i ta outou tatarahaparaa, e ani mai paha oia ia outou ia faaea i te amu i te oroʻa moʻa, e aore râ, ia faaea i te faaohipa i te autahuʻaraa no te hoê tau. E rave oia i te ohipa i pihaʻi iho ia outou e e faaoti e, eaha te taime e tiʻamâ faahou ai outou no te farii i taua mau ohipa moʻa ra.
E aʻo mai to outou episekopo ia outou no niʻa i te ohipa e rave no te haapaari i to outou tiʻaraa ia patoʻi i te faahemaraa. E faaitoito oia ia outou ia taiʻo i te mau parau tumu, mai te tatarahapa, e i muri iho, a faaite ia’na i te mau mea ta outou i apo mai. E ani paha oia ia outou ia farerei ia’na i te mau hepetoma atoa no te faaite i to outou huru i roto i te iritiraa mai ia outou i rapae i te mau tiʻaraa faahema.
Eaha te taime e titauhia ia’u ia paraparau Ia’na ?
E feruri paha outou e, « Ua tano ihoa te reira, tera râ, nahea vau e ite ai e, te ohipa ta’u i rave e mea fifi roa ïa i titauhia ai ia’u ia paraparau i te episekopo ? » Pahono poto noa : « Na te manaʻo o to outou aau e parau mai ia outou ». Ia ite anaʻe outou i te tara o te manaʻo o te aau, a rave i taua taime iho ra (a hiʻo Alama 34:31–34).
No niʻa i te tatarahapa, ua haapii mai te Arii Beniamina e, « Aita e tiʻa ia’u ia faaite atu i te mau mea e hope roaʻe e hapaʻi outou ; ua rau te huru o te eʻa e te raveʻa, e tae atu hoi i te rahi e ore ïa e tiʻa ia’u ia taiʻo » (Mosia 4:29). No reira eita vau e horoʻa’tu i te hoê tapura o te mau ohipa o ta outou e faʻi i mua i to outou episekopo, e faaite atu râ vau i te tahi mau parau tumu o te tauturu ia outou ia rave i taua faaotiraa ra.
Eaha te mea e tiʻa ia’u ia faʻi ?
Ua ite au e, ua tamata outou ia haapaʻo, tera râ, penei aʻe ua rave paha outou i te tahi mau hape—e e mau hape rahi paha. Te rahiraa o te mau hape ta te taata e rave, e nehenehe e faatitiaifarohia na roto i te pure o te taata iho e na roto i te tatarahapa aau tae mau. Te tahi râ mau hape, te mau hape ihoa râ no te pae morare, e titauhia ïa ia faʻi i mua i te episekopo hou a tiʻa ai ia outou ia farii i te faaoreraa hapa a te Fatu.
Ia feruri anaʻe outou i te mau hape ta outou i rave, e tupu mai paha to outou mana‘o faahapa, e vai papû ore paha outou, eita paha e oaoa, e aore râ, e oto roa paha outou. Mai te mea e, te tupu nei te reira huru manaʻo i roto ia outou, e tano paha ia outou ia paraparau i to outou episekopo no niʻa i te reira mau hape.
Eiaha e tamata i te faaore i te hapa outou iho e aore râ, e faatumu i to outou hapa i ni‘a i te mana‘o. E feruri paha outou e, « E mea haamâ roa ia faaite i te episekopo i te ohipa ta’u i rave. Te feruri nei oia e, e taata maitai aʻe au i tera. E maere roa oia mai te mea e, e faaite au ia’na i te ohipa ta’u i rave. Eita oia e au faahou mai ia’u ».
Te fafau atu nei au ia outou e, eita oia e faahapa ia outou. Ei tavini no te Fatu, e faaite mai oia i te maitai e te haroʻaroʻa a faaroo ai oia ia outou. E i muri iho, e tauturu oia ia outou na roto i te faanahoraa o te tatarahapa. Oia te veʻa o te aroha o te Fatu no te tauturu ia outou ia riro ei taata mâ na roto i te Taraehara o Iesu Mesia.
Ua parau te Fatu « Inaha, o oia o tei tatarahapa i ta’na ra mau hara, ua faaorehia ïa te reira, e e ore hoi au, o te Fatu e haamanaʻo faahou â i te reira.
« Na roto i teie nei mea e ite ai outou e mai te mea ua tatarahapa te taata i ta’na ra mau hara—inaha, e faʻi mai oia i te reira e e haapae ê roa’tu hoʻi » (PH&PF 58:42–43).
Ia faʻi e ia faaru‘e anaʻe outou i ta outou mau hara, e faaore te Fatu i ta outou hapa. Eita e titauhia ia outou ia tia’tu i mua Ia’na no te reira mau hara ia tae anaʻe mai te taime e haavâhia ai outou.
E ahiri e, aita vau i faʻi ?
I te tahi taime e faaea te hoê taata i te rave i te ohipa tiʻa ore, eita râ oia e faʻi, noa’tu ua titauhia, i mua i toʻna episekopo. E no reira, e tamau noa te reira taata i te amo i te hopoiʻa o te hara o’na anaʻe iho, aita oia e vaiiho i te Faaora ia rave ê i te reira hopoiʻa.
Teie te hoê hiʻoraa. Hoê pô, tau matahiti i maʻiri aʻenei, te uiui ra vau i te tahi mau taata paari no te faaapî i ta ratou parau faati‘a no te hiero. Ua tomo mai ra te hoê vahine paari rii noa no ta’na uiuiraa. Ua faaipoipohia oia i roto i te hiero, e e mea haapaʻo roa oia i roto i te Ekalesia i roto i toʻna oraraa taatoa.
Ua ite aʻera vau i te hoê oto i roto i toʻna varua. A haere noa ai te uiuiraa i mua, ua puta mai ra i roto ia’u te hoê manaʻo o te varua. Na ô atura vau ia’na e, « E te tuahine, te manaʻo nei au e, ua rave oe i te hoê hape rahi roa i to oe taureʻareʻaraa ra, o ta oe i ore i faʻi i mua i te hoê tiʻa faatere o te autahuʻaraa. Ua hinaaro anei oe e faaite mai i te reira ia’u ? »
Ua haamata aʻera oia i te taʻi. Ua parau mai ra oia ia’u e, e parau mau te reira, tera râ, ua tupu tamau noa te haamâ i roto ia’na no te faʻi i te reira i mua i te hoê episekopo. A faʻi ai oia i te ohipa ta’na i rave, ua faaite oia i te mau haamaramaramaraa i mua ia’u ia tiʻa ia’u ia faataa i toʻna tiʻamâraa.
Ua riro te faʻiraa o ta’na hara i mua i te hoê ti‘a faatere o te autahuʻaraa ei hopearaa no toʻna tatarahaparaa, eiaha râ ei haamataraa. Ua amo faufaa ore noa oia i te hopoiʻa e te oto no taua hara ra hau atu i te 30 matahiti.
No te mea hoʻi e, ua faaoti oia i te taahiraa hopea o te tatarahaparaa, ua tumâhia ta’na hapa. Ua farerei au ia’na i tera e tera taime i muri aʻe i te pô o taua uiuiraa ra. Ua maramarama toʻna hohoʻa mata, e e mea oaoa oia.
Te hinaaro nei au ia ite outou e, aita vau e haamanaʻo nei i toʻna iʻoa. E nehenehe i te Fatu e iriti i te reira mau haamanaʻoraa i te feruriraa o te mau episekopo. Te mea ta’u e haamanaʻo ra, maori râ, na roto i toʻna faʻiraa i mua i toʻna tiʻa autahuʻaraa, ua hau te hoê vahine paari rii noa i te mau manaʻo hapa ta’na i amo noa e rave rahi matahiti.
Eiaha e rave i te reira hape. Mai te mea e, te fifi ra to outou manaʻo, aita râ outou i papû e, e titauhia anei ia outou ia faʻi i mua i to outou episekopo, a haere a hiʻo ia’na. A vaiiho ia’na ia tauturu ia outou. Eiaha e amo faufaa ore noa i te hoê hopoiʻa i roto i to outou oraraa taatoa, o te faaoto roa ia outou. Na roto i ta outou faʻiraa i mua i te episekopo e ta outou tatarahapa, e iriti te Fatu i te reira hopoiʻa i niʻa i to outou varua (a hiʻo Isaïa 1:18).
No te aha i titauhia ai ia’u ia tatarahapa ?
Ua aufau Iesu Mesia i te hoo o te mau hara a te mau taata atoa na roto i Toʻna tusia taraehara. Te ani manihini mai nei Oia ia outou ia tatarahapa no te ape i te tahi atu oto e te mamae. « A tatarahapa oi… rahi â to oe mau mamae ra—te rahiraa o te reira mamae aore roa i itea ia oe, te huru mau o te reira mamae aore roa hoʻi i itea ia oe.
« No te mea, inaha, ua faaoromai au, o te Atua, i teie nei mau mea no te taatoʻaraa, ia ore ratou ia roohia i te mamae mai te mea e e tatarahapa ratou ;
« Tera râ mai te mea e aita ratou e tatarahapa ia roohia ratou i te mamae rahi e tiʻaʻi ia au i ta’u i faaoromai ra…
« No reira, te faaue faahou atu nei au ia oe ia tatarahapa,… e ia faʻi mai hoi oe i ta oe ra mau hara, oi roohia’tu ai oe i teie nei mau utuʻa o tei parauhia e au nei » (PH&PF 19:15–17, 20).
Te faaite papû nei au e, na roto i Toʻna mauiui, ua aufau aʻena Iesu Mesia i te hoo o ta outou mau hara. E nehenehe e faaorehia ta outou hapa mai te mea e, e tatarahapa outou. Eiaha e tamata i te aufau i te hoo no ta outou mau hara. Aita e faito no to outou iho mamae e faaora ia outou ; na roto anaʻe i te Taraehara e farii ai outou i te faaoreraa o ta outou hapa.
E mata na outou i te faaite i te faaroo i roto ia Iesu Mesia e i Toʻna Taraehara. Te faaite papû nei au i te iʻoa o Iesu Mesia e, na roto i te tatarahapa, e tae noa’tu i te faʻiraa i mua i to outou episekopo, mai te mea e, e titauhia, e riro mai outou ei taata mâ. Taa ê noa’tu i te reira, na roto i te aroha o te Faaora—Toʻna mana faati‘a—e haapuaihia outou i roto i to outou tiʻaraa no te patoʻi i te faahemaraa a muri aʻe. E na roto i te reira, e roaa te hau i roto i to outou varua e te oaoa i roto i teie oraraa, e e farii outou i te ora mure ore i roto i te ao e tae mai.