Tauturu ia Violette

Na Charlotte Mae Sheppard

No roto mai i te hoê aamu mau

« E aroha’tu oe i to taata tupu mai to aroha ia oe iho na » (Mareko 12:31).

Nahea e tiʻa ai ia Emma ia faaite i te huru maitai, i te mea e, e mea ino roa o Violette ?

Ua huti haapaari faahou o Emma i ta’na pute tua a tomo ai oia i roto i ta’na piha haapiiraa apî. Te mahana matamua teie o te haapiiraa. Ua oomo oia i te ahu au-roa-hia e aʻna, e ua faaineine to‘na mama i te hoê maa rii monamona no ta‘na tamaaraa—e faraoa monamona.

Ua feruri o Emma e, « E riro teie mahana ei mahana maitai roa ». « Mai te mea e—»

Ua faaea ihora o Emma e ua hiʻo aʻera i roto i te piha haapiiraa. Tei ô nei atoa oia. O Violette.

I te matahiti i maʻiri aʻenei, ua popore noa o Violette i te mau auri ha‘uti faatarere i te mau taime faafaaearaa atoa o te haapiiraa. Ua pii oia ia Emma i te tahi i‘oa. Ua eiâ atoa oia i te hoa rahi o Emma !

Ua ite atu o Violette ia Emma e ua faatoro i te arero i niʻa ia’na. Ua hiʻo mata aʻera o Emma e ua tape‘a paari faahou i ta’na pute. Aita o Violette i riro ei hoa maitai i roto i te roaraa o te matahiti i ma‘iri na, e mai te mea ra e, eita teie matahiti e huru ê atu.

« Manava i te piha haapiiraa apî no teie matahiti ! » Te parau ïa a Caldwell vahine i mua mai i te piha. « E faataa tatou i te mau parahiraa ».

Ua faanaho-pitipiti-hia te mau amuraa maa i roto i te piha haapiiraa. Ua faatoro Miss Caldwell i toʻna rima i niʻa i te tapura iʻoa ; e ua faatoro atura i niʻa i na amuraa maa i muri. « Emma. E parahi oe i muri ».

Ua parahi o Emma i niʻa i te hoê o na amuraa maa i muri. Ua tiʻaturi oia e, e parahi o Liselle i pihaʻi iho ia’na. E aore râ, o Jaime. e aore râ—

« Violette ».

Ua tiʻa taʻue mai ra te upoo o Emma. Ua faaroo maitai anei oia ?

E. Te faatoro noa ra â o Caldwell vahine i toʻna rima i niʻa i amuraa maa i pihaʻi iho ia’na. « Violette, o oe te parahi i pihaʻi iho ia Emma », ta’na ïa parau.

Ua haere au ore noa’tura o Violette i pihaʻi iho ia Emma ma te mata tuʻatuʻa. Ua faatopa aʻera o Emma i toʻna upoo i niʻa i ta’na amuraa maa ma te hiʻo noa’tura i te papaʻi. E riro teie ei matahiti roa roa.

I te taime no te haapiiraa numera, ua papaʻi o Caldwell vahine i te tahi mau uiraa i niʻa i te tapura na te mau piahi e imi. « E rave outou outou anaʻe e aore râ, na muri i to outou hoa », ta’na ïa parau.

Oioi roa o Emma i te tipapa i niʻa i ta’na api parau, mai te huru e, e mea ohipa roa oia. E mea ohie roa te mau uiraa. Te tamata nei râ oia i te ape ia Violette. Aita oia i hiʻo hoê noa aʻe taime i niʻa ia’na i taua poʻipoʻi taatoa ra.

Ua puta mai ra te hoê mea i niʻa i toʻna tapono. Mai te mea ra e, e penitara. Aita o Emma i haapaʻo noa a‘e.

Te tahi faahou patia. Te patia mai nei o Violette ia’na ! Ua tamau noa o Emma i te rave i ta’na ohipa ma te ahihi ore.

Te toru o te patia a Violette e mea puai rii aʻe ïa, e te mauiui. Te haamata mai ra o Emma i te ahu i roto ia’na. Mai tera noa ihoa ïa te huru i roto i teie matahiti taatoa ? Ua manaʻo oia e afaʻi i toʻna rima i niʻa no te faaite ia Caldwell vahine. E aore râ, e faaite noa paha oia ia Violette i te tahi faahou hohoʻa riri.

I taua taime ra, ua faaroo aʻera o Emma i te taʻi o te ihu. E taata anei te taʻi ra ? Ua puta faahou mai ra te penitara i niʻa ia’na. Ua fariu mai ra oia i te upoo i niʻa e ua ite atura oia ia Violette te hiʻo noa mai ra ia’na. Tei roto ta’na penitara i toʻna rima, e e roimata to roto i toʻna na mata. Ua î roa ta’na api parau i te tafetafeta no te tumaraa.

Ua ofati o Violette i te penitara i roto i toʻna na rima. « E nehenehe anei ta oe e tauturu mai ia’u ? » ua ani mărû noa mai oia.

Ua hiʻo atu o Emma i niʻa ia’na tau minuti iti, ma te maere. Te hinaaro nei o Violette ia tauturu atu o’na ? I muri aʻe i toʻna ino rahi ? Ua fariu faahou o Emma i niʻa i ta’na api parau. E nehenehe ta Violette e rave o’na anaʻe. Aita oia e tiʻa ia fanaʻo i te tauturu a Emma, noa’tu e, o oia…

toʻna taata tupu ?

Ma te paraparau ore, ua hiʻo noa o Emma i mua. Ua tiʻa ia’na ia faaroo ia Violette ia taʻi mărû noa i pihaʻi iho ia’na. Ua parau tamau noa te mau papaʻiraa moʻa ia here i toʻna taata tupu—tera râ, e mea taa ê o Violette ! Tei pihaʻi iho noa oia ia’na i te parahiraa i roto i te piha haapiiraa !

E ua rave faahou Emma i ta’na ohipa. I muri iho, ua faaea oia. Peneiaʻe aita o Violette i taa ê atu. Peneiaʻe ia parau anaʻe te mau papaʻiraa moʻa ia here i to outou taata tupu, te auraa ra, o te mau taata atoa ïa. Tae roa’tu i te mau taata tupu ino. Noa’tu e, e mea fifi roa.

Ua puhi aʻera Emma i te matai e ua tuu mărû noa’tura i ta’na penitara i raro. Ua fariu atura oia i niʻa ia Violette e ua tamata rii ia ataata. « E nehenehe anei ta’u e tauturu ? » ta’na ïa aniraa.

Ua tairiiri mai ra Violette i te upoo, tamărô aʻera i te roimata i toʻna rima.

Ua faaao atura Emma i niʻa i te api parau a Violette e ua hamata ihora i te tauturu no te uiraa matamua. Ua tupu aʻera te hoê manaʻo mahanahana i roto ia’na. Ua mana‘o aʻera oia e, e au anei o Violette i te faraoa monamona hohoʻa animara.